រាជធានីភ្នំពេញ ៖ បុរសមិនស្គាល់អត្តសញ្ញាណម្នាក់ ដែលអ្នកស្គាល់ខ្លះប្រាប់ថា ជាគ្រូបង្រៀនម្នាក់តែមិនស្គាល់ឈ្មោះ បានជាប់ចោទលួចមើលនិងលួចថតរូបស្ត្រីម្នាក់នៅបន្ទប់ទឹកក្នុងស្ថានីយប្រេងឥន្ធនៈមួយកន្លែងខណៈដែលស្ត្រីខាងលើចូលទៅបត់ជើងតូចនៅក្នុងបន្ទប់ទឹក ប៉ុន្តែត្រូវបានស្ត្រីរូបនោះឃើញក៏ស្រែកឆោឡោ បង្កការភ្ញាក់ផ្អើលដល់អ្នកនៅទីនោះដេញចាប់បាន ។
បន្ទាប់ពីយកទូរស័ព្ទឆែកមើលរូបភាព ឃើញមានរូបកេរ្តិ៍ភេទរបស់ស្ត្រីរូបនោះបានធ្វើឲ្យអ្នកចាប់ផ្ទុះកំហឹងក៏ព្រួតគ្នាវាយម្នាក់១ដៃមួយជើង បណ្ដាលឲ្យរងរបួសយ៉ាងដំណំបែកឈាមពេញមុខ ហូរប្រឡាក់អាវក្រហមច្រាល ។ ហេតុការណ៍ដែលកម្រកើតមាននេះ បានកើតឡើងកាលពីវេលាម៉ោង៧និង៣០នាទីយប់ថ្ងៃទី១៦ ធ្នូ នៅក្នុងបន្ទប់ទឹកស្ថានីយ៍ប្រេងឥន្ធនៈPTT ដែលមានទីតាំងស្ថិតនៅខាងត្បូងរង្វង់មូលកួរស្រូវឬរង្វង់មូលដីក្រហម តាមផ្លូវជាតិលេខ២ ក្នុងភូមិក្រាំងស្វាយ សង្កាត់ព្រែកកំពឹស ខណ្ឌដង្កោ រាជធានីភ្នំពេញ ។
បុរសខាងលើនេះ មិនត្រូវបានគេស្គាល់ពីអត្តសញ្ញាណនោះទេ មានអាយុជាង៥០ឆ្នាំ ហើយប្រភពខ្លះសង្ស័យថា គាត់កើតរោគចិត្តនិងខ្លះទៀតថា បុរសនេះពុំមានកើតរោគចិត្តអីទេ គឺជាគ្រូបង្រៀនម្នាក់នៅស្រុកបាទី ខេត្តតាកែវ បានជិះរថយន្ត១គ្រឿង ម៉ាកកាមរីបាឡែន ពណ៌ស្ករ ពាក់ស្លាកលេខភ្នំពេញ2U-9724 ។
នគរបាលបានឲ្យដឹងថា នៅមុនពេលកើតហេតុមានបុរសនិងស្ត្រី២នាក់ប្ដីប្រពន្ធបានជិះរថយន្ត១គ្រឿងទៅឈប់នៅក្នុងស្ថានីយប្រេងឥន្ធនៈPTTនោះ បន្ទាប់មកស្ត្រីជាប្រពន្ធបានចូលទៅបត់ជើងតូចនៅក្នុងបន្ទប់ទឹកដែលស្ថិតនៅក្នុងស្ថានីយប្រេងនោះ ។ ចំណែកជនសង្ស័យខាងលើបានស្ថិតនៅបន្ទប់ទឹកនោះដែរ ខណៈនោះជននេះ ក៏បានលួចមើលនិងលួចថតរូបសកម្មភាពស្ត្រីខាងលើកំពុងបត់ជើងតូច ហើយត្រូវស្ត្រីនោះឃើញការលួចថតតាមកាមេរ៉ាទូរស័ព្ទក៏ស្រែកឆោឡោបង្កឲ្យមានការភ្ញាក់ផ្អើលឈុលឡើងតែម្តង ។
