ខេត្តស្វាយរៀង ៖ ឈ្មួញនាំសត្វជ្រូករស់ជិត១ពាន់ក្បាលតាមរថយន្តយីឌុបភ្លៅប្រាំឆ្លងដែនទៅប្រទេសវៀតណាមតាមច្រករបៀងភ្លឺប្រឡាយផា ស្ថិតនៅភូមិកែវជះ ឃុំបន្ទាយក្រាំង ស្រុកកំពង់រោទ៌ ដោយគ្មានមន្ត្រីត្រួតពិនិត្យហើយអ្វីដែលខុសប្រក្រតីនោះឈ្មួញកាន់ច្បាប់ដឹកជ្រូកពីប្រទេសថៃឆ្លងកាត់ និងចេញតាមច្រកទ្វេភាគីស្វាយអាង៉ោង ឃុំចាម ស្រុកកំពង់ត្របែក…
ខេត្តស្វាយរៀង ៖ ឈ្មួញនាំសត្វជ្រូករស់ជិត១ពាន់ក្បាលតាមរថយន្តយីឌុបភ្លៅប្រាំឆ្លងដែនទៅប្រទេសវៀតណាមតាមច្រករបៀងភ្លឺប្រឡាយផា ស្ថិតនៅភូមិកែវជះ ឃុំបន្ទាយក្រាំង ស្រុកកំពង់រោទ៌ ដោយគ្មានមន្ត្រីត្រួតពិនិត្យហើយអ្វីដែលខុសប្រក្រតីនោះឈ្មួញកាន់ច្បាប់ដឹកជ្រូកពីប្រទេសថៃឆ្លងកាត់ និងចេញតាមច្រកទ្វេភាគីស្វាយអាង៉ោង ឃុំចាម ស្រុកកំពង់ត្របែក ខេត្តព្រៃវែង សង្ស័យឈ្មួញគេចកាត់ស្តុកពីមន្ត្រីពេទ្យសត្វទើបលួចចេញតាមច្រករបៀងនៅខេត្តស្វាយរៀងវិញ ។
ករណីឈ្មួញដឹកជ្រូកឆ្លងដែនទៅប្រទេសវៀតណាមនេះកើតឡើងនៅវេលាម៉ោង៨និង១០នាទីព្រឹកថ្ងៃទី១៧ ខែធ្នូ ឆ្នាំ២០១៩ ដោយប្រើរថយន្ត១គ្រឿងដឹកជ្រូកប្រមាណ៣០០ក្បាល ហើយនៅល្ងាចម៉ោង៣និង៥នាទីរសៀលមានរថយន្ត១គ្រឿងទៀតដឹកជ្រូកប្រមាណ២៥០ក្បាល និងវេលាម៉ោង៥និ១០នាទីល្ងាចមានរថយន្ត១គ្រឿងដឹកជ្រូកប្រមាណ២៥០ក្បាលបន្ថែមទៀតបានទម្លាក់ពីលើរថយន្តផ្ទេរសាងដាក់ត្រាក់ទ័រដឹកឆ្លងដែនទៅប្រទេសវៀតណាមតាមច្រករបៀងក្រោមការគ្រប់គ្រងរបស់ច្រករបៀងសំយ៉ោង ។
សម្តេចក្រឡាមហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានចេញសេចក្តីប្រកាសរួចមកហើយថា មិនអនុញ្ញាតិឱ្យនាំនូវផលិតផលសត្វ និងផលិតផលដែលមានដើមកំណើតពីសត្វចេញចូលតាមច្រករបៀងទេទូទាំងប្រទេសក៏ប៉ុន្តែឈ្មួញបានឃប់ឃិតជាមួយសមត្ថកិច្ចការពារព្រំដែនលួចនាំសត្វជ្រូករស់ពីប្រទេសថៃឆ្លងដែនចេញទៅប្រទេសវៀតណាមតាមច្រករបៀងដោយគ្មានមន្ត្រីពេទ្យសត្វត្រួតពិនិត្យឡើយ ។
