សហរដ្ឋអាមេរិក ៖ ក្រុមហ៊ុនផលិតយន្តហោះអាមេរិកប៊ូអ៊ីង បានសម្រេចកាលពីថ្ងៃទី១៦ធ្នូ ផ្អាកចាប់ពីខែមករាទៅផលិតកម្មយន្តហោះដែលធ្លាប់លក់ដាច់ជាងគេបំផុតរបស់ខ្លួនធុនប៊ូអ៊ីង737MAX។
ក្រុមហ៊ុននោះនិយាយថា បានវាយតម្លៃជាបន្តបន្ទាប់លើបណ្ដាផែនការផលិតកម្មរបស់ខ្លួន ក្នុងករណីការហាមមិនឲ្យហោះហើរនៃយន្តហោះធុននេះអូសបន្លាយពេលយូរ។ យន្តហោះធុននេះត្រូវចតចោលស្ងៀម ចាប់តាំងពីពាក់កណ្ដាលខែមីនាមក ហើយសម្រាប់ពេលនេះ នៅពុំទាន់មានកាលបរិច្ឆេទកំណត់ណាមួយសម្រាប់ការហោះហើរឡើងវិញនៅឡើយ។
ក្នុងសេចក្ដីប្រកាសមួយក្រុមហ៊ុនប៊ូអ៊ីងគូសបញ្ជាក់ថា ក្រោយការវាយតម្លៃជាបន្តបន្ទាប់ យើងបានសម្រេចផ្ដល់លទ្ធភាពដល់ការប្រគល់បណ្ដាយន្តហោះដែលស្តុកទុក ហើយផ្អាកជាបណ្ដោះអាសន្នផលិតកម្មយន្តហោះប៊ុអ៊ីង737ចាប់ពីខែខាងមុខនេះទៅ។
ក្រុមហ៊ុនប៊ូអ៊ីងពុំបាននិយាយថាតើការបញ្ឈប់ផលិតកម្មនេះ ចំណាយពេលយូរប៉ុណ្ណា និងបញ្ជាក់ថា ខ្លួននឹងលាតត្រដាងពីបណ្ដាផលប៉ះពាល់ខាងហិរញ្ញវត្ថុ នាឱកាសចេញផ្សាយបណ្ដាលទ្ធផលប្រចាំឆ្នាំរបស់ខ្លួន នាដំណាច់ខែមករាខាងមុខនេះ។
ក្រុមហ៊ុនអះអាងម្យ៉ាងទៀតថា ក្នុងដំណាក់កាលនេះខ្លួនមិនគ្រោងលុបបំបាត់ចោលការងារនៅឡើយ។ បណ្ដានិយោជិតនឹងបែងចែកទៅកាន់ផ្នែកឯទៀតៗ៕ (កែសម្រួលដោយ ៖ បុប្ផា)
ចែករំលែកព័តមាននេះ