រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា ជនសង្ស័យជាអតីតកីឡាប្រដាល់សេរីម្នាក់នេះបានក្លាយជាចោរលួចរថយន្តកាលពីរសៀលថ្ងៃទី១០ ធ្នូ នៅភូមិថ្មគោល១ សង្កាត់ចោមចៅទី១នោះ នាព្រឹកថ្ងៃទី១៣ ខែធ្នូ ឆ្នាំ២០១៩នេះ ជនសង្ស័យត្រូវបានលោក សេង ហៀង ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ សម្រេចធ្វើការចោទប្រកាន់ជាផ្លូវការហើយ ពីបទ លួច ។ ក្រោយពីតំណាងអយ្យការធ្វើការចោទប្រកាន់សំណុំរឿងនេះ បានចាត់ទៅខាងចៅក្រមស៊ើបសួរ ដើម្បីសម្រេចឃុំខ្លួនអតីតកីឡាប្រដាល់សេរីដាក់ពន្ធនាគារជាបណ្តោះអាសន្ន ។
សេចក្តីរាយការណ៍បន្តថា ជនសង្ស័យខាងលើឈ្មោះ អែម ចាន់ឌី អាយុ២៨ឆ្នាំ មុខរបរ ដើររើសអេតចាយអតីតជាកីឡាប្រដាល់សេរី ហើយត្រូវបានចាប់ខ្លួនកាលពីរសៀលថ្ងៃទី១០ ធ្នូ នៅចំណុចបន្ទប់លេខ១១ (ផ្ទះជួលមួយកន្លែង) ក្នុងភូមិថ្មគោល១ សង្កាត់ចោមចៅទី១ ខណ្ឌពោធិ៍សែនជ័យ ។
អ្វីដែលគួឲ្យកត់សម្គាល់នោះឃើញថា ក្រោយពេលតំណាងអយ្យការបានធ្វើការចោទប្រកាន់ ជនសង្ស័យឈ្មោះ អែម ចាន់ឌី បានអង្គុយយំស្រណោះខ្លួនរៀបរាប់មុនពេលសមត្ថកិច្ចនាំទៅពន្ធនាគារ ។
ហើយជនសង្ស័យនិយាយបណ្តើរបង្ហូរទឹកភ្នែកបណ្តើរថា គេជាក្មេងកំព្រាត្រូវឪពុកម្តាយបាត់បង់ជីវិតចោលតាំងពីអាយុ៥ឆ្នាំ រហូតមកដល់ពេលនេះសូម្បីបងប្អូនក៏គ្មានដែរ ។ ក្នុងវ័យអាយុ៥ឆ្នាំ រូបគេចាកចេញពីស្រុកកំណើតឯខេត្តកំពត មករស់នៅភ្នំពេញជាមួយក្រុមមនុស្សអាណាថាដូចគ្នា ហើយប្រកបមុខរបររើសអេតចាយ ដើម្បីចិញ្ចឹមក្រពេះ ។
លុះខ្លួនធំពេញវ័យ បានទៅសុំគេសិក្សាមុខរបរប្រដាល់សេរីនៅក្លឹប ចំណែកខ្លួនឯងមានរហ័សនាមថា «និរោធសែនជ័យ» ការស្នាក់នៅ និងហូបចុកនៅក្លិបនោះតែម្តង ដូច្នោះហើយទើបធ្វើឲ្យជីវិតគេមានរស្មី និងបានបោះបង់ចោលមុខរបរដើររើសអេតចាយ ។ ក៏ប៉ុន្តែការរស់នៅក្នុងក្លិបមិនសូវជាស្រួលប៉ុន្មានទេ ព្រោះខ្លួនជាមនុស្សអាណាថា គេតែងតែប្រើឲ្យធ្វើការងារមិនសូវទំនេរដូចជាបោសជូត និងបោកគក់ ជាដើម ។
