ខេត្តមណ្ឌលគិរី ៖ បុរសម្នាក់ត្រូវបានគេបញ្ជូនភ្លាមៗទៅសង្គ្រោះបន្ទាន់នៅមន្ទីរពេទ្យ ក្រោយកើតអាការៈប្រកាច់បែកពពុះមាត់ និងព្រុសស្រែកលូដូចសត្វឆ្កែ ដែលសង្ស័យបណ្តាលមកពីឆ្លងជំងឺឆ្កែឆ្គួត ហេតុការណ៍នេះបានកើតឡើងនៅភូមិពូហ្សាម ឃុំសែនមនោរម្យ ស្រុកអូររាំង កាលពីល្ងាចថ្ងៃទី១៦…
ខេត្តមណ្ឌលគិរី ៖ បុរសម្នាក់ត្រូវបានគេបញ្ជូនភ្លាមៗទៅសង្គ្រោះបន្ទាន់នៅមន្ទីរពេទ្យ ក្រោយកើតអាការៈប្រកាច់បែកពពុះមាត់ និងព្រុសស្រែកលូដូចសត្វឆ្កែ ដែលសង្ស័យបណ្តាលមកពីឆ្លងជំងឺឆ្កែឆ្គួត ហេតុការណ៍នេះបានកើតឡើងនៅភូមិពូហ្សាម ឃុំសែនមនោរម្យ ស្រុកអូររាំង កាលពីល្ងាចថ្ងៃទី១៦ ធ្នូ ២០១៩ ។ អ្នកជំងឺមានឈ្មោះ យាន យ៉ុន អាយុ៣៥ឆ្នាំ មានប្រពន្ធនិងកូនរស់នៅខេត្តត្បូងឃ្មុំបានទៅធ្វើការជាជាងដែកនៅស្រុកអូររាំងតែម្នាក់ឯង អស់រយៈពេល២ខែមកហើយ មុនកើតមានជំងឺនេះ ។
សេចក្តីរាយការណ៍ពីសាច់ញាតិអ្នកជំងឺបានឲ្យដឹងនៅព្រឹកថ្ងៃទី១៧ ធ្នូ នេះថា មុនអ្នកជំងឺមានសភាពស្រែកលូដូចសត្វឆ្កែ កាលពីបីបួនថ្ងៃមុន គឺអ្នកជំងឺធ្លាប់ត្រូវកូនឆ្កែខាំកាលពី៣-៤ថ្ងៃមុន តែមិនដឹងថា ខាំត្រូវកន្លែងណានោះទេ ។ ហើយកាលពីម្សិលមិញ(ថ្ងៃទី១៦)គាត់បានផឹកស្រាក្លែមសាច់ឆ្កែជាមួយមិត្តភក្តិ ស្រាប់តែកើតមានអាការៈប្រកាច់ភ្លាមៗតែម្តង។
ប្រភពបានបន្តថា ដោយឃើញពីស្ថានភាពរបស់អ្នកជំងឺកាន់តែធ្ងន់ធ្ងរ សាច់ញាតិបានបញ្ជូនគាត់ទៅមន្ទីរពេទ្យបង្អែកខេត្តមណ្ឌលគិរី ប៉ុន្តែដោយសភាពអ្នកជំងឺពិបាកក្នុងការសង្គ្រោះ គ្រូពេទ្យបានឲ្យបញ្ជូនទៅរាជធានីភ្នំពេញ។ តែជាការសោកស្តាយពេទ្យប្រាប់ទៀតថា រថយន្តរបស់មន្ទីរពេទ្យអត់នៅកន្លែង ជាប់រវល់អស់ហើយ។ដូច្នេះ សាច់ញាតិរបស់អ្នកជំងឺ ក៏បានស្វែងរកការជួយសង្គ្រោះពីមន្ទីររម្រាកព្យាបាលឯកជន សុខបញ្ញា ពេទ្យក៏បានប្រាប់ថា អត់មានតៃកុងទេ អ៊ីចឹងហើយក៏បង្ហួសទៅពេទ្យមួយកន្លែងទៀត នៅជិតរង្វង់មូលគោព្រៃឈ្មោះ មន្ទីរសម្រាកព្យាបាលមណ្ឌលគិរី ។
ពេលទៅដល់ភ្លាមគេពិនិត្យអាការៈហើយថា មានតែយកទៅភ្នំពេញទេ ដោយយកតម្លៃឈ្នួលរថយន្ត៣៥០ដុល្លា គ្រាន់ឮតម្លៃភ្លាមសាច់ញាតិអ្នកជំងឺបានសុំឲ្យបញ្ចុះថ្លៃបន្តិច ប៉ុន្តែក្រុមពេទ្យឯកជននោះបដិ
សេធ ដោយអះអាងថា នេះជាគោលការណ៍មេគេដាក់មកចឹង ។
ក្រោយពីសុំតម្លៃមិនព្រមចុះ ក្រុមគ្រួសារអ្នកជំងឺក៏យល់ព្រមត្រឹមតម្លៃ៣៥០ដុល្លាតាមការទាមទាររបស់មន្ទីរពេទ្យនោះ ប៉ុន្តែជាការហួសចិត្ត ស្រាប់តែគេតបវិញថា តៃកុងរថយន្តមិនទំនេរ ទោះក្រុមគ្រួសារអ្នកជំងឺហ៊ានឡើងថ្លៃដល់៤០០ដុល្លាក៏ដោយ។
គិតត្រឹមព្រឹកថ្ងៃទី១៧ ធ្នូ អ្នកជំងឺខាងលើ ត្រូវបាននាំយកទៅដល់លំនៅឋាននាខេត្តត្បូងឃ្មុំវិញ តាមរយៈរថយន្តឈ្នួល ដោយមិនបានបញ្ជូនទៅពេទ្យនៅរាជធានីភ្នំពេញទេ ។ ចំណែកស្ថានភាពអ្នកជំងឺត្រូវបានគ្រួសារឲ្យដឹងថា ម្តងធ្វើទុក្ខខ្លាំង ម្តងខ្សោយ បន្ទាប់ពីបានផឹកថ្នាំខ្មែរ ។
លោក ប៊ុន សួ ប្រធានមន្ទីរសុខាភិបាលខេត្តមណ្ឌលគិរីបានឱ្យដឹងថា លោកបានដឹងពីមន្ត្រីរាយការណ៍មកថា អ្នកជំងឺត្រូវបានបញ្ជូនទៅភ្នំពេញហើយ ។ច ំណែកលោក ទុយ ស្រស់ ប្រធានមន្ទីរពេទ្យបង្អែកសែនមនោរម្យ ខេត្តមណ្ឌលគិរី ក៏បានត្រឹមឆ្លើយស្ទាក់ស្ទើរថា ពិតជាមានករណីអ្នកជំងឺត្រូវឆ្កែខាំមែន តែចាំលោកសួរទៅអនុប្រធានសិន ព្រោះលោកកំពុងនៅឆ្ងាយ ។
ចែករំលែកព័តមាននេះ