ខេត្តបន្ទាយមានជ័យ ៖ កងកម្លាំងនគរបាល កាលពីល្ងាចថ្ងៃទី១៣ ខែធ្នូកន្លងទៅ បានបង្ក្រាបក្រុមក្មេងស្ទាវបង្ហោះម៉ូតូតាមផ្លូវសាធារណៈចំនួន៩នាក់យកមកអប់រំ ។ លោកឧត្តមសេនីយ៍ទោ អាត់ ខែម…
ខេត្តបន្ទាយមានជ័យ ៖ កងកម្លាំងនគរបាល កាលពីល្ងាចថ្ងៃទី១៣ ខែធ្នូកន្លងទៅ បានបង្ក្រាបក្រុមក្មេងស្ទាវបង្ហោះម៉ូតូតាមផ្លូវសាធារណៈចំនួន៩នាក់យកមកអប់រំ ។ លោកឧត្តមសេនីយ៍ទោ អាត់ ខែម ស្នងការនគរបាលខេត្ត បានដាក់បទបញ្ជាដល់កងកម្លាំងនគរបាលគ្រប់អធិការដ្ឋានស្រុក-ក្រុង និងវរសេនាតូចនគរបាលការពារព្រំដែនគោកទាំង៤ត្រូវចាត់វិធានការបង្ក្រាបឲ្យខាងតែបាន ។
ជាលទ្ធផល នៅល្ងាចថ្ងៃទី១៣ ខែធ្នូនោះ កម្លាំងនគរបាលក្រុងសិរីសោភ័ណ បានធ្វើការបង្ក្រាបក្រុមក្មេងទំនើងប្រុសស្រីចំនួន៩នាក់ ដែលតែងធ្វើសកម្មភាពបង្ហោះម៉ូតូតាមផ្លូវជាតិក្នុងភូមិសាស្ត្រសង្កាត់កោះសត្វ ក្រុងសិរីសោភ័ណ ទៅភូមិសាស្ត្រឃុំឫស្សីក្រោក ស្រុកមង្គលបុរី ។ នៅថ្ងៃទី១៤ ខែធ្នូ សមត្ថកិច្ចបាននាំយកក្មេងស្ទាវប្រុសស្រីទាំង៩នាក់នេះនិងម៉ូតូចំនួន៦គ្រឿង ទៅធ្វើការអប់រំនិងដាក់កិច្ចសន្យានៅស្នងការដ្ឋាននគរបាលខេត្ត ដោយមានការចូលរួមពីលោកស្នងការ អាត់ ខែម ព្រមទាំងអាណាព្យាបាល ឪពុកម្តាយពួកគេផងដែរ ។
លោកវរសេនីយ៍ឯក ស៊ី ឌី អធិការនគរបាលក្រុងសិរីសោភ័ណ បានឲ្យដឹងថា ក្មេងទំនើងទាំង៩នាក់នេះ មាន ៖
១-ឈ្មោះ វ៉ាត គង្គា ភេទស្រី អាយុ១៦ឆ្នាំអ្នកបង្ហោះម៉ូតូ
២-ឈ្មោះ អឿន ណាលីន ភេទស្រី អាយុ១៦ឆ្នាំ អ្នកអង្គុយពីក្រោយ ទាំង២នាក់នេះ មានទីលំនៅភូមិបត់ត្រង់ឃុំបត់ត្រង់ ស្រុកមង្គលបុរី ។
៣-ឈ្មោះ ជា សាវ៉ាត់ ភេទប្រុស អាយុ១៥ឆ្នាំ អ្នកអង្គុយពីក្រោយ
៤-ឈ្មោះ ថោង សំអាន ភេទប្រុស អាយុ១៧ឆ្នាំ ជាអ្នកបង្ហោះម៉ូតូ ទាំង២នាក់នេះ មានទីលំនៅភូមិប្រឡាយហ្លួង ឃុំឫស្សីក្រោក ស្រុកមង្គលបុរី ។
៥-ឈ្មោះ ទុំ សុពលពេញ ភេទប្រុស អាយុ១៥ឆ្នាំ អ្នកបង្ហោះម៉ូតូ ទីលំនៅភូមិពោធិ៍២ដើម ឃុំរហាត់ទឹក ស្រុកមង្គលបុរី
