រាជធានីភ្នំពេញ ៖ ដើម្បីស្វែងរកទីផ្សារនិងជំរុញការលក់របស់ផលិតផលក្នុងស្រុក រាជរដ្ឋាភិបាលកម្ពុជា ដែលមានក្រសួងពាណិជ្ជកម្មជាសេនាធិការបានរៀបចំនូវព្រឹត្តិការណ៍មួយ គឺពិព័រណ៍ផលិតផលខ្មែរ និងទំនិញនាំចេញនាំចូល រយៈពេល៤ថ្ងៃ ពីថ្ងៃទី១៥ ដល់ថ្ងៃទី១៨ ធ្នូ២០១៩ នៅមជ្ឈមណ្ឌលពិព័រណ៍ និងសន្និបាតកោះពេជ្រ ។
ឆ្លងតាមកិច្ចសម្ភាសន៍ជាមួយអ្នកសារព័ត៌មានកោះសន្តិភាពកាលពីថ្ងៃទី ១៦ ខែធ្នូ ម្សិលមិញនេះ ពាណិជ្ជករជាច្រើនរួបដែលបានចូលរួមក្នុងព្រឹត្តិការណ៍នេះបានអះអាងថាពួកគាត់រំពឹងថា បន្ទាប់ពីបញ្ចប់នូវព្រឹត្តិការណ៍ពាណិជ្ជកម្មដ៏សំខាន់នេះ នឹងអាចស្វែងរកទីផ្សារបន្ថែមទៀត សម្រាប់ផលិត ផលរបស់ខ្លួនព្រមទាំងអាចជំរុញដល់ការនាំចេញរបស់ខ្លួនទៅកាន់ទីផ្សារអន្តរជាតិទៀតផង ។
បើតាមលោកស្រី ឡឹង ម៉ានុត ម្ចាស់សិប្បកម្មគ្រាប់ស្វាយចន្ទីចំការលើ ខេត្តកំពង់ចាម ដែលយកផលិតផលជាច្រើនមកដាក់តាំងបង្ហាញលក់និងស្វែងរកទីផ្សារ ក្នុងពិព័រណ៍នោះដែរ បានមានប្រសាសន៍ថា តាមរយៈពិព័រណ៍ដែលរៀបចំឡើងដោយរាជរដ្ឋាភិបាលនៅពេលនេះ នឹងផ្ដល់អត្ថប្រយោជន៍ជាច្រើនដល់ពាណិជ្ជករ និងអ្នកចូលរួមតាំងពិព័រណ៍នៅពេលនេះ ដោយសារតែព្រឹត្តិការណ៍នេះ មិនមែនជាព្រឹត្តិការណ៍លក់ផលិតផលប៉ុណ្ណោះទេ តែវាជាឱកាសសម្រាប់ពាណិជ្ជករក្នុងការស្វែងរកដៃគូរសម្រាប់ចែកចាយផលិតផល និងដៃគូរនាំចេញទៅកាន់ទីផ្សារអន្តរជាតិ ។
អ្នកស្រីបាននិយាយថា « ឆ្នាំមុនៗ យើងបានចូលរួមក្នុងព្រឹត្តិការណ៍នេះបីឆ្នាំមកហើយ ហើយក៏ទទួលបានផ្លែផ្កាជាបន្តបន្ទាប់ដែរ ក្រោយពីចូលរួមក្នុងព្រឹត្តិការណ៍ពិព័រណ៍នេះ ហើយសម្រាប់ឆ្នាំ២០១៩នេះដែរ ក៏នឹងរំពឹងថា ទទួលបានផលប្រយោជន៍ខ្លាំងដែរ ដោយសារតែមានអ្នកចាប់អារម្មណ៍ច្រើន ដើម្បីនាំចេញផង និងដើម្បីលក់បន្តនៅក្នុងស្រុកផង » ។ អ្នកស្រីបានបន្តថា សម្រាប់ផលិតផលកសិកម្មរបស់អ្នកស្រី នៅពេលនេះហាក់ទទួលបានការគាំទ្រពីទីផ្សារបរទេស ដូចជាប្រទេសកូរ៉េ ប្រទេសថៃ និងវៀតណាមជាដើម តែយ៉ាងណាក៏ដោយ ក៏ទីផ្សារស្រុកមានបរិមាណច្រើនជាងទីផ្សារបរទេសដែរ ដូច្នេះហើយទើបអ្នកស្រី ស្នើអោយពលរដ្ឋកម្ពុជាងាកមកគាំទ្រផលិតផលក្នុងស្រុកបន្ថែមទៀត ដើម្បីលើកកម្ពស់សេដ្ឋកិច្ច តាមរយៈការផ្ដល់ការងារដល់ពលរដ្ឋ ផ្ដល់ប្រាក់ចំណូលនិងកាត់បន្ថយការចំណាកស្រុកទៅកាន់ប្រទេសជិតខាងជាដើម ។