ភ្លាមៗអ្នកនៅក្បែរទីនោះដែលភ្ញាក់ផ្អើលបាននាំគ្នាដេញតាមចាប់បាន និងដកយកទូរស័ព្ទមកឆែកមើល ទើបផ្ទុះកំហឹងព្រួតគ្នាវាយម្នាក់១ដៃ១ជើងបណ្ដាលឲ្យរងរបួសបែកមុខបែកមាត់ដូចគេវាយចោរ ។ ចំណែកស្ត្រីរងគ្រោះនិងប្ដីដោយខ្លាចខ្មាស់គេក៏បាននាំគ្នាបើករថយន្តចាកចេញទៅបាត់ដោយមិនបានដាក់ពាក្យបណ្ដឹងអ្វីឡើយ ។ ម្ចាស់ស្ថានីយប្រេងឥន្ធនៈប្រគល់ជនកំហូចនេះ ដល់នគរបាលប៉ុស្តិ៍ព្រែកកំពឹស ។
ពេលនោះ ដោយរកអ្នកទទួលខុសត្រូវដាក់ពាក្យបណ្ដឹងមិនបានផង ហើយជននេះរបួសធ្ងន់ផង ទើបកម្លាំងនគរបាលសម្រេចធ្វើការអប់រំ និងឲ្យក្រុមគ្រួសារទៅធានារួចដោះលែងទៅវិញ ។ ព្រោះថា ជនកំហូចរូបនេះក៏មិនបានប្ដឹងអ្នកដែលវាយខ្លួនដែរ គឺសុំត្រឹមរួចខ្លួន និងបានទៅព្យាបាលរបួសនៅមន្ទីរពេទ្យដោយខ្លួនឯង ។
លោក សារុន វិថូរ៉ាត់ ម្ចាស់ស្ថានីយប្រេងឥន្ធនៈខាងលើអះអាងនៅក្នុងវីដេអូឃ្លីបមួយថា មានគេជួលជននេះ ដើម្បីអុកឡុកស្ថានីយប្រេងឥន្ធនៈរបស់លោក ។ នៅក្នុងការបង្ហោះ វីដេអូជិត២នាទី ដែលបានថតក្រោយកើតហេតុនោះ ម្ចាស់ស្ថានីយ៍ប្រេងខាងលើបានលុតជង្គង់លើកដៃសំពះក្បែរជនកំហូច ដែលអង្គុយក្បែរនោះ ដោយដៃជាប់ចំណងស្លាបសេក និយាយថា «បងប្អូនដឹងហើយ ពីទឹកចិត្តនិងមនុស្សខ្ញុំយ៉ាងម៉េច អ្វីគឺសៗ អ្វីគឺខ្មៅៗ តែថ្ងៃនេះខ្ញុំសូមអំពាវនាវប្រាប់បងប្អូននិងប្រជាពលរដ្ឋឲ្យដឹងច្បាស់ថា ម្នាក់នេះជាជនពាលនិងមានអ្នកជួលពីក្រោយ ដើម្បីឲ្យគាត់មកអុកឡុកកន្លែងបន្ទប់ទឹកស្អាតស្ថានីយ៍វិថូរ៉ាត់PTT នៅរង្វង់មូលកួរស្រូវផ្លូវជាតិលេខ២ គាត់មកកន្លែងនេះ ធ្វើសកម្មភាពដូចជា រត់ចូលបន្ទប់ទឹកស្រី ឱនចូលមើលបន្ទប់ទឹកស្រី មើលមនុស្សស្រីធ្វើសកម្មភាពអ្វី និងមានបំណងចង់ប្លន់មនុស្សស្រី និងមានបំណងចង់មើលប្រដាប់ភេទស្រី ។
អុីចឹងខ្ញុំក៏សម្រេចចិត្ត បង្ហោះវីដេអូរ១ឃ្លីបនេះនិងរូបភាពដ៏ទៃៗទៀត ដែលបុគ្គលិកស្ថានីយវិថូរ៉ាត់PTT ថតបាននិងអ្នកជិតខាងបានវាយគាត់ អុីចឹងខ្ញុំក៏សម្រេចចិត្តបង្ហោះរូបភាពនេះនិងបញ្ជូនគាត់ទៅឲ្យប៉ូលិសនិងច្បាប់ជាអ្នកដោះស្រាយ» ៕
ចែករំលែកព័តមាននេះ