បង្គោលខៀវ នួន រ៉ាថេប ឆ្ពោះទៅវគ្គ16នាក់ក្នុងការប្រកួតរដូវកាលថ្មី
- ភ្នំពេញ
រាជធានីភ្នំពេញ ៖ ការប្រកួតជ្រើសរើសជើងឯក TV5 Knock out Series by K-Cement រដូវកាលទី៧…
រាជធានីភ្នំពេញ ៖ ការប្រកួតជ្រើសរើសជើងឯក TV5 Knock out Series by K-Cement រដូវកាលទី៧ ក្នុងប្រភេទទម្ងន់៦៣,៥គីឡូក្រាម សប្ដាហ៍បើកឆាកត្រូវបានប្រកាសហើយ កាលពីថ្ងៃទី១៤ ខែធ្នូ ឆ្នាំ២០១៩ ដោយគេមិននឹកស្មានថាកីឡាករបង្គោលខៀវ នួន រ៉ាថេប អាចឈ្នះគូប្រកួត ហើយទម្លាក់បង្គោលក្រហមល្បីឈ្មោះ ចិត សុភី ដែលជាជើងខ្លាំងវ័យក្មេងឲ្យធ្លាក់ឱកាសឡើងប្រកួតទៅវគ្គនោះទេ ។
នេះជាការប្រកួតក្នុងវគ្គស្វែងរក២នាក់ទៅវគ្គ១៦នាក់ សម្រាប់រដូវកាលថ្មី ដែលជាការប្រកួត
ដ៏សំខាន់សម្រាប់សមាសភាព៣២នាក់ដែលត្រូវបានជម្រើស ។ ជាមួយគ្នានេះ អ្នកគាំទ្រសរសើរមិនដាច់ពីមាត់ផងដែរថាគូនេះខ្លាំង និងទាក់ទាញ ទម្រាំរកឃើញចាញ់ឈ្នះ ។ នៅដើមទឹកទី១ គេមើលឃើញថា កីឡាករបង្គោលខៀវមិនអាចទទួលបានឱកាសឡើងទៅវគ្គបន្តនោះទេ ដោយសារតែបង្គោលក្រហមក៏ខ្លាំង ។ បង្គោលក្រហម ចិត សុភី ក៏បញ្ចេញសមត្ថភាពបានខ្លាំងមិនធម្មតាដែរ ប៉ុន្តែមកពីបង្គោលខៀវក៏ខ្លាំងមិនធម្មតា ហើយវាយត្រូវគោលដៅច្រើនជាង ទើបគេមានសំណាងដណ្ដើមបានកៅអី១៦នាក់ ហើយឡើងទៅវគ្គបន្ត បន្ទាប់ពីបង្គោលខៀវ វាយឲ្យបង្គោលក្រហមចាញ់ពិន្ទុក្នុងការប្រកួតក្រោយពីចប់ទឹកទី៣ ។
កីឡាករ នួន រ៉ាថេប ដែលជាអ្នកជំនាន់ក្រោយនិយាយថា ខ្លួនអត់មានរំពឹងសូម្បីតែបន្តិចនៅពេលដឹងថាឈ្មោះរបស់គេត្រូវឡើងប៉ះប្រកួតជាមួយកីឡាករ ចិត សុភី ដែលជាកីឡាករខ្លាំងម្នាក់ ហើយក៏ជាកីឡាករដែលមានសមត្ថភាពខ្ពស់ម្នាក់នោះ ។ បើទោះជាមុនឡើងសង្វៀន រូបគេបានហ្វឹកហាត់ដិតដល់និងបានចាក់មើលវីដេអូឡើងប្រកួតកន្លងមករបស់គូប្រកួត ដើម្បីស្វែងរកចំណុចខ្លាំងនិងចំណុចខ្សោយរបស់រៀមច្បងរូបនេះដឹងច្រើន តែក៏នៅអត់សង្ឃឹមសម្រាប់ការផ្ដួលរៀមច្បងរូបនេះឲ្យធ្លាក់ពីវគ្គដ៏សំខាន់ ហើយអាចបានឡើងទៅវគ្គ២នាក់ មុនពេលចំណាយពេលប្រកួត៣ទឹក ហើយក៏ដឹងតែពីវាយតែមិនដឹងថាផ្នែកណាមួយដែលខ្លួនបានពិន្ទុ បើកុំតែគូប្រកួតបោះបង់ការប្រកួតក៏មិនប្រាកដថាខ្លួនឈ្នះដែរ ។
លោក សេង កដិកា អ្នករៀបចំការប្រកួតរបស់ស្ថានីយទូរទស្សន៍ប៉ុស្តិ៍លេខ៥ បានថ្លែងថា ការប្រកួតរដូវកាលនេះនឹងកាន់តែល្អមើលដ្បិតជាវគ្គជម្រុះក្នុងជុំទី១ ។ សមាសភាពនៅក្នុងរដូវកាលទី៧នេះ គឺស្ថិតក្នុងប្រភេទទម្ងន់៦៣,៥គីឡូក្រាមដែលជាប្រភេទមធ្យម ដូច្នេះសម្រាប់កីឡាករគឺមិនខុសពីបណ្ដុះកីឡាករក្មេងៗ ដើម្បីត្រៀមទៅកាន់ព្រឹត្តិការណ៍ស៊ីហ្គេមដែលកម្ពុជាធ្វើជាម្ចាស់ផ្ទះក្នុងឆ្នាំ២០២៣នោះទេ ។
លោកបានប្រកាសថា បើកីឡាករដែលមានមុខប្រកួតក្នុងរដូវកាលទី៧ទាំងអស់ប្រឹងប្រែង ហើយតស៑ូប្រកួតដោយកុំប្រហែស គឺក្នុងរង្វង់៣ទៅ៤ឆ្នាំទៀត ពួកគេនឹងក្លាយជាកីឡាករល្បីៗជំនួសអ្នកចាស់ដែលល្បីនៅក្នុងពេលនេះ ។
លោកសម្រេចចិត្តជ្រើសរើសការប្រកួតក្នុងប្រភេទទម្ងន់៦៣,៥គីឡូក្រាម ដែលលោកយល់ថាគឺជាការបណ្ដុះធនធានកីឡាករក្មេងៗស្នងតំណែង ។
ការប្រកួតក្នុងវគ្គ៣២នាក់ជម្រុះយក១៦នាក់នេះ លោកអះអាងថា សម្រាប់គូប្រកួតក្នុងសប្ដាហ៍ បន្ទាប់នឹងកាន់តែល្អមើល ដោយសារតែអ្នកប្រយុទ្ធទាំងនោះជម្រុះគ្នាយ៉ាងស្វិតស្វាញនៅលើសង្វៀន ៕ (កែសម្រួលដោយ ៖ បុប្ផា)
ចែករំលែកព័តមាននេះ