ខេត្តប៉ៃលិន ៖ សំឡេងទ្រហោយំដ៏សែនក្តុកក្តួល និងគួរឱ្យអាណិតអាសូរពន់ពេក ខណៈមើលឃើញស្ទើរស្រក់ទឹកភ្នែក ពេលបានឃើញអតីតយោធាពិការជើងម្ខាង និងប្រពន្ធ បានលើកដៃសំពះអង្វរដល់អាជ្ញាធរខេត្ត ជាពិសេសសម្តេចតេជោ ហ៊ុន…
ខេត្តប៉ៃលិន ៖ សំឡេងទ្រហោយំដ៏សែនក្តុកក្តួល និងគួរឱ្យអាណិតអាសូរពន់ពេក ខណៈមើលឃើញស្ទើរស្រក់ទឹកភ្នែក ពេលបានឃើញអតីតយោធាពិការជើងម្ខាង និងប្រពន្ធ បានលើកដៃសំពះអង្វរដល់អាជ្ញាធរខេត្ត ជាពិសេសសម្តេចតេជោ ហ៊ុន សែន ឱ្យជួយអន្តរាគមន៍ ដោយចោទលោកមេឃុំស្ទឹងកាច់ថា មិនព្រមចុះហត្ថលេខា លើឯកសារដីរបស់ខ្លួន ដើម្បីឱ្យមន្ត្រីជំនាញសុរិយោដីធ្វើប្លង់ជូននោះទេ ។ បែរជាយកទៅឱ្យខាងប៉ុស្តិ៍រដ្ឋបាលវិញ ខណ:ពួកគាត់គ្មានអ្វីទីពឹងក្រៅពីដីដែលមេអង្គភាពបានចែកជូនតាំងយូរមកហើយ ក៏មានសាក្សីដឹងឮថា ជាកម្មសិទ្ធិពួកគាត់ប្រាកដមែន ។
បើតាមការអះអាងរបស់បុរស ឈ្មោះ ចាន់ ព្រៀន អាយុ៥១ឆ្នាំ អតីតយោធាពិការជើងឆ្វេង ប្រពន្ធ ឈ្មោះ យាង បូ អាយុ៤៥ឆ្នាំ បានលើកដៃសំពះ និយាយរៀបរាប់ត្អូញត្អែរទាំងទឹកភ្នែកហូររហាម ពីរនាក់ប្តីប្រពន្ធ នៅលើទីតាំងដីដែលពួកគេអះអាងកាលពីព្រឹកថ្ងៃទី១៦ ធ្នូ ២០១៩ ថា ជាកម្មសិទ្ធិរបស់ខ្លួន នៅក្រោយប៉ុស្តិ៍នគរបាលរដ្ឋបាលឃុំស្ទឹងកាច់ ឱ្យដឹងថា ពួកគាត់ជាអតីតទាហានខ្មែរក្រហម លុះក្រោយពីសមាហរណកម្ម ចប់សង្គ្រាម ពួកគាត់ក៏បន្តរស់នៅក្នុងភូមិស្ទឹងកាច់ ឃុំស្ទឹងកាច់ ស្រុកសាលាក្រៅ រហូតមកដល់ពេលនេះ មានកូនចំនួន៦នាក់ ក្នុងបន្ទុក ប្រុស៣នាក់ ស្រី៣នាក់ ។
ពួកគាត់បន្តទៀតថា ដីដែលមានបញ្ហាខាងលើ ត្រូវបានមេអង្គភាព ចែកជូនតាំងពីឆ្នាំ១៩៩៣មកម្ល៉េះ ដោយមានទទឹងប្រវែង២៩ម៉ែត្រ បណ្តោយប្រវែង៣៣ម៉ែត្រ ខាងជើងទល់នឹងផ្លូវ ខាងត្បូងទល់នឹងប៉ុស្តិ៍នគរបាលរដ្ឋបាល ខាងកើតទល់នឹងសាលាឃុំស្ទឹងកាច់ និងខាងលិចទល់នឹងវត្តអូរបេង ។ ប៉ុន្តែ អ្វីដែលធ្វើឱ្យគាត់ហ៊ានក្រោកឈរតវ៉ាបែបនេះ គឺដោយសារតែលោកមេឃុំស្ទឹងកាច់ បានប្រើអំណាចរបស់ខ្លួន រំលោភយកដីកម្មសិទ្ធិរបស់ពួកគាត់ទៅឱ្យខាងប៉ុស្តិ៍រដ្ឋបាល ដើម្បីធ្វើប្លង់ជាកម្មសិទ្ធិ ខណៈដីប៉ុស្តិ៍ គឺពួកគាត់ជាអ្នកសម្បទានជូន ព្រោះនឹកឃើញថា បើមានសាលាឃុំ និងប៉ុស្តិ៍នគរបាលនៅក្បែរផ្ទះ ពិតជាសប្បាយចិត្តកក់ក្តៅ តែអ្វីៗបែរជាផ្ទុយស្រឡះអស់ទៅវិញ ។
