ខេត្តសៀមរាប ៖ គ្រូពេទ្យយួនម្នាក់ ត្រូវបានកម្លាំងនគរបាលប្រឆាំងបទល្មើសសេដ្ឋកិច្ចនៃស្នងការដ្ឋានខេត្តសៀមរាប ធ្វើការឃាត់ខ្លួន បន្ទាប់ពីគ្រូពេទ្យរូបនោះ បានចាក់ថ្នាំឱ្យបុរសវ័យចំណាស់ម្នាក់ បណ្តាលឱ្យបាត់បង់ជីវិតនៅនឹងផ្ទះរបស់លោកគ្រូពេទ្យយួននោះតែម្តង។
ហេតុការណ៍ឃាត់ខ្លួនជនជាតិយួនម្នាក់នេះ ធ្វើឡើងនៅម៉ោង៣នាទីរសៀល ថ្ងៃទី១៤ ខែធ្នូឆ្នាំ២០១៩ ស្ថិតនៅភូមិជប់រំដេង ឃុំកន្ទួត ស្រុកស្វាយលើ ខេត្តសៀមរាប។
បើតាមមន្ត្រីនគរបាលប្រឆាំងបទល្មើសសេដ្ឋកិច្ចខេត្តសៀមរាប បានឱ្យដឹងនៅម៉ោង១១ និង៣០នាទីព្រឹក ថ្ងៃទី១៥ ខែធ្នូនេះថា ប្រតិបត្តិការនេះ កម្លាំងសមត្ថកិច្ចបានចុះត្រួតពិនិត្យ និងធ្វើការស្រាវជ្រាវករណីសង្ស័យទៅលើលោកពេទ្យភូមិម្នាក់ឈ្មោះ ម៉ៅ សំអឿន ភេទប្រុស អាយុ៧៦ឆ្នាំ ជនជាតិវៀតណាម បច្ចុប្បន្នស្នាក់នៅភូមិជប់រំដេង ឃុំកន្ទួត ស្រុកស្វាយលើ ខេត្តសៀមរាប បានព្យាបាលដោយចាក់ថ្នាំលើបុរសចំណាស់ម្នាក់ ឈ្មោះ ពោ ទឹម ភេទប្រុស អាយុ ៥៨ឆ្នាំ រស់នៅក្នុងភូមិឃុំជាមួយគ្នា បណ្តាលឱ្យបាត់បង់ជីវិតនៅនឹងផ្ទះរបស់លោកគ្រូពេទ្យនោះតែម្តង ។
ក្រោយពេលកើតហេតុ ទើបសុំគោលការណ៍ពីថ្នាក់លើ និងព្រះរាជ្ញអាជ្ញាអមសាលាដំបូងខេត្តសៀមរាប ដើម្បីធ្វើការឃាត់ខ្លួនជនសង្ស័យរូបនេះតែម្តង។ នៅក្នុងប្រតិបត្តិការនេះ គេឃើញមានការចូលរួមពីសំណាក់សមត្ថកិច្ចពាក់ព័ន្ធ និងអាជ្ញាធរមូលដ្ឋានចូលរួមផងដែរ។
ប្រភពបន្តថា ចំណែកលទ្ធផលទទួលបានដូចជា ១- គ្រូពេទ្យប្រកបមុខរបរ គ្មានលិខិត អនុញ្ញាតិពីស្ថាប័នជំនាញពាក់ព័ន្ធ។ ២- ការព្យាបាលខុសបច្ចេកទេស បណ្តាលឱ្យមនុស្សម្នាក់បាត់បង់ជីវិត និង៣- ជនសង្ស័យត្រូវបាននាំខ្លួនទៅធ្វើការសាកសួរបន្តនៅអធិការដ្ឋាននគរបាលស្រុកស្វាយលើ រួចកសាងសំណុំរឿងបញ្ជូនទៅស្ថាប័នអយ្យការ ដើម្បីចាត់ការទៅតាមនីតិវិធី ដោយអនុលោមទៅតាមច្បាប់ស្តីពី ការគ្រប់គ្រងអ្នកប្រកបវិជ្ជាជីវៈ វិស័យសុខាភិបាល។
បន្ទាប់ពីសមត្ថកិច្ចចម្រុះ ត្រួតពិនិត្យជនរងគ្រោះរួច ក៏បានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី៕ (កែសម្រួលដោយ ៖ បុប្ផា)
ចែករំលែកព័តមាននេះ