រាជធានីភ្នំពេញ ៖ រដ្ឋបាលរាជធានីភ្នំពេញបានប្រកាសជួសជុលជាន់ឡៅតឿផ្សារអូរឫស្សីឡើងវិញជាបន្ទាន់ ដើម្បីការពារសុវត្ថិភាពអាជីវករនិងប្រជាពលរដ្ឋ។ យោងតាមសេចក្តីជូនដំណឹងរបស់រដ្ឋបាលរាជធានីភ្នំពេញដែលចុះហត្ថលេខាដោយ លោកឃួង ស្រេង អភិបាលរាជធានីភ្នំពេញ នៅថ្ងៃទី១៧ ខែធ្នូនេះ…
រាជធានីភ្នំពេញ ៖ រដ្ឋបាលរាជធានីភ្នំពេញបានប្រកាសជួសជុលជាន់ឡៅតឿផ្សារអូរឫស្សីឡើងវិញជាបន្ទាន់ ដើម្បីការពារសុវត្ថិភាពអាជីវករនិងប្រជាពលរដ្ឋ។
យោងតាមសេចក្តីជូនដំណឹងរបស់រដ្ឋបាលរាជធានីភ្នំពេញដែលចុះហត្ថលេខាដោយ លោកឃួង ស្រេង អភិបាលរាជធានីភ្នំពេញ នៅថ្ងៃទី១៧ ខែធ្នូនេះ បានជម្រាបជូនដល់សាធារណជន និងបងប្អូនអាជីវករនៅក្នុងផ្សារអូរឫស្សីទាំងអស់ឱ្យបានជ្រាបថា បច្ចុប្បន្នសំណង់អគារផ្សារអូរប្ញស្សីមានលក្ខណៈរឹងមាំនិងមានគុណភាពប្រើប្រាស់យូរអង្វែង ដោយឡែកតែសំណង់ឡៅតឿប៉ុណ្ណោះដែលមានសភាពបែកប្រេះស្រាំដោយអន្លើ។
រដ្ឋបាលរាជធានីភ្នំពេញបានអះអាងថា ប្រសិនបើសំណង់ឡៅតឿននេះទុកយូរអាចបង្កគ្រោះថ្នាក់ដល់ប្រជាពលរដ្ឋ ជាពិសេសអាជីវករលក់ដូរក្នុងផ្សារ អតិថិជន និងខូចខាតទ្រព្យសម្បត្តិរបស់បងប្អូនប្រជាពលរដ្ឋ។
សេចក្តីជូនដំណឹងរបស់សាលារាជធានីភ្នំពេញបានបញ្ជាក់ថា ដើម្បីរក្សាសន្តិសុខ សុវត្ថិភាព និងចៀសវាងរាល់ហានិភ័យដែលកើតមានឡើងជាយថាហេតុ រដ្ឋបាលរាជធានីភ្នំពេញ ស្នើឱ្យបងប្អូនអាជីវករដែលកំពុងលក់ដូរនៅលើឡៅតឿ ក្រោមឡៅតឿ និងជុំវិញបរិវេណទីតាំងនេះទាំងអស់ ផ្ទេរការលក់ដូរជាបណ្តោះអាសន្នក្នុងរយៈពេលខ្លី ទៅទីតាំងថ្មីនៅក្រៅផ្សារតាមកាលបរិច្ឆេទដែលបានគ្រោងទុក ដើម្បីបង្កលក្ខណៈឱ្យក្រុមការងារបច្ចេកទេសសំណង់ ធ្វើការជួសជុលឡើងវិញជាបន្ទាន់ និងឆាប់រួចរាល់។
សេចក្តីជូនដំណឹងបានសន្យាថា នៅពេលជួសជុលរួចរាល់ នឹងបើកឲ្យអាជីវករចូលមកលក់ដូរនៅកន្លែងដើមវិញហើយធានា បានសុវត្ថិភាព និងសោភ័ណភាព។ រដ្ឋបាលរាជធានីភ្នំពេញមានក្តីសង្ឃឹមទុកជាមុនថា សាធារណជន និងបងប្អូនអាជីវករ នៅក្នុងផ្សារអូរឫស្សីទាំងអស់ បានយល់ពីស្ថានភាពជាក់ស្តែងនេះ និងសហការចូលរួមអនុវត្ត សេចក្តីជូនដំណឹងនេះ ឱ្យមានប្រសិទ្ធភាពខ្ពស់ ៕ (កែសម្រួលដោយ ៖ ធីតា)
ចែករំលែកព័តមាននេះ