រាជធានីភ្នំពេញ ៖ ខណៈឆ្នាំ ២០២០ នឹងឈានចូលមកដល់នាពេលខ្លីខាងមុខនេះ អ្នកជំនាញវិស័យអចលនទ្រព្យកម្ពុជាបានប្រមើលមើលឃើញថា វិស័យមួយនេះនឹងនៅតែរឹងមាំ ទាំងដីធ្លី និងសំណង់ផ្សេងៗ ដែលនឹងធ្វើអោយវិស័យមួយនេះរួមចំណែកក្នុងការជំរុញកំណើនសេដ្ឋកិច្ចកម្ពុជាដ៏សំខាន់ ។
ក៏ប៉ុន្តែបើតាមធនាគារពិភពលោក (World Bank/WB) បានចេញរបាយការណ៍ថ្មីៗនេះណែនាំអោយមានការប្រុងប្រយ័ត្នចំពោះការផ្ដល់ឥណទានក្នុងវិស័យអចលនទ្រព្យ ព្រោះវាអាចនឹងមានសញ្ញាអវិជ្ជមានពាក់ព័ន្ធនឹងសេដ្ឋកិច្ចរបស់ចិនដែលអាចនឹងធ្លាក់ចុះខ្សោយដោយសារតែបញ្ហាជម្លោះពាណិជ្ជកម្មជាមួយមហាអំណាចសហរដ្ឋអាមេរិក ។
បើតាមលោកឧកញ៉ា ចេង ខេង អគ្គនាយកក្រុមហ៊ុនអចលនទ្រព្យ ស៊ីភីអិល បានមានប្រសាសន៍ថា រហូតមកដល់ពេលនេះ វិស័យនេះនៅតែមានស្ថានភាពល្អប្រសើរ ជាក់ស្ដែងការអភិវឌ្ឍន៍គម្រោងអគារនានា នៅតែមានដំណើរការជាធម្មតាហើយការទិញលក់លើដីធ្លី ក៏តែមានសកម្មភាព ។ តែយ៉ាងណាក៏ដោយក៏មានគម្រោងខ្លះមានបញ្ហាដែរ ឬក៏មិនមានសន្ទុះប៉ុន្មានដែរ តែសម្រាប់គម្រោងដែលល្អ គម្រោងដែលមានហាងឆេង ឬគម្រោងដែលមានទីតាំងល្អ «គឺនៅតែមានការទិញលក់ខ្លាំងដដែល » ។
លោកឧកញ៉ា បានបន្តថា សម្រាប់វិស័យអចលនទ្រព្យក្នុងឆ្នាំ២០២០ខាងមុខនេះ អ្នកអភិវឌ្ឍន៍ ត្រូវបង្កើនគុណភាព ការអភិវឌ្ឍន៍របស់ខ្លួនបន្ថែម ដូចជាការអភិវឌ្ឍទៅលើគុណភាពសំណង់ និងធ្វើទំនើបកម្មទៅលើអចលនទ្រព្យនោះ ដូចជាការកែលម្អ ទៅលើគម្រោងខុនដូដែលខ្លួននឹងអភិវឌ្ឍន៍ ដោយមានកន្លែងហាត់ប្រាណ មានអាងហែលទឹក ពីព្រោះអ្នកទិញនាពេលនេះ ខុសពីអ្នកទិញកាលពីប៉ុន្មានឆ្នាំមុន ។
សម្រាប់ឆ្នាំ ២០២០ខាងមុខនេះ លោកបានបន្ថែមថារូបលោកមើលឃើញថា វិស័យអលចនទ្រព្យ នៅតែល្អនៅតែអាចទទួលបានការវិនិយោគបន្ថែមពីវិនិយោគិនបរទេសពីព្រោះ ប្រទេសកម្ពុជា មានទីតាំងនៅចំណុចកណ្ដាលអាស៊ាន ដែលធ្វើអោយវិនិយោគិនបរទេសចង់មកបណ្ដាក់ទុន ហើយផលិតនិងទំនិញសម្រាប់នាំចេញទៅកាន់ទីផ្សារក្នុងតំបន់អាស៊ាន ផង និងទីផ្សារក្រៅតំបន់អាស៊ានផងដែរ ។