ក្នុងចន្លោះអាយុ២០ឆ្នាំតិចតួច ខ្លួនឡើងលើសង្វៀនប្រដាល់ក្នុងស្រុកចំនួនជាង២០លើក មានឈ្នះ មានចាញ់ មិនតែប៉ុណ្ណោះខ្លួនក៏ចេញទៅប្រកួតនៅក្រៅប្រទេស គឺប្រទេសថៃ២ លើក ឈ្នះ១លើក នឹងចាញ់១លើក ។ លុះអាយុប្រហែល២៣ និង២៤ឆ្នាំ ស្រាប់តែក្លិបប្រដាល់បានបញ្ឈប់ និងបណ្តេញគេចេញ មូលហេតុថា គេវ៉ៃលែងកើត ។ ក្រោយពេលក្លិបប្រដាល់បណ្តេញចេញ គេក៏ធ្លាក់ខ្លួនទៅជាជនអនាថាដើររើសអេតចាយលក់វិញ និងទៅជួលបន្ទប់ស្នាក់នៅម្នាក់ឯងក្នុង១ខែ២០ដុល្លារ ។
និយាយផង យំផង អតីតកីឡាប្រដាល់សេរីបន្តថា ជីវិតអ្នករើសអេតចាយលក់ គឺក្នុង១ថ្ងៃបាន១០ ០០០ទៅ១៥ ០០០រៀល គ្រាន់ដោះដូរបាយ នឹងថ្លៃឈ្នួលផ្ទះ តែយ៉ាងក្តីក៏ខ្លួនមិនបានប្រព្រឹត្តិអំពើល្មើសច្បាប់ដែរ ។
ហើយចំពោះការចាប់ខ្លួន និងចោទប្រកាន់ថា ជាចោរលួចរថយន្តនោះខ្លួនទទួលស្គាល់ តែរឿងមិនមែនដូច្នោះទាំងស្រុងទេ គឺនៅពេលកើតហេតុខ្លួនចេញបន្ទប់ជួលមួយកន្លែងក្នុងភូមិថ្មគោល ១ សង្កាត់ចោមចៅទី១ ខណ្ឌពោធិ៍សែនជ័យ ក្នុងគោលបំណងដើររើសអេតចាយលក់ ពេលនោះឃើញរថយន្តដឹកទំនិញ១គ្រឿង ដែលម្ចាស់ចតទុកនៅផ្លូវ និងមានកូនសោកង់តាក់ជាប់ទៀតផង ។ ឃើញដូច្នោះខ្លួនក៏ឡើងកាច់សោរបញ្ឆេះ ហើយបើកចេញទៅ ប៉ុន្តែមិនមានគោលដៅថា បើកទៅណាឲ្យច្បាស់លាស់ទេ គឺបើកសាកមើលដែលកន្លងមក ខ្លួនចេះតិចតួចដែរ។
លុះបើកបានមួយជុំ ក៏យកទៅទុកឲ្យម្ចាស់វិញ គ្រាន់តែមិនបានដាក់ដល់កន្លែងដើមទេ ខ្លាចម្ចាស់គេវ៉ៃ រួចក៏ដើរទៅបន្ទប់ជួលស្នាក់នៅធម្មតាវិញ ស្រាប់តែ៤ថ្ងៃក្រោយមក ក៏ត្រូវសមត្ថកិច្ចចាប់ខ្លួនតែម្តង ។ ពេលនេះខ្លួនទទួលខុសហើយ តែមិនចង់ជាប់ពន្ធនាគារឲ្យមានឈ្មោះជា «ចោរ» នោះទេ និងសុំមិនឲ្យកើតមានជាលើកទី២ដែរ ព្រោះតែខ្លួនជាក្មេងកំព្រាកុំឲ្យអភ័ព្វពេក ។
នៅចំពោះមុខអ្នកច្បាប់បានលើកឡើងថា ជនសង្ស័យអាចជាមនុស្សខូចប្រព័ន្ធសរសៃប្រសាទ ព្រោះគេជាកីឡាប្រដាល់ឡើងវ៉ៃច្រើនប៉េះពាល់ក្បាល ធ្វើអារម្មណ៍មិនបានគិតវែងឆ្ងាយ ។ ទោះជាយ៉ាងណា ជនសង្ស័យត្រូវបានចៅក្រមស៊ើបសួរ និងសម្រេចឃុំខ្លួនដាក់ពន្ធនាគារជាបណ្តោះអាសន្ន រង់ចាំបើកការស៊ើបអង្កេត និងជំនុំជម្រះទោសនៅពេលក្រោយ ៕ (កែសម្រួលដោយ ៖ បុប្ផា)
ចែករំលែកព័តមាននេះ