ពួកគាត់បញ្ជាក់ថា ហើយអ្វីដែលគួរឱ្យហួសចិត្តនោះគឺកាលពីពេលថ្មីៗ ខណៈក្រុមការងារមន្ត្រីជំនាញសុរិយោដី ចុះទៅវាស់វែងដីធ្លី ដើម្បីធ្វើប្លង់ជា ប្រព័ន្ធជូនប្រជាពលរដ្ឋក្នុងភូមិ ពួកគាត់បានសុំឱ្យខាងមេភូមិ និងមេប៉ុស្តិ៍រដ្ឋបាល ដើម្បីផ្តិតមេដៃព្រំប្រទល់ដីរបស់ខ្លួន បែរជាលោកមេឃុំស្តីបន្ទោស មិនឱ្យស៊ីញ៉េ មិនឱ្យដឹងឮ ព្រោះចង់យកដីរបស់ពួកគាត់ ។
ពួកគាត់ទាំងពីរក៏សូមលើកដៃអង្វរឱ្យលោកផាន់ ចាន់ធុល អភិបាលខេត្តប៉ៃលិន ឯកឧត្តម អុី ឈាន រដ្ឋលេខាធិការក្រសួងការពារជាតិ លោកជំទាវ បាន ស្រីមុំ អ្នកតំណាងរាស្ត្រមណ្ឌលប៉ៃលិន មេត្តាចុះទៅត្រួតពិនិត្យ និងជួយអន្តរាគមន៍ ដើម្បីឱ្យពួកគាត់មានប្លង់កាន់កាប់ផងដែរ ។
បើតាមប្រភពពីលោក ជា ពៅ ជាមន្ត្រីយោធាប្រចាំការនៅខេត្តប៉ៃលិន បានធ្វើជាសាក្សីឱ្យដឹងថា ដីដែលមានបញ្ហានោះ លោកពិតជាបានដឹងឮរឿងនេះដែរ ថាមេចែកឱ្យទៅលោក ចាន់ ព្រៀន តែខាងលោកមិនបានចុះវាស់វែងនោះទេ ។ លោកបន្តទៀតថា ដីនោះ ក្រៅពីលោក ចាន់ ព្រៀន ត្រូវគេលក់អស់ហើយ ដោយសល់តែដីគាត់១គ្រួសារប៉ុណ្ណោះ ។ ការដែលចែកដីឱ្យនេះ គឺមានការចែកជាដីឡូតិ៍ភូមិ និងដីចម្ការ ដែលជាដីមានបញ្ហានៅកន្ទុយខាងក្រោយ ហើយតាមពិតទៅមានការបោះបង្គោលរហូតមកដ ល់សព្វថ្ងៃនេះដែរ លុះក្រោយមកឮថាខាងមេឃុំប្រមូលយក ខាងលោកក៏មិនដឹងដែរ ។
បើតាមលោក តុប រិន ហៅខ្យងសាំង អាយុ៥៧ឆ្នាំ ជាអតីតទាហានខ្មែរក្រហម រស់នៅភូមិទំនប់ ឃុំស្ទឹងត្រង់ ស្រុកសាលាក្រៅ បានឱ្យដឹងថា ដីមានបញ្ហានេះ គឺជាដីរបស់អង្គភាពចែកឱ្យចំណែកសាលាឃុំ និងប៉ុស្តិ៍រដ្ឋបាល ទើបតែកើតក្រោយប៉ុណ្ណោះ ហើយដីខាងលើនេះ ត្រូវបានមេទាហានចែកឱ្យលោក ចាន់ ព្រៀន ប្រាកដមែន ។ លោកបន្តទៀតថា សូមឱ្យរកយុត្តិធម៌ជូនជនរងគ្រោះផង ព្រោះតែមានបញ្ហាកើតឡើង ទើបគេមិនធ្វើប្លង់ជូនពួកគាត់ ៕ (កែសម្រួលដោយ ៖ ធីតា)
ចែករំលែកព័តមាននេះ