រាជធានីភ្នំពេញ ៖ សម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃបានឲ្យដឹងថា បច្ចុប្បន្ននេះឧក្រិដ្ឋជនបានកំពុងប្រើប្រាស់បច្ចេកវិទ្យាទំនើបក្នុងការទាក់ទាញជនរងគ្រោះរហូតឈានដល់ការជួញដូរមនុស្ស ការបំពានផ្លូវភេទ ពិសេសលើអនីតិជនតាមប្រព័ន្ធអនឡាញ…
រាជធានីភ្នំពេញ ៖ សម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃបានឲ្យដឹងថា បច្ចុប្បន្ននេះឧក្រិដ្ឋជនបានកំពុងប្រើប្រាស់បច្ចេកវិទ្យាទំនើបក្នុងការទាក់ទាញជនរងគ្រោះរហូតឈានដល់ការជួញដូរមនុស្ស ការបំពានផ្លូវភេទ ពិសេសលើអនីតិជនតាមប្រព័ន្ធអនឡាញ ។
សម្តេច ស ខេង ប្រធានគណៈកម្មាធិការជាតិប្រយុទ្ធប្រឆាំងការជួញដូរមនុស្សបានលើកឡើងក្នុងទិវាជាតិប្រយុទ្ធប្រឆាំងការជួញដូរមនុស្ស១២ ធ្នូ លើកទី១៣ កាលពីរសៀលថ្ងៃទី១២ ធ្នូ នេះ នៅមជ្ឈមណ្ឌលកោះពេជ្រយ៉ាងដូច្នេះថា រាជរដ្ឋាភិបាលបានខិតខំប្រឹងប្រែងក្នុងការអប់រំផ្សព្វផ្សាយដល់សិស្សនិស្សិត និងប្រជាពលរដ្ឋឲ្យបានយល់ដឹងអំពីកលល្បិចជនល្មើសជួញដូរមនុស្ស និងផលប៉ះពាល់ក្នុងការធ្វើទេសន្តប្រវេសន៍ ដោយប្រថុយប្រថានដែលអាចកើតមានគ្រោះថ្នាក់ជាយថាហេតុ ។
ក្នុងនោះក្រសួងពាក់ព័ន្ធ រួមជាមួយអាជ្ញាធរសមត្ថកិច្ចគ្រប់លំដាប់ថ្នាក់ និងប្រព័ន្ធផ្សព្វផ្សាយព័ត៌មានបានដើរតួនាទីយ៉ាងសំខាន់ក្នុងការជម្រុញការផ្សព្វផ្សាយដល់គ្រប់ស្រទាប់យុវជន ប្រជាពលរដ្ឋនៅជនបទ និងតំបន់សេវាកម្សាន្តឲ្យយល់ដឹងពីគ្រប់ល្បិចកលរបស់ជនខិតខូច ដែលឆ្លៀតឱកាសប្រើគ្រប់មធ្យោបាយ ដើម្បីអូសទាញប្រជាពលរដ្ឋឲ្យធ្លាក់ចូលក្នុងអន្ទាក់ គ្រោះថ្នាក់នៃការជួញដូរមនុស្ស ។
សម្តេចបានបញ្ជាក់ថា ៖«យើងទាំងអស់គ្នាដឹងច្បាស់ហើយអំពីជូញដូរមនុស្សជាប្រភេទឧក្រិដ្ឋកម្មឆ្លងដែនដែលប្រកបដោយគ្រោះថ្នាក់ចំពោះមនុស្សគ្រប់វ័យភេទ ក្នុងសង្គមគ្រោះថ្នាក់ ជាញឹកញាប់ត្រូវតែរកឃើញក្នុងចំណោមអ្នកធ្វើចំណាកស្រុក ឬទេសន្តប្រវេសន៍ដែលស្វែងរកការងារ និងប្រាក់ចំណូលដែលនៅឆ្ងាយពីទីកន្លែងរស់នៅ» ។
សម្តេច ស ខេង បានបញ្ជាក់ទៀតថា ៖« រៀងរាល់ឆ្នាំមនុស្សរាប់សែន រាប់លាននាក់ ត្រូវបានបំផ្លាញដោយឧក្រិដ្ឋជនជួញដូរមនុស្សនៅគ្រប់ទីកន្លែង ក្នុងពិភពលោក ។ ជនល្មើសបានរកគ្រប់ល្បិចកលដ៏ស្មោគគ្រោកពង្រាយ បណ្តាញធ្វើសកម្មភាពកេងប្រវ័ញ្ច ជនរងគ្រោះនៅគ្រប់ដំណាក់កាល ទាំងដោយផ្ទាល់ និងប្រយោលតាមរយៈបណ្តាញទំនាក់ទំនងអនឡាញ ឬតាមបច្ចេកវិទ្យាទំនើប ដើម្បីទាក់ទាញជនរងគ្រោះឲ្យចូលក្នុងអន្ទាក់របស់ខ្លួន និងគេចវេសពីសមត្ថកិច្ច ដែលបច្ចុប្បន្ននេះប្រព័ន្ធអនឡាញ និងបណ្តាញផ្សព្វផ្សាយសង្គមក៏បានបង្កើតជា បញ្ហាថ្មីគឺ«ការជួញដូរមនុស្ស និងការបំពានផ្លូវភេទ ជាពិសេស លើអនីតិជនតាមប្រព័ន្ធអនឡាញ»។
សម្តេច ស ខេង បានអះអាងថា គណៈកម្មាធិការជាតិប្រយុទ្ធប្រឆាំងអំពើជួញដូរមនុស្សបាន បន្តធ្វើឲ្យកាន់តែសកម្មអនុវត្តនូវវិធានការច្បាប់ឲ្យកាន់តែម៉ឺងម៉ាត់ និងជម្រុញការអនុវត្ត ផែនការយុទ្ធសាស្ត្រជាតិប្រឆាំងអំពើជួញដូរមនុស្សសម្រាប់ឆ្នាំ២០១៩ -២០២៣ឲ្យបានស ម្រេចគោលដៅតាមការគ្រោងទុក ៕
ចែករំលែកព័តមាននេះ