រាជធានីភ្នំពេញ ៖ រដ្ឋមន្ត្រីក្រសួងទេសចរណ៍លោក ថោង ខុន បានថ្លែងលើកទឹកចិត្តចំពោះម្ចាស់មូលដ្ឋានអាជីវកម្មទេសចរណ៍ទាំងឡាយ ណាដែលមានឆន្ទៈចូលរួមលើកស្ទួយវិស័យទេសចរណ៍ និងគោលដៅទេសចរណ៍ជាតិ ប៉ុន្តែក៏ព្រមានចាត់វិធានការយ៉ាងដាច់ខាតចំពោះមូលដ្ឋាន អាជីវកម្មណាដែលបោកប្រាស់ភ្ញៀវ ដើម្បីតែផលចំណេញមួយពេល ហើយប៉ះពាល់ដល់គោលដៅទេសចរណ៍នៅកម្ពុជា ។
លោករដ្ឋមន្ត្រីបានថ្លែងបែបនេះ នៅក្នុងពិធីបើកសម្ពោធហាងលក់គ្រឿងអលង្ការ ច័ន្ទ គឹមទី ស្ថិតនៅតាមមហាវិថីម៉ៅសេទុងខាងលិចស្ដុបបូកគោ កាលពីថ្ងៃទី១៥ ខែធ្នូ ឆ្នាំ២០១៩ ។ ទន្ទឹមនេះ លោករដ្ឋមន្ត្រី ថោង ខុន ក៏បានបង្ហាញនូវសុទិដ្ឋិនិយមខ្ពស់ចំពោះហាងលក់គ្រឿងអលង្ការ ច័ន្ទ គឹមទី ដែលអាចបម្រើឱ្យគ្រប់សេចក្ដីត្រូវការរបស់ភ្ញៀវជាតិ-អន្តរជាតិ និងចូលរួមលើកស្ទួយវិស័យទេសចរណ៍ជាតិផងដែរ ។
លោករដ្ឋមន្ត្រីបានលើកឡើងថា ក្នុងចំណោមភ្ញៀវទេសចរសរុបនៅលើពិភពលោកក៏ដូចជានៅកម្ពុជា មានប្រមាណ២៥%តែងតែចូលចិត្តទិញគ្រឿងអលង្ការ វត្ថុអនុស្សាវរីយ៍ និងគ្រឿងចម្លាក់សិល្បៈផ្សេងទៀត ។ លោកបានដាស់តឿនអាជីវកម្មទាំងឡាយដែលប្រតិបត្តិការលើផ្នែកនេះ ត្រូវពង្រឹងគុណភាពសេវាកម្ម ធានាគុណភាព បដិសណ្ឋារកិច្ច ពិសេសមិនត្រូវបោកប្រាស់ភ្ញៀវជាដាច់ខាត ។
លោករដ្ឋមន្ត្រី ថោង ខុន បានថ្លែងបញ្ជាក់ថា នៅពេលមកទស្សនាកម្សាន្តនៅប្រទេសកម្ពុជា ពិសេសនៅគោលដៅសៀមរាប-អង្គរ ភ្ញៀវទេសចរអឺរ៉ុបចូលចិត្តទិញវត្ថុអនុស្សាវរីយ៍ និងគ្រឿងចម្លាក់របស់ខ្មែរ ចំណែកភ្ញៀវទេសចរអាស៊ី ពិសេសទេសចរចិនចូលចិត្តទិញគ្រឿងអលង្ការដូចជា មាស ពេជ្រ ត្បូងមានតម្លៃ និងគ្រឿងអលង្ការដទៃទៀត ។ នេះជាសក្ដានុពលមួយ ដែលកម្ពុជាត្រូវបំពេញតម្រូវការជូនភ្ញៀវទេសចរទាំងនោះ និងត្រូវធានាគុណភាពចំពោះផលិតផលរបស់ខ្លួន ដាច់ខាតមិនត្រូវបោកប្រាស់ភ្ញៀវ ឬកាត់ថ្លៃហួសហេតុខុសពីតម្លៃពិតនោះឡើយ ។
លោករដ្ឋមន្ត្រីថ្លែងទៀតថា ក្រៅពីផ្ដល់នូវតម្រូវការសម្បូរបែបបជូនភ្ញៀវនិងអតិថិជន ម្ចាស់អាជីវកម្មក៏ត្រូវគិតគូរចំពោះបុគ្គលិកលើការផ្ដល់ភាពកក់ក្ដៅ សេវាកម្មល្អ សុវត្ថិភាព និងបដិសណ្ឋារកិច្ចជូនភ្ញៀវ ព្រោះចំណុចនេះក៏ជាការចូលរួមផ្សព្វផ្សាយកិត្តិនាមល្អរបស់កម្ពុជាទៅកាន់ភ្ញៀវទេសចរបរទេស និងអតិថិជនផ្សេងទៀតរបស់ហាងផងដែរ ដែលស្របទៅនឹងយុទ្ធនាការ «កម្ពុជា ព្រះរាជាណាចក្រអច្ឆរិយៈ ផ្ដល់ភាពកក់ក្ដៅ» ។
ជាមួយគ្នានេះ លោករដ្ឋមន្ត្រី ថោង ខុន ក៏បាន លើកឡើងពីការអនុវត្តច្បាប់យ៉ាងតឹងរឹុងចំពោះ មូលដ្ឋានអាជីវកម្មទេសចរណ៍ទាំងឡាយណាដែលលក់ផលិតផល ឬទំនិញអន់គុណភាព ឬក្លែង ក្លាយជូនភ្ញៀវ ។ លោករដ្ឋមន្ត្រីបានព្រមានថាច្បាប់ថ្មីដែលទើបនឹងដាក់ឱ្យអនុវត្តនោះ អាចឈានដល់ការបិទអាជីវកម្មទាំងមូលថែមទៀតផង ។
លោកស្រី ច័ន្ទ គឹមទី ស្ថាបនិកនិងជាម្ចាស់ហាងលក់គ្រឿងអលង្ការខាងលើ បានឱ្យដឹងថា លោកស្រីធ្លាប់មានប្រវត្តិជាជាងទង ហើយការបើកអាជីវកម្មលក់គ្រឿងអលង្ការនេះ ក៏ដើម្បីចូលរួមលើកស្ទួយកិត្យានុភាពជាតិលើវិស័យគ្រឿងអលង្ការ ក៏ដូចជាចូលរួមលើកស្ទួយដល់វិស័យទេសចរណ៍ជាតិផងដែរ ។ លោកស្រីបានប្ដេជ្ញាពីការធានាគុណភាពគ្រឿងអលង្ការ ការផ្ដល់ជូននូវភាពសម្បូរបែប កាយកចិត្តទុកដាក់លើសេវាកម្ម សុវត្ថិភាព និងបដិសណ្ឋារកិច្ចជូន ភ្ញៀវ និងអតិថិជនជាដើម ពិសេសហាងគ្រឿងអលង្ការថ្មីនេះ ក៏មានលក់គ្រឿងអលង្ការដែលរចនាតាមសិល្បៈខ្មែរបុរាណផងដែរ ៕
ចែករំលែកព័តមាននេះ