រាជធានីភ្នំពេញ ៖ ពិព័រណ៍ផលិតផលខ្មែរ និងទំនិញនាំចេញ-នាំចូលកម្ពុជា លើកទី១៤ កម្រិតអន្តរជាតិឆ្នាំ២០១៩ ដែលមានស្តង់ដាក់បង្ហាញផលិតផល៣៧២ស្តង់ ដែលបានបើកសម្ពោធកាលពីល្ងាចថ្ងៃទី១៥ ខែធ្នូ ឆ្នាំ២០១៩ម្សិលមិញនេះ…
រាជធានីភ្នំពេញ ៖ ពិព័រណ៍ផលិតផលខ្មែរ និងទំនិញនាំចេញ-នាំចូលកម្ពុជា លើកទី១៤ កម្រិតអន្តរជាតិឆ្នាំ២០១៩ ដែលមានស្តង់ដាក់បង្ហាញផលិតផល៣៧២ស្តង់ ដែលបានបើកសម្ពោធកាលពីល្ងាចថ្ងៃទី១៥ ខែធ្នូ ឆ្នាំ២០១៩ម្សិលមិញនេះ ត្រូវបានប្រមុខរាជរដ្ឋាភិបាលកម្ពុជាថា ពិព័រណ៍កម្រិតអន្តរជាតិនេះ នឹងធ្វើឱ្យពាណិជ្ជករទាំងអស់នៅក្នុងស្រុក និងក្រៅ បានយល់កាន់តែច្បាស់ពីសក្តានុពលវិនិយោគនៅកម្ពុជា ហើយប្រើឱ្យអស់លទ្ធភាពអាទិភាពដែលផ្តល់ដោយរាជរដ្ឋាភិបាល។
សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មានប្រសាសន៍ថា «តាមរយៈព្រឹត្តិការណ៍ពិព័រណ៍ផលិតផលអន្តរជាតិថ្ងៃនេះ នឹងធ្វើឱ្យពាណិជ្ជករ, សហគ្រិន,វិនិយោគិន, ធុរជនទាំងក្នុង និងក្រៅប្រទេស នឹងបានយល់កាន់តែច្បាស់ពីសក្តានុពលវិនិយោគនៅកម្ពុជា ហើយនឹងចាប់យកឱកាសប្រើប្រាស់ឱ្យអស់លទ្ធភាពនូវសម្បទានអាទិភាពទាំងឡាយដែលផ្តល់ដោយរាជរដ្ឋាភិបាលសម្រាប់ធ្វើការវិនិយោគ និងធ្វើធុរកិច្ចរបស់ខ្លួនប្រកបដោយជោគជ័យទាំងពេលបច្ចុប្បន្ន និងអនាគត»។
សម្តេចតេជោ ហ៊ុន សែន បន្តថា ពិព័រណ៍ផលិតផលខ្មែរ និងទំនិញនាំចេញ-នាំចូលកម្ពុជា បានឆ្លុះបញ្ចាំងពីបរិយាកាស និងវិនិយោគដ៏មានសក្តានុពលរបស់កម្ពុជា តាមរយៈការរក្សាបាននូវសុខសន្តិភាព ស្ថិរភាពសង្គម ជាមួយនឹងកំណើនសេដ្ឋកិច្ចខ្ពស់ និងការរីកចម្រើនលើគ្រប់វិស័យដែលបានផ្តល់ឱកាសដល់ធុរជនកម្ពុជា និងធុរជនបរទេសទាំងអស់បានជួបពិភាក្សាគ្នា ដើម្បីជំរុញការធ្វើធុរកិច្ច និងការវិនិយោគ និងការរៀបចំពិព័រណ៍ក្នុងស្រុក,ពិព័រណ៍អន្តរជាតិ ពិព័រណ៍ចិនអាស៊ាន និងពិព័រណ៍ពិភពលោកជាដើម។