៦-ឈ្មោះ ជីម សុធឿន ភេទប្រុស អាយុ១៧ឆ្នាំ អ្នកបង្ហោះម៉ូតូ ទីលំនៅភូមិព្រែកល្ពៅ ឃុំឫស្សីក្រោក ស្រុកមង្គលបុរី
៧-ឈ្មោះ ធួត សៀវចិន ភេទប្រុស អាយុ១៧ឆ្នាំ អ្នកបង្ហោះម៉ូតូ ទីលំនៅភូមិអង្គាបុស្ប សង្កាត់កោះពងសត្វ ក្រុងសិរីសោភ័ណ ។
៨-ឈ្មោះ សោម ច័ន្ទណា ភេទប្រុស អាយុ១៧ឆ្នាំ នៅភូមិចម្ការតាដោក ឃុំប្ញស្សីក្រោក អង្គុយពីក្រោយ និង៩-ឈ្មោះ កាំង ឆេនអាង ភេទប្រុស អាយុ១៦ឆ្នាំ អ្នកបើកម៉ូតូបង្ហោះ នៅភូមិប្រឡាយហ្លួង ឃុំឫស្សីក្រោក ស្រុកមង្គលបុរី ។
មានប្រសាសន៍នាឱកាសនោះ លោកស្នងការ អាត់ ខែម បានសម្តែងនូវការសោកស្តាយ ចំពោះសកម្មភាពរបស់ក្មួយៗទាំងនេះ ដែលជាទំពាំងស្នងឫស្សីសម្រាប់ប្រទេសជាតិ បែរជានាំគ្នាយកពេលវេលាដ៏មានតម្លៃទៅធ្វើអំពើអបាយមុខមិនគប្បី ដែលសង្គមស្អប់ខ្ពើម ។ លោកបានណែនាំថា គួរណាស់តែក្មួយៗ ចៅៗ យកពេលវេលាទៅសិក្សារៀនសូត្រ ឬក៏ជួយកិច្ចការងារឪពុកម្តាយនៅផ្ទះ ។
ជាមួយគ្នានេះ លោកឧត្តមសេនីយ៍ស្នងការក៏បានបញ្ជាក់ថា ទន្ទឹមនឹងសមត្ថកិច្ចធ្វើការអប់រំនោះ ក៏សូមឲ្យឪពុកម្តាយឬអាណាព្យាបាល ត្រូវតែយកចិត្តទុកដាក់តាមដានពីសកម្មភាពកូនចៅរបស់ខ្លួនជាមុនសិន បន្ទាប់មកលោកគ្រូអ្នកគ្រូ ដែលជាអាណាព្យបាលទី២ ។
លោកឧត្តមសេនីយ៍ទោ អាត់ ខែម បានណែនាំដល់ក្មួយៗប្រុសស្រីទាំង៩នាក់ មិនត្រូវប្រព្រឹត្តសកម្មភាពណាមួយដែលសង្គមស្អប់ខ្ពើម គឺត្រូវនៅឲ្យឆ្ងាយពីគ្រឿងញៀន គោរពច្បាប់ចរាចរណ៍ ត្រូវធ្វើជាកូនល្អ មិត្តល្អ និងសិស្សល្អ និងត្រូវខិតខំរៀនសូត្រដើម្បីយកចំណេះដឹងកសាងសង្គមគ្រួសារ និងប្រទសជាតិឲ្យមានការរីកចម្រើន។
ក្រោយពីលោកស្នងការធ្វើការអប់រំណែនាំ រួចមក ក្មេងទំនើងប្រុសស្រីទាំង៩នាក់ បានធ្វើកិច្ចសន្យា និងបញ្ឈប់មិនឲ្យមានមុខជាលើកទី២ទៀតឡើយ បើមិនដូច្នោះទេនឹងអនុវត្តតាមវិធានការរដ្ឋបាល រួចក៏បានប្រគល់ជូនឪពុក ម្តាយ និងអាណាព្យាបាលយកទៅធ្វើការអប់រំបន្តទៀត ៕
ចែករំលែកព័តមាននេះ