រាជធានីភ្នំពេញ ៖ បច្ចុប្បន្នក៏ដូចជាពេលកន្លងមក ការវាយតម្លៃទៅលើការទទួលប្រាក់ចំណូលរវាងបុរស និងស្ត្រី មួយណាបានច្រើនជាងហាក់មិនទាន់ច្បាស់លាស់នៅឡើយនោះទេ ប៉ុន្តែបើតាមការសិក្សាស្រាវជ្រាវ ក៏ដូចជាតាមការលើកឡើងរបស់ថ្នាក់ដឹកនាំរបស់ធនាគារជាតិនៃកម្ពុជាថ្មីៗ បានគូសបញ្ជាក់ថា «បុរសមានចំណូលច្រើនជាងស្ត្រីលើគ្រប់វិស័យ រាប់ទាំងនៅក្នុងវិស័យកសិកម្មផងដែរ» ។
លោកជំទាវ នាវ ច័ន្ទថាណា ទេសាភិបាលរងធនាគារជាតិនៃកម្ពុជា បានលើកឡើងកាលពីថ្ងៃទី១៦ ខែធ្នូ ឆ្នាំ២០១៩ មកនេះថា តាមរយៈការសិក្សាមួយចំនួនបានបង្ហាញថា បុរសមានចំណូលច្រើនជាងស្ត្រី លើគ្រប់វិស័យដោយសារបុរសមានកម្រិតអប់រំ និងមានលទ្ធភាពទទួលបានកម្ចីខ្ពស់ជាងស្ត្រី ។ គម្លាតនេះ បណ្តាលមកពីភាពខុសគ្នានៃកម្រិតយល់ដឹងផ្នែកហិរញ្ញវត្ថុរបស់បុរស និងស្ត្រី ។
លោកជំទាវបានឱ្យដឹងទៀតថា ដើម្បីឱ្យស្ត្រីទទួលបានចំណូលច្រើន ឬប្រហាក់ប្រហែលទៅនឹងបុរសសម្រាប់នៅក្នុងវិស័យកសិកម្ម ទាមទារឱ្យមានការលើកកម្ពស់កម្រិតអប់រំ ការយល់ដឹងរបស់ស្ត្រីអាចនឹងចូលរួមចំណែកកាត់បន្ថយគម្លាតប្រាក់ចំណូលនៅក្នុងវិស័យកសិកម្ម ខណៈពេលដែលវិស័យមួយនេះ ស្រូបយកឥណទានសរុបបានកើនដល់ជាង ៣ ប៊ីលានដុល្លារអាមេរិក បើគិតត្រឹមខែមេសា ឆ្នាំ២០១៩ កន្លងទៅនេះ ។
លោកជំទាវគូសបញ្ជាក់ថា «យោងតាមទិន្នន័យរបស់ធនាគារជាតិនៃកម្ពុជា បានបង្ហាញថាកាលពីឆ្នាំ២០១០ ឥណទានសរុបទៅកាន់វិស័យកសិកម្មមានប្រមាណ ១,៦ ទ្រីលានរៀលឬស្មើប្រមាណ ៣៨១ លានដុល្លារអាមេរិក ។ ប៉ុន្តែគិតត្រឹមខែសីហា ឆ្នាំ ២០១៩នេះ ឥណទានសរុបទៅកាន់វិស័យនេះបានកើនដល់ ១៣,១ ទ្រីលានរៀល ឬស្មើប្រមាណ ៣,២ ប៊ីលានដុល្លារអាមេរិក ហើយទន្ទឹមនឹងនេះ អត្រាការប្រាក់ត្រូវបានកំណត់អតិប្បរមានៅត្រឹម ១៨% នៅខែមេសា ឆ្នាំ ២០១៧ ដើម្បីសម្រួលដល់លទ្ធភាពទទួលបានហិរញ្ញប្បទានរបស់ប្រជាកសិករយើង» ។
លោកជំទាវបន្តទៀតថា តាមទំហំឥណទានដ៏ធំនេះ បានជួយដល់អាជីវកម្ម ដល់គ្រួសារក្នុងវិស័យកសិកម្មសម្រាប់ផ្តល់លទ្ធភាពទទួលបានឥណទាន និងអាចវិនិយោគទ្រព្យសកម្មមានលទ្ធភាពខ្ពស់ និងបច្ចេកវិទ្យាថ្មីៗដែលមានសារសំខាន់ក្នុងការលើកកម្ពស់ផលិតភាពវិស័យកសិកម្ម ។ ទាំងនេះឆ្លុះបញ្ចាំងពីការចូលរួមចំណែកយ៉ាងធំពីវិស័យហិរញ្ញវត្ថុនៅក្នុងរយៈពេលមួយទសវត្សរ៍ចុងក្រោយនេះ ។
លោកជំទាវមានប្រសាសន៍បន្ថែមថា «ខ្ញុំជឿជាក់ថា កំណើនរឹងមាំរបស់វិស័យហិរញ្ញវត្ថុនឹងបន្តគាំំទ្រដល់កំណើនរបស់វិស័យកសិកម្ម ។ ដូច្នេះគ្រប់គ្រឹះស្ថានធនាគារ និងហិរញ្ញវត្ថុទាំងអស់បន្តបង្កើតផលិតផល និងសេវាហិរញ្ញវត្ថុថ្មីៗបន្ថែមទៀត ដើម្បីបម្រើដល់អាជីវកម្ម និងគ្រួសារនៅក្នុងវិស័យកសិកម្មឱ្យកាន់តែប្រសើរឡើង និងខ្លាំងក្លាឡើង» ៕ ដោយសហការ (កែសម្រួលដោយ ៖ បុប្ផា)
ចែករំលែកព័តមាននេះ