ប្រទេសចិន ៖ ជានិមិត្តរូបថ្មីនៃការបង្កើនកម្លាំងយោធារបស់ខ្លួន ប្រទេសចិនកាលពីថៃ្ងទី១៧ ខែធ្នូ ឆ្នាំ២០១៩ បានដាក់ឲ្យប្រើប្រាស់នាវាផ្ទុកយន្តហោះទី២របស់ខ្លួន ដែលនាវានេះកសាងឡើង១០០% ដោយចិនខ្លួនឯង ខណៈមានការប្រកួតប្រជែងគ្នាជាមួយសហរដ្ឋអាមេរិកនៅអាស៊ីប៉ាស៊ីហ្វិក។…
ប្រទេសចិន ៖ ជានិមិត្តរូបថ្មីនៃការបង្កើនកម្លាំងយោធារបស់ខ្លួន ប្រទេសចិនកាលពីថៃ្ងទី១៧ ខែធ្នូ ឆ្នាំ២០១៩ បានដាក់ឲ្យប្រើប្រាស់នាវាផ្ទុកយន្តហោះទី២របស់ខ្លួន ដែលនាវានេះកសាងឡើង១០០% ដោយចិនខ្លួនឯង ខណៈមានការប្រកួតប្រជែងគ្នាជាមួយសហរដ្ឋអាមេរិកនៅអាស៊ីប៉ាស៊ីហ្វិក។
នាវាផ្ទុកយន្តហោះថ្មីនេះ ដែលដាក់ឈ្មោះថា SHANDONG ត្រូវបានដាក់បញ្ចូលក្នុងកងកម្លាំងនាវាចរណ៍ចិន ក្នុងពិធីមួយនៅឯមូលដ្ឋាននាវាចរណ៍នៃកោះហៃណាន់ ដោយមានវត្តមានរបស់ប្រធានាធិបតីចិន លោកស៊ីជីនពីង។ ក្រោមកម្ដៅថ្ងៃក្ដៅហែង សមាជិកប្រមាណជា៥០០០នាក់នៃកងម៉ារីនដែលមានឯកសណ្ឋានពណ៌ស និងបណ្ដាកម្មករដែលចូលរួមក្នុងការកសាងនាវានេះ បានច្រៀងបទគោរពទង់ជាតិចិន។
ប្រធានាធិបតីបានថតរូបអនុស្សាវរីយ ជាមួយកងយោធានិងបណ្ដាជនស៊ីវិល ដែលមានវត្តមាននៅឯកំពង់ផែនៃទីក្រុងសានយ៉ា ដោយលោកអំពាវនាវឲ្យពួកគេចូលរួមចំណែកថ្មីៗ ក្នុងកិច្ចការពារបក្សកុំមុយនីស្តនិងប្រជាជនចិន។
ចិនមកទល់ពេលនេះមាននាវាផ្ទុកយន្តហោះតែ១គត់ដែលធ្វើប្រតិបត្តិការ ឈ្មោះLIAONING។ នាវានោះកសាងដោយអតីតសហភាពសូវៀត ហើយចិនទិញយកពីអ៊ុយក្រែន ដោយដាក់ឲ្យប្រើប្រាស់សកម្មក្នុងឆ្នាំ២០១២។ នាវាផ្ទុកយន្តហោះទី២បានដាក់ចូលទឹកកាលពីឆ្នាំ២០១៧ ដើម្បីធ្វើការសាកល្បងរួចវាពុំមែនជានាវាប្រើថាមពលនុយក្លេអ៊ែរឡើយ ហើយអាចផ្ទុកយន្តហោះបាន៤០គ្រឿង។ ចំណែកនាវាផ្ទុកយន្តហោះទី៣កំពុងកសាង។
បែបនេះកងទ័ពចិនបានបង្កើនកម្លាំងហើយចាត់ទុកជាកងទ័ពខ្លាំងទី២នៃពិភពលោក បន្ទាប់ពីសហរដ្ឋអាមេរិក។ ថវិកាការពារអាមេរិកមានប្រមាណជា៣ដងខ្ពស់ជាងចិន។
ជាមួយនាវាផ្ទុកយន្តហោះថ្មី ចិនចង់ការពារបណ្ដានាវាដឹកទំនិញរបស់ខ្លួន ពិសេសការផ្គត់ផ្គង់បណ្ដាថាមពលមកពីមជ្ឈឹមបូព៌ា និងធ្វើអន្តរាគមន៍ ដើម្បីការពារជនជាតិខ្លួននិងផលប្រយោជន៍របស់ខ្លួន ក្នុងបណ្ដារដ្ឋដែលអន់ថយ។
ការដាក់ឲ្យប្រើនាវាផ្ទុកយន្តហោះថ្មី ក៏ធ្វើដែរ ពេលក្រុងប៉េកាំងប្រកាន់ជំហរម៉ឺងម៉ាត់ ចំពោះបញ្ហាសមុទ្រចិនខាងត្បូង៕ (កែសម្រួលដោយ ៖ បុប្ផា) (ប្រភពវីដេអូ ៖ Sputnik France Play)
ចែករំលែកព័តមាននេះ