រាជធានីភ្នំពេញ ៖ រថយន្តស្ទួចមួយគ្រឿងត្រូវបានអគ្គីភ័យឆាបឆេះយ៉ាងន្ធោសន្ធៅ បណ្តាលអោយរងការខួចខាតកាប៊ីនទាំងស្រុង ខណៈពេលដែលម្ចាស់ហៅជាងមកផ្សារជើងកាប៊ីន រួចទៅហូបបាយ ។
ហេតុការណ៍ខាងលើនេះបង្កអោយមានការភ្ញាក់ផ្អើលកាលពីវេលាម៉ោង១២និង៣០នាទីថ្ងៃត្រង់ថ្ងៃទី១៣ ខែធ្នូ ឆ្នាំ២០១៩ នៅចំណុចក្នុងដីឡូតិ៍មួយកន្លែង ស្ថិតក្នុងភូមិសំរោង សង្កាត់ឃ្មួញ ខណ្ឌសែនសុខ រាជធានីភ្នំពេញ។
រថយន្តដែលត្រូវភ្លើងឆេះជាប្រភេទរថយន្តស្ទួច ពាក់ស្លាកលេខ ភ្នំពេញ ៣A-៤៩២២ មានម្ចាស់ឈ្មោះសុខ ធី អាយុ៣២ឆ្នាំ ។
តាមប្រភពព័ត៌មានអោយដឹងថា នៅមុនពេលកើតហេតុ ម្ចាស់រថយន្តបានលើកកាប៊ីន រថយន្តស្ទួច ហើយឱ្យជាងផ្សារជើង លុះដល់ម៉ោងបាយ គាត់ក៏ទៅហូបបាយនៅផ្ទះ ស្រាប់តែភ្លើងបានឆាបឆេះយ៉ាងសន្ធោសន្ធៅតែម្តង ។
តាមព័ត៌មានអោយដឹងទៀតថា ភ្លាមៗនោះអ្នកភូមិបាននាំគ្នាទាញទុយោទឹក និងយកបំពង់ពន្លត់អគ្គីភ័យមកបាញ់ពន្លត់អស់៦បំពង់ ទើបភ្លើងបានរលត់ទៅវិញ តែបានឆេះបំផ្លាញកាប៊ីនរថយន្តទាំងស្រុង ចំណែកតូ, កង់ និងធុងសាំងរថយន្តពុំបានឆេះរងការខូចខាតឡើយដោយសារអ្នកនៅក្បែរនោះនាំគ្នាជួយពន្លត់ទាន់។
នៅក្នុងហេតុការណ៍ខាងលើនោះដែរ រថយន្តពន្លត់អគ្គីភ័យមួយគ្រឿងបានចុះទៅជួយអន្តរាគមន៍ដែរ តែពុំបានបាញ់ទឹកពន្លត់នោះទេ ។ ទាក់ទិននឹងការកើតមានអគ្គីភ័យខាងលើ ត្រូវបានម្ចាស់អះអាងថាបណ្តាលមកពីផ្សារជើងកាប៊ីនរថយន្ត ហើយធ្លាក់កម្ទេចទៅប៉ះនឹងពូក ក៏ក្លាយជាអគ្គីភ័យឆាបឆេះរថយន្តតែម្តង៕ (កែសម្រួលដោយ ៖ ធីតា)
ចែករំលែកព័តមាននេះ