ចំណែកអ្នកស្រី ម៉េង បញ្ជិកា នាយកប្រតិបត្តិនៃក្រុមហ៊ុន Paradise Gardens មកពីខេត្តកំពត បានអោយដឹងផងដែរថា ការចូលរួម ក្នុងព្រឹត្តិការណ៍ ពិព័រណ៍នៅពេលនេះ រំពឹងថា នឹងអាចពង្រីកទីផ្សារផលិតផលកសិកម្មខេត្តកំពតបានបន្ថែមទៀត ដូចជាម្រេចកំពត ដែលទទួលបានការចុះបញ្ជីអំពីម៉ាកទំនិញសម្គាល់ភូមិសាស្ត្រ (GI) ពីទីផ្សារសហភាពអឺរ៉ុប ដូច្នេះ ពិព័រណ៍នេះនឹងក្លាយជាវេទិកាផ្សព្វផ្សាយផលិតផលខ្មែរទៅកាន់ដៃគូរវិនិយោគិនបរទេសជាច្រើនទៀតក្នុងប្រទេសកម្ពុជា ។ អ្នកស្រី បន្ថែមទៀថា ដោយសារតែផលិតផលកសិកម្មកម្ពុជា បច្ចុប្បន្ននេះ មិនទាន់មានទីផ្សារទូលំទូលាយនៅឡើយនោះ អ្នកស្រីស្នើសុំអោយរាជរដ្ឋាភិបាលតាមរយៈក្រសួងពាណិជ្ជកម្មជួយរកទីផ្សារបន្ថែមទៀត ដើម្បីនាំចេញផលិតផលកសិកម្មកម្ពុជាទៅកាន់ទីផ្សារបរទេសបន្ថែមទៀត ។
ដោយឡែកអ្នកនាំចូលផលិតផលផ្លែសាឡាក់ពីប្រទេសឥណ្ឌូនេស៊ី និងបានចូលរួមតាំងបង្ហាញផលិតផលខ្លួន ក្នុងពិព័រណ៍នោះលោកស្រី តូច ភក្ដី ក៏បាននិយាយថា វាជាព្រឹត្តិការណ៍ដ៏សំខាន់ ដើម្បីស្វែងរកដៃគូរចែកចាយទំនិញពីប្រទេសនៅក្នុងប្រទេសកម្ពុជា ។
អ្នកស្រីបានបញ្ជាក់ថា « ក្នុងនាមជាអ្នកនាំចូលមួយរូប យើងចង់អោយពលរដ្ឋខ្លួនទទួលបានទំនិញដែលមានគុណប្រយោជន៍សម្រាប់សុខភាព ដូច្នេះហើយទើបយើងសម្រេចនាំចូលផ្លែឈើដែលជំនួយសុខភាពមកកាន់ប្រទេសកម្ពុជា » ។ អ្នកស្រីបានបន្តថា តាមរយៈពិព័រណ៍ ដែលរៀបចំឡើងដោយក្រសួងពាណិជ្ជកម្មនាពេលនេះនឹងជំរុញការលក់របស់ខ្លួនក្នុងប្រទេសកម្ពុជា និងជួយបង្កើនទំហំពាណិជ្ជកម្មរវាងប្រទេសកម្ពុជានិងឥណ្ឌនេស៊ីបន្ថែមទៀត តាមរយៈការនាំចេញនាំចូល ។ បន្ទាប់ពីចប់ព្រឹត្តិការណ៍នេះ យើងរំពឹងថា នឹងមានអ្នកស្គាល់ផលិតផលដែលដាក់តាំងក្នុងពិព័រណ៍នេះកាន់តែច្រើន ហើយនឹងអាចអោយពួកយើងកាន់តែមានទីផ្សារបន្ថែមទៀត ។
សម្ដេចអគ្គមហាសេនាបតីតេជោ ហ៊ុន សែននាយករដ្ឋមន្ត្រីនៃប្រទេសកម្ពុជា ថ្លែងក្នុងពិធីពិព័រណ៍កាលពីថ្ងៃទី ១៥ ធ្នូ២០១៩នេះបានមានប្រសាសន៍ថា តាមរយៈព្រឹត្តិការណ៍នេះ ក៏ជាកាលានុវត្តភាពក្នុងការជួយកម្ពុជាលើការផ្សព្វផ្សាយអំពីសក្តានុពលវិនិយោគរបស់កម្ពុជា ជាឱកាសស្វែងរកទីផ្សារនាំចេញ ការផ្សព្វផ្សាយវប្បធម៌ និងពង្រឹងកិច្ចសហប្រតិបត្តិការលើគ្រប់វិស័យសេដ្ឋកិច្ច ពាណិជ្ជកម្ម និងវិស័យផ្សេងៗទៀតជាមួយបណ្ដាប្រទេសដៃគូនៅក្នុងតំបន់និងពិភពលោក ។
គួរកត់សំគាល់ថា រាជរដ្ឋាភិបាលកម្ពុជា បានដាក់ចេញនូវគោលនយោបាយបើកចំហរដល់ធុរជនទាំងអស់ ដើម្បីចូលមកវិនិយោគនៅកម្ពុជានឹងបង្កើតធុរកិច្ចនៅកម្ពុជា។ ការហូរចូលរបស់វិនិយោគទុនបរទេសមកកាន់កម្ពុជា បានធ្វើឲ្យកម្ពុជា ទទួលបាននូវធនធានហិរញ្ញវត្ថុ បច្ទេកវិទ្យា ជំនាញ ចំណេះដឹងនៃការប្រើប្រាស់បច្ចេកវិទ្យាទំនើប បទពិសោធន៍ សហគ្រិន និងការបង្កើតការងារថ្មីសម្រាប់ប្រជាជន ការពង្រីកផលិតកម្មក្នុងស្រុកកាន់តែទូលំទូលាយថែមទៀត ៕
ក្រុមអ្នកស្រាវជ្រាវបានរកឃើញថាអ្នកដែលមានប្រាក់ខែឡើងខ្ពស់ស្ទើរតែ ១៥ ភាគរយទំនងជានឹងមានជំងឺខ្សោយបេះដូងក្នុងរយៈពេល ២៥ ឆ្នាំខាងមុខ៕
ចែករំលែកព័តមាននេះ