ខេត្តបន្ទាយមានជ័យ ៖ ស្រូវចំនួន៦០០តោនបានរួចផុតពីគ្រោះអគ្គីភ័យ បន្ទាប់ពីមានអគ្គិភ័យឆាបឆេះក្នុងរោងម៉ាស៊ីនកិនស្រូវ បង្កការភ្ញាក់ផ្អើលដល់សមត្ថកិច្ច និងប្រជាពលរដ្ឋនាំគ្នាជួយពន្លត់ទាន់ពេលវេលា ។ ហេតុការណ៍នេះបានកើតឡើងកាលពីវេលាម៉ោង៤និង៣០នាទីរសៀលថ្ងៃទី១២ ខែធ្នូ ឆ្នាំ២០១៩ នៅចំណុចរោងម៉ាស៊ីនកិនស្រូវយីហោ «ឆានគង់» ដែលមានម្ចាស់ឈ្មោះកិន ហាក់លី ភេទប្រុស អាយុ៥៩ឆ្នាំ ស្ថិតក្នុងភូមិព្រូហ៊ួត សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ ។
នៅក្នុងហេតុការណ៍គ្រោះអគ្គីភ័យខាងលើនេះ គឺមានរថយន្តពន្លត់អគ្គីភ័យរបស់ស្នងការនគរបាលខេត្តចំនួន២គ្រឿងដឹកនាំដោយលោកវរសេនីយ៍ឯកប៊ុន ផេង ស្នងការរងទទួលផែនការងារគ្រប់គ្រងអាវុធជាតិផ្ទុះ និងអគ្គីភ័យ រួមទាំងកងកម្លាំងនគរបាលប្រចាំការរបស់ផែនការងារធនធានមនុស្ស និងប្រជាពលរដ្ឋបានចុះជួយអន្តរាគមន៍ពន្លត់បានទាន់ពេលវេលា ដែលមិនបណ្តោយឲ្យអគ្គីភ័យឆ្លងរាលដាលដល់ឃ្លាំងផ្ទុកស្រូវ។ ពេលហេតុការណ៍ខាងលើកើតឡើង គេឃើញលោកហ៊ិល រីយ៉ា អភិបាលក្រុងសិរីសោភ័ណ និងអាជ្ញាធរសង្កាត់ចុះទៅដល់កន្លែងកើតហេតុផងដែរ ។
លោកវរសេនីយ៍ឯក ប៊ុន ផេង ស្នងការរងទទួលផែនគ្រប់គ្រងអាវុធជាតិផ្ទុះបង្ការពន្លត់អគ្គីភ័យ បានឲ្យដឹងថា ៖ បើតាមការរៀបរាប់ពីលោកកិន ហាក់លី ជាម្ចាស់រោងម៉ាស៊ីនកិនស្រូវកើតហេតុខាងលើបានឲ្យដឹងថា មុនដំបូង គាត់បានឮស្នូរផ្ទុះ ហើយក៏ទៅមើល ស្រាប់តែឃើញមានអណ្តាតភ្លើងឆេះក្នុងរោងម៉ាស៊ីនជិតស៊ីទែនប្រេងម៉ាស៊ូត ធ្វើឲ្យគាត់មានការភ័យស្លន់ស្លោយ៉ាងខ្លាំង ហើយភ្លាមៗនោះក៏មានរថយន្តពន្លត់អគ្គីភ័យបានចុះមកជួយអន្តរាគមន៍ ព្រមទាំងកម្លាំងនគរបាលជាច្រើននាក់ រួមនិងប្រជាពលរដ្ឋផងដែរ ទើបភ្លើងមិនអាចរាលដាលដល់ឃ្លាំងស្តុកស្រូវប្រមាណជា៦០០តោន ។
ជាមួយគ្នានោះដែរ លោកកិន ហាក់លី ម្ចាស់រោងម៉ាស៊ីន បានថ្លែងអំណរគុណដល់ក្រុមរថយន្តពន្លត់អគ្គីភ័យ និងកងកម្លាំងនគរបាល រួមទាំងប្រជាពលរដ្ឋដែលនៅទីនោះបានជួយអន្តរាគមន៍ពន្លត់ទាន់ពេលវេលា ទប់ស្កាត់ភ្លើងមិនអាចឆេះរាលដាលដល់ឃ្លាំងស្រូវចំនួន៦០០តោននោះផងដែរ។
លោកស្នងការរងបានបញ្ជាក់ថា ក្នុងប្រតិបត្តិការពន្លត់អគ្គិភ័យខាងលើនេះ មានរថយន្តចំនួន២គ្រឿង ប្រើប្រាស់ទឹកអស់ចំនួន៣រថយន្ត ទើបអាចគ្រប់គ្រងស្ថានការណ៍ ដោយភ្លើងបានមិនឆេះឆ្លងរាលដាលដល់ឃ្លាំងដាក់ស្រូវនោះទេ ។ បើតាមការពិនិត្យរបស់កម្លាំងជំនាញបានឱ្យដឹងថា អគ្គីភ័យនេះកើតឡើង បណ្តាលមកពីទុស្សេខ្សែភ្លើងធំដែល.តចូលទៅក្នុងរោងចក្រ ។ ចំពោះការខូចខាតមានដូចជា ក្បាលម៉ាស៊ីនកិនស្រូវ១គ្រឿង និងប្រពន្ធ័ខ្សែប៉ុណ្ណោះ តែពុំមានមនុស្សណាម្នាក់រងគ្រោះថ្នាក់អ្វីឡើយ៕ (កែសម្រួលដោយ ៖ ធីតា)
ចែករំលែកព័តមាននេះ