រាជធានីភ្នំពេញ៖ ក្រុមហ៊ុនវិនិយោគជប៉ុនមួយដែលកន្លងមកបានបោះទុនវិនិយោគនៅកម្ពុជាលើការផលិតការផលិតម៉ូទ័រនាំចេញទៅកាន់ទីផ្សារអន្តរជាតិនោះ ពេលនេះក្រុមហ៊ុនក៏បានទទួល ក្រុមហ៊ុនទើបទទួលបានការអនុញ្ញាតឱ្យផលិតឧបករណ៍សម្រាប់ល្បែងកម្សាន្តរបស់ក្មេងទៀត ដែលផលិតផលនេះគឺនឹងបិតស្លាកថា Made in Cambodia មានន័យថាផលិតនៅកម្ពុជា ហើយផលិតផលនេះ គឺនាំចេញទៅទូទាំងពិភពលោក។ នេះជាការបញ្ជាក់របស់លោក យូស៊ីហ៊ីដសា កៃណូម៉ា (Yoshihisa Kainuma) ប្រធានក្រុមហ៊ុនមីនីបៀ របស់ប្រទេសជប៉ុន នាឱកាសត្រូវបានអនុញ្ញាតិជួប ពិភាក្សាការងារជាមួយសម្តេចតេជោ ហ៊ុន សែន នាយករដ្ឋមន្ត្រីកម្ពុជាកាលពីថ្ងៃទី ១១ ខែធ្នូ ។
ជាការឆ្លើយតប សម្តេចតេជោ ហ៊ុន សែន បានសម្តែងនូវការរីករាយចំពោះវឌ្ឍនភាពរបស់ក្រុមហ៊ុនមីនីបៀរ ដែលមានការរីកធំធាត់ពីមួយថ្ងៃទៅមួយថ្ងៃ។ កាលដើមឡើយ សម្ដេចតេជោធ្លាប់មានប្រសាសន៍ថា មិនថាក្រុមហ៊ុនតូច ក្រុមហ៊ុនធំទេឱ្យតែមកដល់កម្ពុជា គឺដល់មុន គឺទទួលមុន ក្នុងន័យនេះកាលដើមឡើយ ក្រុមហ៊ុនមីនីបៀ គឺជាក្រុមហ៊ុនតូចមួយតែពេលនេះក្រុមហ៊ុនមីនីប៊ៀ គឺជាក្រុមហ៊ុនដ៏ធំបំផុតមួយ ដែលមានកម្មកររហូតដល់ ៧ពាន់នាក់និងឈានរហូតដល់ ២ ម៉ឺននាក់ ហើយក៏កំពុងតែផលិតនូវផលិតផលដែលមានបច្ចេកវិទ្យាទំនើបៗផងដែរ។ ជាងនេះទៀត ការវិនិយោគបច្ចេកវិទ្យាក៏ដូចជាការយកចិត្តទុកដាក់ខ្ពស់ទៅលើកម្មករកម្មការិនីកម្មការិនី គឺនាំឲ្យក្រុមហ៊ុននេះឈានមុខគេលំដាប់ទី១។
ពាក់ព័ន្ធទៅនឹងការពិនិត្យឧបករណ៍ល្បែងកំសាន្ត ដែលបិទស្លាកថាផលិតនៅ កម្ពុជា, សម្ដេចបានមានប្រសាសន៍ថា នេះជាមោទនភាពណាស់ ដែលកម្ពុជាយើងបានឈានដល់ការផលិតឧបករណ៍ ហើយដាក់ឈ្មោះថាផលិតនៅកម្ពុជា ហើយនាំចេញទៅប្រើប្រាស់ នៅស្រុកក្រៅ ។
