ជាទូទៅមនុស្សតែងតែគិតថា ភាពជោគជ័យតម្រូវឲ្យពួកគេមានលុយ ឬភាពល្បីឈ្មោះ ឬតំណែងខ្ពស់ណាមួយជាដើម ។ ជាក់ស្តែងវាមិនមានបញ្ហាអ្វីទាក់ទិននឹងគោលដៅទាំងនេះទេ ប៉ុន្តែអ្នកមិនគួរគិតថា វាជាផ្លូវតែមួយទៅកាន់ភាពជោគជ័យឡើយ ។ ដូច្នេះក្រៅពីលុយ និងតំណែងធំៗហើយ តើមានអ្វីខ្លះដែលអាចធ្វើឲ្យមនុស្សក្លាយជាមនុស្សជោគជ័យបាន ?
១. អ្នកឈប់រស់នៅដោយចាំធ្វើឲ្យអ្នកដទៃសប្បាយចិត្ត៖
ភាពជោគជ័យកើតមានឡើងពេលដែលអ្នកឈប់ស្តាប់នូវការរិះគន់ពីអ្នកដទៃដែលមិនចង់ឲ្យអ្នកល្អ និងផ្តោតស្មារតីលើអ្វីដែលសំខាន់សម្រាប់អ្នកវិញ ។ វាកើតឡើងពេលដែលអ្នកឈប់ព្យាយាមធ្វើឲ្យមនុស្សគ្រប់គ្នាជុំវិញអ្នកស្រលាញ់ចូលចិត្តអ្នក និងចាប់ផ្តើមធ្វើអ្វីដែលខ្លួនស្រលាញ់និងចូលចិត្តវិញ ។
២. អ្នកជាមនុស្សចេះគួរសម៖
សៀវភៅជាច្រើនបានឲ្យដឹងថា អ្នកដែលជោគជ័យក្នុងជីវិតជាមនុស្សដែលចូលចិត្តញញឹម ចេះគូរសម តែងតែកើតសរសើរអ្នកដទៃពេលដែលពួកគេធ្វើបានល្អ និងជាមនុស្សដែលមិនឈ្លោះជាមួយអ្នកដទៃឡើយ ។ មនុស្សដែលជោគជ័យមានសមត្ថភាពក្នុងការធ្វើឲ្យមនុស្សម្នាក់មានអារម្មណ៍ថាខ្លួនគេជាមនុស្សដែលមានសារៈសំខាន់ជាងគេលើលោក ហើយការធ្វើដូច្នេះនឹងផ្តល់អត្ថប្រយោជន៍ជាច្រើននៅថ្ងៃក្រោយ ។
៣. អ្នកដទៃធ្លាប់អរគុណអ្នកចំពោះអ្វីដែលអ្នកបានធ្វើ៖
តើមាននរណាធ្លាប់បង្ហាញអំណរគុណដល់អ្នកចំពោះអ្វីដែលអ្នកបានធ្វើទេ? ភាពជោគជ័យកើតមានឡើងពេលដែលអ្នកព្យាយាមរកវិធីដើម្បីផ្តល់តម្លៃដល់មនុស្សដទៃ ។ អាជីវកម្មរបស់អ្នកមិនមែនដំណើរការដើម្បីអ្នកទេ តែគឺដើម្បីអតិថិជនរបស់អ្នក ។
៤. អ្នករស់នៅជីវិតមួយដែលដូចការរំពឹងទុករបស់អ្នក៖
ជីវិតដែលជោគជ័យ និងមានសុភមង្គល គឺជាជីវិតដែលអ្នករស់នៅបំពេញតាមស្តង់ដាររបស់ខ្លួន មិនមែនស្តង់ដារសង្គម មិត្តភក្តិ ឬក្រុមគ្រួសារទេ ។ ក្តីសុបិនរបស់អ្នកមិនចាំបាច់តម្រូវឲ្យអ្នកក្លាយជាអ្នកមាន ឬមានតំណែងខ្ពស់ខ្ពស់ដើម្បីអាចសម្រេចវាបានទេ ។ គ្រាន់តែការមានសមត្ថភាពក្នុងការធ្វើអ្វីដែលខ្លួនស្រលាញ់ក៏ជាជីវិតរបស់មនុស្សជោគជ័យម្នាក់ដែរ ។
ប្រាកដណាស់ លុយ និងតំណែងខ្ពស់ខ្ពស់មិនមានអ្វីអាក្រក់ឡើយ ប៉ុន្តែវាប្រៀបបានជាលទ្ធផលដែលអ្នកនឹងទទួលបានប្រសិនបើអ្នកខិតខំធ្វើការលើអ្វីដែលអ្នកពិតជាស្រលាញ់ និងជឿជាក់ ៕ កែសម្រួលដោយ ៖ សុឃាក់
ចែករំលែកព័តមាននេះ