កីឡាករកូឡុំប៊ី Nairo Alexander Quintana បានសម្តែងនូវក្តីរីករាយជាខ្លាំង បន្ទាប់ពីបានយកឈ្នះជើងឯកប្រណាំងកង់កម្មវិធី Tour of Itaty នៅប្រទេសអុីតាលី កាលពីថ្ងៃអាទិត្យទី១ មិថុនា ។ ការប្រណាំងត្រូវបញ្ចប់ជាមួយនឹងដំណាក់ផ្តាច់ព្រ័ត្រដែលមានចម្ងាយផ្លូវ១៧២គីឡូម៉ែត្រនៅទីក្រុង Trieste ប្រទេសអុីតាលី ។
បន្ទាប់ពីឆ្លងកាត់ការប្រណាំងអស់២១ដំណាក់ និងមានចម្ងាយផ្លូវសរុប៣៤៤៥,៤គីឡូម៉ែត្ររួចមក Alexander Quintana ដែលជាអ្នកជិះឱ្យក្រុម Movistar Team បានយកឈ្នះជើងឯក បន្ទាប់ពីបានប្រើអស់ថិរវេលាសរុបតិចជាងគេបំផុតគឺ៨៨ម៉ោង១៤នាទីនិង៣២វិនាទីនាំមុខកីឡាករមិត្តរួមជាតិ Rigoberto Uran Uran ជិះកង់ឱ្យក្រុម Omega Pharma – Quick-Step ដែលបានប្រើអស់ថិរវេលាច្រើនជាង២នាទីនិង៥៨វិនាទី ។ ឯកីឡាករម្ចាស់ផ្ទះ Fabio Aru ស្ថិតនៅលំដាប់ទី៣បន្ទាប់ពីប្រើថិរវេលាច្រើនជាងកីឡាករ Alexander Quintana ៤នាទីនិង៤វិនាទី ។
បន្ទាប់ពីដណ្តើមបានពានជើងឯក Alexander Quintana បានថ្លែងថា៖ «គឺជាការប្រណាំងមួយដែលខ្ញុំរងការលំបាកជាងអ្នកណាទាំងអស់។ ខ្ញុំមានបញ្ហាសុខភាពរាងកាយខ្លះៗហើយកម្លាំងមានត្រឹម៦០ភាគរយប៉ុណ្ណោះ ។ នៅលើកំណាត់ផ្លូវខ្ពស់បំផុត ខ្ញុំរងាស្ទើរកកឈាម ។ នេះជាជ័យជម្នះយ៉ាងធំធេងបំផុត ។
ដោយឡែកដំណាក់ទី២១ដែលជាដំណាក់ផ្តាច់ព្រ័ត្រមានចម្ងាយផ្លូវ១៧២គីឡូម៉ែត្រចេញដំណើរពីទីក្រុង Gemonaឆ្ពោះទៅកាន់ទីក្រុងTriesteប្រទេសអុីតាលី ហើយជ័យជម្នះបានទៅលើកីឡាករស្លូវេនី Luka Mezgec ។Mezgecដែលជាអ្នកជិះឱ្យក្រុម Team Giant Shimanoបានបញ្ចប់ដំណាក់នេះដោយប្រើអស់ថិរវេលា៤ម៉ោង២៣នាទីនិង៥៨វិនាទីយកឈ្នះកីឡាករម្ចាស់ផ្ទះអុីតាលី Giacomo Nizzoloជិះឱ្យក្រុម Trek Factory Racingដែលបានប្រើអស់ថិរវេលាច្រើនជាងស្មើជាមួយកីឡាករអាមេរិក Tyler Farrar ។
សូមបញ្ជាក់ថា ការប្រណាំងកម្មវិធី Tour of Italy ឆ្នាំនេះចែកចេញជា២១ដំណាក់ និងមានចម្ងាយផ្លូវសរុប៣៤៤៥,៤គីឡូម៉ែត្រ ។ ការប្រណាំងបានចាប់ផ្តើមកាលពីថ្ងៃទី៩ ឧសភាមកម៉្លេះ ៕
ចែករំលែកព័តមាននេះ