នៅក្នុងកិច្ចប្រជុំដាច់ដោយឡែកមួយទៀត ក្នុងន័យបង្កើនការវិនិយោគក្នុងប្រទេសកម្ពុជាបន្ថែម វិនិយោគិនជប៉ុននិងកម្ពុជា បានជួបជជែកពិភាក្សា និងស្វែងរកដៃគូរដើម្បី បង្កើតឱកាសវិនិយោគនៅក្នុងប្រទេសកម្ពុជា ក្នុងពេលសក្ដានុពលស្ទើរតែគ្រប់វិស័យកំពុងផ្ដល់ដំណោយផលដល់វិនិយោគិនមកពីគ្រប់ទិសទីក្នុងការដាក់ទុនវិនិយោគ ដែលជំនួបនេះ បានធ្វើឡើងនៅការិយាល័យកណ្ដាលធនាគារអេស៊ីលីដា ដោយរៀបចំឡើងដោយធនាគារអេស៊ីលីដាភីអិលស៊ី និងសមាគមកម្ពុជាជប៉ុន ។
លោកបណ្ឌិតអ៊ិន ចាន់នីប្រធាននាយកប្រតិបត្តិធនាគារអេស៊ីលីដា ភីអិលស៊ី និងជាប្រធានសមាគមធនាគារកម្ពុជាផងដែរនោះបានមានប្រសាសន៍ថា ការវិនិយោគរបស់វិនិយោគិនជប៉ុន នឹងនាំមកនូវម៉ាកយីហោល្បីៗ និងជំនឿទុកចិត្តខ្ពស់ ជាពិសេសនោះគឺការវិនិយោគប្រកបដោយគុណភាព ។ វិនិយោគិនជប៉ុនជាអ្នកវិនិយោគដែលគិតគូរពីយុទ្ធសាស្ត្ររយៈពេលវែង មិនមែនជាអ្នកវិនិយោគមួយឆាវៗនោះទេ ហើយជប៉ុនជាអ្នកវិនិយោគដែលមានប្រភពទុនច្បាស់លាស់ ជាពិសេសជាងគេនោះគឺជាអ្នកដែលគោរពច្បាប់របស់ប្រទេសដែលខ្លួនវិនិយោគ ។
លោកបានបន្តថា បច្ចុប្បន្ន កម្ពុជាមានសក្ដានុពលស្ទើរតែគ្រប់វិស័យ ដែលអាចទាក់ទាញវិនិយោគិនជប៉ុនមកបណ្ដាក់ទុនវិនិយោគនៅក្នុងប្រទេសកម្ពុជា ក្នុងនោះកម្ពុជា បានបើកទូលាយដល់វិនិយោគិនមកពីគ្រប់ទិសទី ក្នុងនោះវិនិយោគិនអាចប្រើរូបិយបណ្ណអន្តរជាតិដុល្លារសម្រាប់ការទូទាត់ក្នុងការវិនិយោគរបស់ខ្លួន ។ ក្រៅពីនោះការអនុគ្រោះពន្ធរបស់រដ្ឋាភិបាលកម្ពុជាក៏ជាកត្តាទាក់ទាញ និងហេតុផលសំខាន់ដែលវិនិយោគិនបរទេសគួរបណ្ដាក់ទុនវិនិយោគផងដែរ ។
លោក Takahashi Fumiaki ប្រធានសមាគមកម្ពុជា ជប៉ុន និងជាអតីតរាជទូតជប៉ុនប្រចាំកម្ពុជា បានអោយដឹងថាលោកធ្លាប់ជាអគ្គរាជទូតជប៉ុនប្រចាំកម្ពុជា កាលពីឆ្នាំ ២០០៣ ដល់ឆ្នាំ ២០០៧ ហើយលោកមើលឃើញថារយៈពេលតាំងពីលោកមកកាន់ជារាជទូតរហូតមកដល់ពេលនេះ សេដ្ឋកិច្ចកម្ពុជា បានរក្សាកំណើនថេរល្អប្រសើរ កម្រមានប្រទេសណាធ្វើបាន ។ បច្ចុប្បន្ននេះ សក្ដានុពលវិនិយោគនៅក្នុងប្រទេសកម្ពុជា មានស្ទើរតែគ្រប់វិស័យដែលជប៉ុនគួរតែមកបណ្ដាក់ទុនវិនិយោគ ដូចជាអចលនទ្រព្យ សេវាហិរញ្ញវត្ថុ ផ្សារទំនើបនិងសេវាកម្មជាច្រើនទៀត ។
