ខេត្តកំពង់ស្ពឺ ៖ ក្មេងស្រីវ័យទើប១៤ឆ្នាំជាកូនចុងម្នាក់ដោយអត់ទ្រាំនឹងទង្វើរបស់ឪចុងមិនបានក៏ទម្លាយរឿងប្រាប់ម្តាយពីទង្វើដែលឪចុងបានចាប់រំលោភនាងអស់រយៈពេលច្រើនឆ្នាំមកហើយ ។ ចុងក្រោយបានត្រឹមប្តឹងឱ្យសមត្ថកិច្ចចាត់ការឪពុកចុងកំហូចតាមផ្លូវច្បាប់ ចំណែកជនសង្ស័យវិញមិនបានសារភាពនោះទេ ដោយលើកឡើងថា គឺជាការចោទប្រកាន់ទាំងស្រុង ។
ជនសង្ស័យត្រូវបានសមត្ថកិច្ចឃាត់ខ្លួននេះធ្វើឡើងកាលពីថ្ងៃទី១៣ ខែធ្នូ ឆ្នាំ២០១៩ នៅចំណុចភូមិរកាកោង ឃុំកាត់ភ្លុក ស្រុកបសេដ្ឋ ខេត្តកំពង់ស្ពឺ ។ ជនជាប់សង្ស័យឈ្មោះ យួន ណម ភេទប្រុស អាយុ40ឆ្នាំ ដែលជាឪពុកចុងរស់នៅផ្ទះជាមួយគ្នាចំណុចឃាត់ខ្លួនខាងលើ ។
យោងតាមការបង្ហើបពីសមត្ថកិច្ចបានឱ្យដឹងថា កាលពីថ្ងៃទី១២ ខែធ្នូ ឆ្នាំ២០១៩ សមត្ថកិច្ចបានទទួលពាក្យបណ្តឹងមួយពីក្មេងស្រីរងគ្រោះឈ្មោះ ក.ស.ជ.ត អាយុ១៤ឆ្នាំ បានប្តឹងថា ឪពុកចុងរបស់ខ្លួនបានធ្វើសកម្មភាពចាប់រំលោភមកលើខ្លួនច្រើនលើកច្រើនសារមកហើយតាំងពីនាងមានអាយុ១១ឆ្នាំរហូតមកដល់បច្ចុប្បន្ន ។
ប្រភពបន្តថា ការបំភ្លឺរបស់ក្មេងស្រីរងគ្រោះគឺឪពុកចុងរូបនេះក្រោយប្រព្រឹត្តមកលើខ្លួនហើយបានគំរាមមិនឱ្យនិយាយប្រាប់អ្នកណាឡើយ បើហ៊ាននិយាយគេនឹងសម្លាប់ចោលទាំងម្តាយទាំងកូន ដោយខ្លាចមានគ្រោះថ្នាក់ដល់អាយុជីវិតនាងក៏ចេះតែលាក់រឿងនេះរហូតមក ។ នៅលើកក្រោយនេះថ្ងៃទី១២ ខែធ្នូ ឆ្នាំ២០១៩ ឪពុកចុងប្រុងចាប់រំលោភម្តងទៀតនាងមិនអាចទ្រាំបានទៀតក៏ទម្លាយរឿងប្រាប់ម្តាយឱ្យដាក់ពាក្យបណ្តឹងតែម្តង ។
សមត្ថកិច្ចបានប្រាប់ផងដែរថា ក្រោយទទួលបណ្តឹងសមត្ថកិច្ចបានធ្វើការឃាត់ខ្លួនជនសង្ស័យនាំទៅធ្វើការសាកសួរថា អំពីការចោទប្រកាន់ពីសំណាក់ក្មេងស្រីខាងលើ និងបានរៀបចំឯកសារបញ្ជូនទៅថ្នាក់លើដើម្បីចាត់ការបន្ត ៕
កែសម្រួលដោយ ៖ សំណាង
ចែករំលែកព័តមាននេះ