ការធ្វើបុណ្យច្រើនបានបុណ្យច្រើន ឬធ្វើបុណ្យតិចបានបុណ្យតិច មិនអាស្រ័យលើសកម្មភាពនៃការបះបង់ទ្រព្យសម្បត្តិប៉ុនណានោះទេ តែអាស្រ័យលើចេតនា និងទឹកចិត្តដ៏បរិសុទ្ធរបស់អ្នកប្រព្រឹត្តធ្វើតែប៉ុណ្ណោះ ។
តាមពិត គ្មានអ្នកណាអាចវាស់ស្ទង់ ឬរាប់ចំនួនបុណ្យថាប៉ុណ្ណេះ ប៉ុណ្ណោះបានទេ ព្រោះវាជាសភាវធម្មជាតិដែលកើតក្នុងចិត្ត ដែលយើងមើលមិនឃើញ ស្មានមិនបាន ។ ប៉ុន្តែថ្វីបើការធ្វើបុណ្យច្រើនបានបុណ្យច្រើន ធ្វើបុណ្យតិចបានបុណ្យតិច អ្នកដទៃមិនអាចដឹងបានមែន តែគង់យើងខ្លួនឯង ជាអ្នកដឹងពិតប្រាកដ ។
អ្នកប្រារព្ធនូវកម្មវិធីបុណ្យធំៗ អស់លុយរាប់ម៉ឺនដុល្លារ តែបើការលះបង់នោះគ្រាន់តែដើម្បីឲ្យគេសរសើរ ចង់បានកិត្តិយសមុខមាត់ បុណ្យប្រាកដជាមិនកើតឡើងច្រើនសម្បើមឡើយ ។ តែផ្ទុយទៅវិញបាយមួយវែក ទឹកមួយកែវ លះបង់ធ្វើជាទាន ប្រកបដោយចិត្តសប្បុរស ពោរពេញទៅដោយមេត្តា ករុណាចង់ឲ្យអ្នកដទៃបានឆ្អែត នោះហើយគឺជាបុណ្យច្រើនអនេក ។
ហេតុនេះហើយ គ្រប់ពេលដែលអ្នកធ្វើបុណ្យសាងកុសល ទោះបីជាធ្វើបុណ្យអ្វីក៏ដោយត្រូវតែធ្វើចិត្តឱ្យបានសប្បាយ រីករាយ ជ្រះថ្លា និងប្រកបដោយបញ្ញា ។ ប្រសិនបើអ្នកត្រេកអរ ពេញចិត្តហើយ សូម្បីតែធ្វើបុណ្យ ដោយការលះបង់ទ្រព្យតិចតួចក៏ដោយ ក៏បានអានិសង្សច្រើនលើសលន់ ។ ដោយសាន សារិន
ចែករំលែកព័តមាននេះ