លោកឧកញ៉ា ចេង ខេង បានពោលបញ្ជាក់យ៉ាងដូច្នេះថា «ទីតាំងស្ថានដីប្រទេសកម្ពុជា មិនថាតែវិស័យសំណង់នោះទេ សូម្បីវិស័យសំណង់ក៏ហុចសក្ដានុពល ខ្ពស់សម្រាប់ការវិនិយោគផងដែរ ដូច្នេះទើបមានវិនិយោគិនពីចិន និងប្រទេសដទៃទៀតចូលមកបណ្ដាក់ទុនវិនិយោគ ក្នុងប្រទេសកម្ពុជា ហើយគ្រាន់តែវិស័យកសិកម្មនេះ អ្នកវិនិយោគក៏អាចធ្វើជាអ្នកមានផងដែរ » ។ លោកបានបន្ថែមថា ឆ្នាំ២០២០ខាងមុខ កម្ពុជាយើងនឹងអាចទាក់ទាញ វិនិយោគិនពីប្រទេសជាច្រើនទៀត ចូលមកបណ្ដាក់ទុន វិនិយោគ ដើម្បីបង្កើតការងារជូនពលរដ្ឋ លើកស្ទួយកំណើនសេដ្ឋកិច្ចជាតិ និងបង្កើនដល់ការវិនិយោគនិងការនាំចេញរបស់កម្ពុជាទៅកាន់បរទេសផងដែរ ។
បើតាមលោក ច្រឹក សុខនីមប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានមានប្រសាសន៍ថា បច្ចុប្បន្ននេះ វិស័យអចលនទ្រព្យ នៅតែដើរតួនាទីសំខាន់ក្នុងកំណើនសេដ្ឋកិច្ចជាតិនៃប្រទេសកម្ពុជា ដោយយើងក្រលេកឃើញ សំណង់អគារខ្ពស់ៗជាច្រើនបានរីកចម្រើន និងធ្វើអោយប្រទេសកម្ពុជា កាន់តែមានភាពស៊ីវិល័យ ហើយសម្រាប់ឆ្នាំ ២០២០ខាងមុខ វិស័យនេះ នៅតែអាចទាក់ទាញបាននូវវិនិយោគិនមកបណ្ដាក់ទុនវិនិយោគថែមទៀតក្នុងវិស័យនេះ ។
លោកឧកញ៉ា សៀ ឬទ្ធី វិនិយោគិនអចលនទ្រព្យដ៏លេចធ្លោមួយនៅកម្ពុជា បានមានប្រសាសន៍ថា ក្នុងវិនិយោគវិស័យអចនទ្រព្យ គួរតែងាកទៅរកវិស័យទេសចរណ៍ ដើម្បីបំពេញតម្រូវការ ក្នុងពេលបច្ចុប្បន្នព្រោះកម្ពុជាក៏កំពុងមានគោលនយោបាយទាក់ទាញ ភ្ញៀវទេសចរមកបន្ថែមទៀត និងកំពុងមានសក្ដានុពលខ្ពស់ផងដែរ ។ លោកឧកញ៉ាបន្តថា វិនិយោគិនគួរសម្លឹងទៅមើលតំបន់ណាដែលមានសក្ដានុពលក្នុងវិស័យទេសចរណ៍ ហើយដាក់ទុនវិនិយោគ លើវិស័យនេះ ដើម្បីត្រៀមទទួលទេសចរ មកពីបណ្ដាប្រទេសផ្សេងទៀតដូចជា អភិវឌ្ឍន៍សណ្ឋាគារផ្កាយ៥ បឹងហ្កាឡូជាដើម ៕ កែសម្រួលដោយ ៖ សុឃាក់
ចែករំលែកព័តមាននេះ