លោកបានបន្តថា តាមរយៈកិច្ចជំនួបរវាងធុរជនកម្ពុជា និងជប៉ុន លោករំពឹងថា វិនិយោគិនជប៉ុននឹងទទួលបាននូវការយល់ដឹងបន្ថែមទៀត ពីឱកាសវិនិយោគនិងស្ថានភាពម៉ាក្រូសេដ្ឋកិច្ចក្នុងប្រទេសកម្ពុជា ។ លោកថា៖« វិនិយោគិនជប៉ុន នឹងមកកម្ពុជាបន្ថែមទៀត ដើម្បីស្វែងរកការវិនិយោគនានាទៅតាមជំនាញនិងបទពិសោធន៍របស់ពួកគេ ។ វិនិយោគិនជប៉ុនអាចសម្លឹងមើលពីឱកាសក្នុងការបង្កើតរោងចក្រដើម្បីផលិតនូវសម្ភារៈដែលមានទីផ្សារនាំចេញទៅកាន់បរទេសដូចជាទីផ្សារអឹរ៉ុបអាមេរិក និងទីផ្សារដទៃទៀតដែលជាដៃគូរពាណិជ្ជកម្មជាមួយភាគីកម្ពុជា » ។
គួរបញ្ជាក់ថា ក្នុងកិច្ចពិភាក្សារវាងធុរជនកម្ពុជា និងជប៉ុន កាលពីល្ងាចថ្ងៃទី ១១ ធ្នូ ២០១៩នេះ ឃើញថាមានវត្តមានក្រុមហ៊ុនធំៗ នៅកម្ពុជាជាច្រើនបានចូលរួមជជែកនិងផ្សព្វផ្សាយពីឱកាសវិនិយោគនៅកម្ពុជា ទៅកាន់ភាគីជប៉ុន ក្នុងគោលបំណងទាក់ទាញ ការបណ្ដាក់ទុនពីសំណាក់វិនិយោគិនជប៉ុន ។
សូមរំលឹកថា គិតមកដល់បច្ចុប្បន្ននេះ ជប៉ុនបានដាក់ទុនវិនិយោគក្នុងប្រទេសកម្ពុជា មានទឹកប្រាក់ប្រមាណ២,៥ពាន់លានដុល្លារអាមេរិក ក្នុងការផលិតគ្រឿងបង្គុំអគ្គិសនី គ្រឿងបង្គុំរថយន្ត និងបរិក្ខារជាច្រើនទៀត ដែលអាចផ្ដល់ឱកាសការងារដល់ពលរដ្ឋកម្ពុជារាប់ម៉ឺនកន្លែង ។ ដោយឡែកសម្រាប់ទំហំពាណិជ្ជកម្មរវាងកម្ពុជា ជប៉ុនវិញ ក្នុងឆ្នាំ២០១៨កន្លងទៅនេះ សម្រេចបានទឹកប្រាក់ប្រមាណ ១,៥ពាន់លានដុល្លារអាមេរិក ក្នុងនោះកម្ពុជានាំចេញទៅប្រទេសជប៉ុនក្នុងទំហំទឹកប្រាក់ប្រមាណ១ពាន់លានដុល្លារអាមេរិក ហើយជប៉ុននាំមកកម្ពុជាវិញមានទំហំទឹកប្រាក់ប្រមាណ ៥០០លានដុល្លារអាមេរិក ៕ កែសម្រួលដោយ ៖ សុឃាក់
ចែករំលែកព័តមាននេះ