តាម​ប្រភព​ព័ត៌មាន Mirror បានឱ្យ​ដឹង​ថា នាយក UFC លោក Dana White បាន​បញ្ជាក់​ថា លោក និង Floyd Mayweather នឹង​ព្យាយាម​ធ្វើការ​ជាមួយ​គ្នា នៅ​ឆ្នាំ​២០២០ ហើយ​បាន​និយាយ​ថា ដំណើរការ​នៃ​ការ​ប្រកួត​នឹង​ចាប់ផ្តើម​នៅ​ពេល​រដូវ​ស្លឹកឈើ​ជ្រុះ​។

Mayweather បាន​ចូល​និវត្តន៍​នៅ​ឆ្នាំ ២០១៧ ជាមួយនឹង​កំណត់​ត្រា​មិន​ស្គាល់​ចាញ់​ក្នុង​ការ​ប្រយុទ្ធ​ចំនួន ៥០​ដង ប៉ុន្តែ​ថ្មី​ៗ​នេះ​គាត់​បាន​បង្ហោះ​រូបភាព​របស់​គាត់​នៅ​លើ​បណ្តាញ​សង្គម Instagram រួម​ជាមួយនឹង​ការ​សរសេរ​ថា «ចាក​ចេញពី​ការ​ចូល​និវត្តន៍​នៅ​ឆ្នាំ​២០២០»​។

បន្ទាប់​មក​គាត់​បាន​បន្ថែម​ទៀត​ថា​៖«​លោក Dana White និង ខ្ញុំ បាន​ធ្វើការ​ជាមួយ​គ្នា​ម្តងទៀត ដើម្បី​នាំ​យក​ព្រឹត្តិការណ៍​ដ៏​អស្ចារ្យ​មួយ​ផ្សេង​ទៀត​នៅ​ឆ្នាំ ២០២០»​។ គាត់​បាន​សរសេរ​បែប​នេះ​ភ្ជាប់​ជាមួយនឹង​រូបភាព​គាត់ និង លោក White អង្គុយ​មើល​បាល់បោះ​ជាមួយ​គ្នា​។

លោក White បាន​និយាយ​ថា​៖ «Floyd និង ខ្ញុំ ទាំង​ពីរ​នាក់​ជឿជាក់​ថា យើង​ជួយ​បំពេញ​គ្នា​ទៅ​វិញ​ទៅ​មក​។ យើង​នឹង​មើល​ថា តើ​អ្វី​ៗ​ចាប់ផ្តើម​លេង​យ៉ាងដូចម្តេច ហើយ​វា​ប្រហែលជា​នៅ​រដូវ​ស្លឹកឈើ​ជ្រុះ​ឆ្នាំ​២០២០ ហើយ​យើង​ប្រហែលជា​នឹង​ចាត់ការ​លើ​រឿង​នេះ​ជាមួយ​គ្នា​»​។

គេ​មិន​ទាន់​ដឹង​ច្បាស់​ពី​អ្វី​ដែល​ពួក​គេ​បាន​គ្រោងទុក​នៅឡើយ​ទេ ប៉ុន្តែ​ការ​ប្រកួត​ម្តងទៀត​ដែល​មានឈ្មោះ​ថា​«Fight of the Century» ជាមួយ Manny Pacquiao គឺជា​ជម្រើស​មួយ​ដែល​ត្រូវ​បាន​គេ​គិត​ថា​នឹង​កើត​មាន​ឡើង ៕