សហរដ្ឋអាមេរិក-អាហ្វហ្គានីស្ថាន ៖ រដ្ឋការអាមេរិកនឹងប្រកាសនាសប្ដាហ៍នេះ ពីបំណងរបស់ខ្លួនដកកងទាហានប្រមាណជា៤០០០នាក់ចេញពីអាហ្វហ្គានីស្ថាន។ នេះជាសេចក្ដីរាយការណ៍កាលពីថ្ងៃទី១៤ធ្នូ របស់សារព័ត៌មានអាមេរិកជាច្រើន។
ការចរចាបានបន្តធ្វើទៀតនៅប្រទេសកាតារវាងសហរដ្ឋអាមេរិកនិងពួកតាលីបង់ តែត្រូវបានផ្អាកកាលពីថ្ងៃទី១២ធ្នូ ក្រោយការវាយប្រហារមួយនៅជិតមូលដ្ឋានអាកាសចរណ៍អាមេរិកបាហ្ក្រាម ក្នុងប្រទេសអាហ្វហ្គានីស្ថាន បណ្ដាលឲ្យមនុស្សស្លាប់២នាក់ និងរបួសច្រើនសិបនាក់ក្នុងចំណោមជនស៊ីវិល។
ទាហានអាមេរិកប្រមាណជា១៣.០០០នាក់ បច្ចុប្បន្នកំពុងស្ថិតក្នុងប្រទេសអាហ្វហ្គានីស្ថាន ១៨ឆ្នាំក្រោយអន្តរាគមន៍យោធាអាមេរិក បន្ទាប់ពីការវាយប្រហារភេរវកម្មថ្ងៃទី១១កញ្ញាឆ្នាំ២០០១ ដើម្បីផ្ដួលរំលំរបបតាលីបង់ដែលឲ្យពួកអាល់កៃដាបោះទីតាំង។
ទូរទស្សន៍អាមេរិកNBCអះអាងនាថ្ងៃទី១៤ធ្នូថា រដ្ឋការលោកត្រាំមានបំណងដកកងទាហាន៤០០០នាក់ចេញពីអាហ្វហ្គានីស្ថាន។ ប្រភព២អះអាងថាទាហានមួយចំនួននឹងដាក់ពង្រាយជាថ្មីមុនពេលគ្រោងទុក ចំណែកកងទាហានឯទៀតនឹងពុំមានអ្នកមកជំនួសឡើយ ក្រោយបញ្ចប់បេសកកម្មរបស់ពួកគេ៕ (កែសម្រួលដោយ ៖ បុប្ផា)
ចែករំលែកព័តមាននេះ