រាជធានីភ្នំពេញ៖ បន្ទាប់ពីរាជរដ្ឋាភិបាលទម្លាក់ទុនបន្ថែមដល់ធនាគារអភិវឌ្ឍន៍ជនបទ និងកសិកម្មកាលពីថ្ងៃទី ៥ ខែធ្នូ ហើយអនុញ្ញាតឱ្យបញ្ចេញថវិកាឱ្យប្រើប្រាស់នៅចាប់ពីថ្ងៃទី ៩ខែធ្នូរហូតមកដល់ថ្ងៃទី ១៣ ខែធ្នូនេះ គឺមានរោងម៉ាស៊ីនកិនស្រូវប្រមាណចំនួន ១៥ រោងម៉ាស៊ីនហើយបានដាក់ពាក្យត្រូវកាថវិកានៅធនាគារអភិវឌ្ឍន៍ជនបទ និងកសិកម្មដែលមានទំហំទឹកប្រាក់ប្រមាណ ៤០% នៃថវិកាសរុប ៥០ លានដុល្លារអាមេរិករបស់រាជរដ្ឋាភិបាល ។
លោក កៅ ថាច អគ្គនាយកធនាគារអភិវឌ្ឍន៍ជនបទ និងកសិកម្មមានប្រសាសន៍ថា មានរោងម៉ាស៊ីនកិនស្រូវប្រហែល ១៥ បានដាក់ពាក្យស្នើសុំថវិកាសម្រាប់ប្រើប្រាស់នៅក្នុងសង្វាក់ផលិតកម្ម ហើយរោងម៉ាស៊ីនទាំងនោះបានឆ្លើយតបទៅ និងលក្ខណៈតម្រូវរបស់ធនាគារអភិវឌ្ឍន៍ជនបទ និងកសិកម្ម ។ លោកបញ្ជាក់ថា «ក្នុងចំណោមរោងម៉ាស៊ីនទាំង ១៥ បើគិតជាទំហំទឹកប្រាក់ដែលត្រូវការមានប្រហែល ៤០% នៃថវិកាសរុប ៥០ លានដុល្លារអាមេរិកដែលរាជរដ្ឋាភិបាលដែលបានបញ្ចេញបន្ថែមជូនធនាគារអភិវឌ្ឍន៍ជនបទ និងកសិកម្ម ហើយថវិកាសរុបនេះនឹងអស់នៅក្នុងរយៈពេលដ៏ខ្លីខាងមុខនេះ» ។
លោកសង្កត់ធ្ងន់ថា «បន្ទាប់ពីរាជរដ្ឋាភិបាលកម្ពុជាទម្លាក់ទុន ៥០ លានដុល្លារអាមេរិកមកហើយយើងបានបញ្ចេញបណ្តើរៗខ្លះទៅឃើញថាតម្លៃស្រូវបានកើនឡើង បន្តិចវិញ ។ នៅពេលធម្មតាស្រូវសែនក្រអូបមួយគីឡូក្រាមថ្លៃជាង ៨០០ រៀល តែឥឡូវឡើងដល់ជិត១០០០ ឬជាង ១.០៥០ រៀល» ។
ទន្ទឹមនិងនេះសហព័ន្ធស្រូវអង្ករកម្ពុជាបានកំពុងធ្វើបច្ចុប្បន្នភាពទៅលើសមាជិករោងម៉ាស៊ីនរបស់ខ្លួនពាក់ព័ន្ធលទ្ធភាព និងការប្រមូលទិញស្រូវនៅតាមតំបន់ស្ថិតនៅក្នុងខេត្តគោលដៅដែលខ្លួនបានបង្កើតឡើង ។
លោកឧកញ៉ា ហ៊ុន ឡាក់ ប្រធានក្រុមប្រឹក្សាភិបាលនៃសហព័ន្ធស្រូវអង្ករកម្ពុជាមានប្រសាសន៍ថាចំណុចទី ១ គឺខាងធនាគារអភិវឌ្ឍន៍ជនបទ និងខាងរោងម៉ាស៊ីនកិនស្រូវបានរៀបចំតារាងនៃរោងម៉ាស៊ីនដែលកំពុងប្រមូលទិញស្រូវ ។ ចំណុចទី ២ នៅតាមបណ្តាខេត្តឬតំបន់គោលដៅដែលសហព័ន្ធបង្កើតជាហ្សូនប្រមូលស្រូវកំណត់ថាកន្លែងណាខ្លះបានប្រមូលអស់ហើយ ឬនៅសល់ និងចំណុចទី ៣ ពាក់ព័ន្ធគុណភាពស្រូវ ។ នៅឆ្នាំនេះមានតំបន់ខ្លះស្រូវកសិករមានលក្ខណៈលាយមិនសូវសុទ្ធល្អ ។
លោកបន្តថា ការធ្វើបច្ចុប្បន្នភាពរោងម៉ាស៊ីននេះ គឺដើម្បីប្រើប្រាស់ថវិកាដែលរាជរដ្ឋាភិបាលបានទម្លាក់ជូនធនាគារអភិវឌ្ឍន៍ជនបទ និងកសិកម្ម ដែលជាធម្មតាគាត់ត្រៀមផ្តល់ជូនរោងម៉ាស៊ីនសម្រាប់ទិញស្រូវដែលទីផ្សារត្រូវការ ។
សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាមានប្រសាសន៍ថ្មីៗនេះថា រោងម៉ាស៊ីនកិនស្រូវទទួលទិញស្រូវពីប្រជាពលរដ្ឋ មេត្តាកុំទម្លាក់ថ្លៃស្រូវរបស់ប្រជាជនដែលគាត់កំពុងទទួលច្រូតកាត់ ។ សម្តេចមានប្រសាសន៍បន្ថែមថា «យើងយល់ហើយអំពីក្រិត្យក្រមនៃសេដ្ឋកិច្ច ។ មានតម្រូវការច្រើនការផ្គត់ផ្គង់តិចតម្លៃវាឡើងថ្លៃ មានត្រូវការតិចតែតម្រូវការផ្គត់ផ្គង់ច្រើនគឺវាចុះថ្លៃ ។ ប៉ុន្តែខ្ញុំសូមអំពាវនាវចំពោះរោងម៉ាស៊ីនកិនស្រូវ កន្លែងស្តុកស្រូវទទួលទិញពីប្រជាកសិករសូមកុំបង្អាប់ថ្លៃស្រូវរបស់ប្រជាជន»៕ កែសម្រួលដោយ ៖ សុឃាក់
ចែករំលែកព័តមាននេះ