បើតាមសមត្ថកិច្ចបានបង្ហើបឲ្យដឹងថា ជ្រូកជិត១ពាន់ក្បាលនេះជារបស់ក្រុមហ៊ុន«អង្គរ សុខ សារិទ្ធ មានជ័យ» នាំចូលពីប្រទេសថៃនាំចេញទៅប្រទេសវៀតណាមតាមច្រកទ្វេភាគីស្វាយអាង៉ោង ឃុំចាម ស្រុកកំពង់ត្របែក ខេត្តព្រៃវែង ដែលគេស្គាល់ថា ជាក្រុមហ៊ុនរបស់លោកឧកញ៉ាមួយរួប ហើយសមត្ថកិច្ចសង្ស័យថា ក្រុហ៊ុននេះមិនចេញតាមច្រកស្វាយអាង៉ោងគឺសង្ស័យមានការឃប់ឃិតជាមួយមន្ត្រីច្រករបៀងគេចវេសក្នុងការបង់ពន្ធនាំចេញ និងគេចពីមន្ត្រីពេទ្យសត្វពិនិត្យឯកសារកាត់ស្តុក ។
ទាក់ទិនករណីខាងលើនេះដែរលោក ថាច់ រតនា ប្រធានមន្ទីរកសិកម្ម រុក្ខាប្រមាញ់ និងនេសាទខេត្តស្វាយរៀងបានមានប្រសាសន៍តាមទូរសព្ទ័ថា បញ្ហាឈ្មួញនាំសត្វជ្រូករស់ឆ្លងកាត់ហើយនាំចេញទៅក្រៅប្រទេសគឺត្រូវតែឆ្លងកាត់មន្ត្រីជំនាញពេទ្យសត្វត្រួតពិនិត្យឯកសារ និងចំនួនជ្រូកដើម្បីកាត់ស្តុក ។ ហើយបើមានករណីឈ្មួញនាំជ្រូកឆ្លងដែនទៅប្រទេសវៀតណាមមែនលោកនឹងឱ្យមន្ត្រីជំនាញនៃការិយាល័យផលិតកម្ម និងបសុព្យាបាលនៃមន្ទីរកសិកម្ម រុក្ខាប្រមាញ់ និងនេសាទខេត្តចុះទៅត្រួតពិនិត្យតាមនីតិវិធី ។
លោក វាសនា តំណាងក្រុមហ៊ុន«អង្គរ សុខ សារិទ្ធ មានជ័យ»បានបំភ្លឺនៅព្រឹកថ្ងៃទី១៨ ខែធ្នូ ឆ្នាំ២០១៩ នេះថាដោយក្រុមហ៊ុនវៀតណាមនៅច្រកស្វាយអាង៉ោងពិបាកក្នុងការដឹកជញ្ជូនជ្រូកចូលទៅវៀតណាមទើបខាងវៀតណាមសំណូមពរសុំសាងជ្រូកនៅខេត្តស្វាយរៀងវិញ ។ ម្យ៉ាងពេលល្ងាចដល់យប់ខាងលោកមិនបានទំនាក់ទំនងមន្ត្រីពេទ្យសត្វដោយផ្អែកថា ជ្រូកទាំងនេះដឹកមកពីប្រទេសថៃគ្រាន់តែឆ្លងកាត់មិនចាំបាច់កាត់ស្តុកទេ ។
ចំណែកលោក ឈិន សៅ មន្ត្រីការិយាល័យផលិតកម្ម និងបសុព្យាបាលមន្ទីកសិកម្មខេត្តបានមានប្រសាសន៍ថា ដោយយប់មិនស្គាល់ភូមិសាស្ត្រពិបាកក្នុងការធ្វើដំណើរទម្រាំទៅដល់កន្លែងឈ្មួញសាងជ្រូកនោះគឺឈ្មួញបានដឹកជ្រូកចូលទៅប្រទេសវៀតណាមអស់ហើយដូច្នេះលោកមិនបានត្រួតពិនិត្យសត្វជ្រូកទាំងនោះទេ ។ ចំពោះមន្ត្រីនគបាល និងមន្ត្រីយោធាវរៈការពារព្រំដែនច្រករបៀងសំយ៉ោងក៏មិនអាចរកការបំភ្លឺបានដែរ ៕
កែសម្រួលដោយ ៖ សំណាង
ចែករំលែកព័តមាននេះ