សម្តេចសង្កត់ធ្ងន់ថា «ព្រឹត្តិការណ៍ទាំងអស់នេះ គឺជាកាលានុវត្តភាពជួយផ្សព្វផ្សាយអំពីសក្តានុពលវិនិយោគរបស់កម្ពុជា ជាឱកាសស្វែងរកទីផ្សារនាំចេញ ការផ្សព្វផ្សាយវប្បធម៌និងពង្រឹងកិច្ចសហប្រតិបត្តិការលើគ្រប់វិស័យសេដ្ឋកិច្ច ពាណិជ្ជកម្ម និងវិស័យដទៃទៀតដូចជាមួយប្រទេសដៃគូនានានៅក្នុងតំបន់និងពិភពលោក។ ដើម្បីធានាបរិយាកាសសម្រាប់ធុរកិច្ចប្រកបដោយបរិយាយ័ន្ន និងតម្លាភាព ជាពិសេសការរក្សាបានសុខសន្តិភាព ស្ថិរភាពនយោបាយ ជាមួយស្ថិរភាពម៉ាក្រូសេដ្ឋកិច្ចរាជរដ្ឋាភិបាលបានដាក់ចេញនូវគោលនយោបាយបើកចំហរចំពោះវិនិយោគិនទាំងអស់ ដើម្បីចូលមកវិនិយោគ ឬបង្កើតធុរកិច្ចនៅកម្ពុជា»។
យោងតាមហ្វេសប៊ុកផ្លូវការរបស់សម្តេចអគ្គមហាសេនាបតីតេជោ ហ៊ុន សែន បានបង្ហាញថា ព្រឹត្តិការណ៍អន្តរជាតិលខាងលើនេះ រៀបចំឡើងដោយមានការគាំទ្រ និងការចូលរួមយ៉ាងសកម្មពីប្រទេសជាមិត្តក្នុងតំបន់ដូចជា ប្រទេសចិន, ជប៉ុន, ឥណ្ឌូនេស៊ី, ថៃ, ម៉ាឡេស៊ី, មីយ៉ាន់ម៉ា, វៀតណាម និងប្រទេសឡាវ ព្រមទាំងមន្ទីរពាណិជ្ជកម្មកម្ពុជាទាំង២៥ រាជធានី-ខេត្ត, សភាពាណិជ្ជកម្មកម្ពុជា, សហព័ន្ធស្រូវអង្ករ, អង្គការ, សមាគមអាជីវកម្ម, ក្រុមហ៊ុនក្នុងស្រុក និងក្រុមហ៊ុនបរទេស ដែលកំពុងធ្វើប្រតិបត្តិការអាជីវកម្មនៅក្នុងប្រទេសកម្ពុជា។
ពិព័រណ៍នេះ មានស្ដង់សរុបចំនួន៣៧២ស្ដង់ ហើយទំនិញ និងសេវាជាច្រើនប្រភេទ ត្រូវបានដាក់តាំងបង្ហាញក្នុងព្រឹត្ដិការណ៍ពាណិជ្ជកម្មនេះមាន ៖ ផលិតផលកសិកម្មកសិ-ពាណិជ្ជកម្ម ផលិតផលសិប្បកម្ម ផលិតផលធ្វើពីសូត្រអង្ករ, ម្រេច, ដំឡូងមី, វត្ថុអនុស្សាវរីយ៍ សម្ភារៈការិយាល័យ, ក្រណាត់ និងសម្លៀកបំពាក់សម្ភារៈប្រើប្រាស់ទូទៅផលិតផលសម្រាប់តុបតែងក្នុងគេហដ្ឋាន គ្រឿងអលង្ការ និងត្បូងថ្មមានតម្លៃផលិតផលឱសថបរិក្ខារពេទ្យ និងគ្រឿងសម្អាង ម្ហូបអាហារកែច្នៃនិងភេសជ្ជៈ គ្រឿងឧបភោគ-បរិភោគ ផលិតផលបា្លស្ទីក គ្រឿងអេឡិចត្រូនិក គ្រឿងបន្លាស់ គ្រឿងសង្ហារឹម ផលិតផលពាក់ព័ន្ធវិស័យទូរគមនាគមន៍ និងព័ត៌មានវិទ្យា គ្រឿងម៉ាស៊ីន សម្ភារៈសំណង់ ផលិតផលបម្រើឲ្យសេវាសណ្ឋាគារទេសចរណ៍ សេវាអប់រំសេវាធនាគារ និងគម្រោងវិនិយោគ ជាដើម៕ (កែសម្រួលដោយ ៖ បុប្ផា)
ចែករំលែកព័តមាននេះ