ខេត្តត្បូងឃ្មុំ ៖ ប្រជាពលរដ្ឋ ទាំងក្មេង ទាំងចាស់ ទាំងប្រុសស្រី មកពីគ្រប់ទិសទីជារៀងរាល់ថ្ងៃ បាននាំគ្នាមកកម្សាន្តលេងនៅសួនផ្កាឈូករ័ត្ន ស្ថិតនៅក្នុងឃុំជារោទ៍ទី១ ស្រុកត្បូងត្បូង…
ខេត្តត្បូងឃ្មុំ ៖ ប្រជាពលរដ្ឋ ទាំងក្មេង ទាំងចាស់ ទាំងប្រុសស្រី មកពីគ្រប់ទិសទីជារៀងរាល់ថ្ងៃ បាននាំគ្នាមកកម្សាន្តលេងនៅសួនផ្កាឈូករ័ត្ន ស្ថិតនៅក្នុងឃុំជារោទ៍ទី១ ស្រុកត្បូងត្បូង ជាពិសេសនៅចុងសប្តាហ៍តែម្តង គឺមានមនុស្សមកលេងយ៉ាងច្រើនកុះករ ជាមួយគ្នានោះក៏បានភ្លក់រសជាតិម្ហូបអាហារនៅទីនោះក្នុងតម្លៃសមរម្យផងដែរ ដែលបានបើកបំរើសេវារហូតមកដល់ពេលនេះជិត១ខែហើយ។
បើតាមព្រះតេជគុណសែម ភារុណ ព្រះជន្ម២៤ឆ្នាំ គង់នៅវត្តជ្រោយថ្ម ក្រុងកំពង់ចាម បានមានថេរដីកាឲ្យដឹងនៅល្ងាចថ្ងៃទី១៥ ខែធ្នូ នេះថា ក្រោយពីពេលទំនេរពីការសិក្សារៀនព្រះធម៌ ព្រះអង្គផ្គរ និងមិត្តភក្តិ១អង្គទៀត រួមទាំងកូនសិស្សជាច្រើននាក់ បាននាំគ្នានិមន្តមកលេងសួនផ្កាឈូករ័ត្ននេះ ដោយឃើញថា ផ្ការីកស្រស់ស្អាតពិតជាគួរឲ្យគយគន់ ចង់តែមកលេង។
ព្រះតេជគុណ មានថេរដីកាបន្តឲ្យដឹងទៀតថា នៅថ្ងៃអាទិត្យនេះ មានអារម្មណ៍ហាក់បីដូចជាលំបាកបន្តិច លុះពេលដែលនិមន្តមកលេងសួនផ្កាឈូករ័ត្ន ដោយឃើញផ្ការីកស្រស់ស្អាតព្រោងព្រាត រួមជាមួយនឹងផ្កាដទៃទៀត ធ្វើឲ្យទុក្ខកង្វល់ដែលមាននៅក្នុងខ្លួនទាំងប៉ុន្មាន ក៏រសាយបាត់អស់។
ព្រះអង្គធ្លាប់និមន្តមកលេងទីនេះបាន៥ទៅ៦លើកមកហើយ និងបានថតរូបផ្កាដែលរីកស្រស់ស្អាតបង្ហោះតាមបណ្ដាញសង្គមហ្វេសប៊ុក ដើម្បីបង្ហាញដល់ញាតិញោម និងមិត្តភក្កិនៅជិតឆ្ងាយឲ្យគេបានដឹង នឹងនាំគ្នាមកលេង។ ឲ្យតែរដូវផ្កាឈូករ័ត្នរីកមកដល់ ព្រះអង្គតែងតែនិមន្តទៅលេងកម្សាន្តរាល់ឆ្នាំ។
បើតាមអ្នកស្រី ណូ ប៉ូលីន វ័យ៤១ឆ្នាំ ម្ចាស់សួនផ្កាឈូករ័ត្ន បានប្រាប់ឲ្យដឹងថា ដំបូងឡើយ ប្តីរបស់គាត់បានដាំផ្កាឈូករ័ត្នមិនមានទំហំធំនោះទេ ដោយដាំនៅក្នុងបរិវេណផ្ទះជិតមាត់ទន្លេមេគង្គ និងមួយផ្នែកទៀតមានការចិញ្ចឹមឃ្មុំ ដើម្បីយកទឹកឃ្មុំលក់ ក្រោយមកមានមនុស្សបានមកលេងកាន់តែច្រើនឡើងៗ ដោយមិនអាចបំពេញតម្រូវការបាន។
អ្នកស្រីម្ចាស់សួនផ្កាឈូករ័ត្ន ប្រាប់បន្តថា គាត់ក៏មានគំនិតកែច្នៃ ដោយបានជួលដីចំការគេដើម្បីដាំផ្កាឈូករ័ត្នដែលមានទំហំ៥ហិកតាក្នុងឆ្នាំ២០១៨ និងនៅឆ្នាំ២០១៩ នេះ ក៏បានពង្រីកដល់៧ហិកតា ដោយមានដាំផ្កាឈូករ័ត្ន ផ្ការឈាមមាន់ ផ្កាស្បៃរឿង ដែលមើលទៅពិតជាស្រស់ស្អាតគួរឱ្យគយគន់ ។ ហើយរហូតមកដល់ពេលនេះ គាត់បានបើកបម្រើសេវាឱ្យមនុស្សមកកម្សាន្តលេងនៅសួនរបស់គាត់ មានរយៈពេលជិត១ខែហើយ។
លោកស្រីបន្តទៀតថា ជាមួយនោះដែរ ក៏បានបង្កើតខ្យូស ធ្វើពីឬស្សីមានជាច្រើន ព្រមទាំងបានដាក់លក់ដូរម្ហូបអាហារក្នុងតម្លៃសមរម្យ ហើយក៏សូមសំណូមពរដល់ភ្ញៀវជាតិ ដែលមកលេងកំសាន្ត សូមមេត្តាកុំបេះផ្កា ឬសរសេអក្សរនៅលើផ្កា ដើម្បីជាប្រយោជន៍ឲ្យផ្ការីកស្រស់បានយូរ។ ហើយក៏សូមរួមគ្នាសម្អាតបរិស្ថានឱ្យបានស្អាត ចៀសវាងការចោលសំរាមនៅក្នុងសួនផ្កាឈូករ័ត្ន។ សម្រាប់ថវិកាដែលបានមកពីការលក់ដូរ គាត់នឹងពង្រីកការសាងសង់ខ្យូសឲ្យបានកាន់តែច្រើនឡើងបន្ថែមទៀត ដើម្បីបម្រើសេវាដល់ភ្ញៀវដែលមកកម្សាន្តលេង។
សូមបញ្ជាក់ថា សួនផ្កាឈូករ័ត្ននេះ បានធ្វើឲ្យមានការចាប់អារម្មណ៍ពីថ្នាក់ដឹកនាំខេត្តក៏បានអញ្ជើញចុះមកលេង ហើយសម្ដេចគតិព្រឹទ្ធបណ្ឌិត ប៊ុន រ៉ានី ហ៊ុន សែន ក៏ធ្លាប់បានអញ្ជើញមកលេងនៅសួនផ្កាឈូករ័ត្ននេះផងដែរ ដោយទឹកមុខស្រស់ញញឹមនាពេលកន្លងមក៕ (កែសម្រួលដោយ ៖ បុប្ផា)
ចែករំលែកព័តមាននេះ