រាជធានីភ្នំពេញ ៖ សេចក្តីរាយការណ៍បឋមបានឲ្យដឹងថា រោងស្តុកថ្នាំបុរាណខ្មែរប្រក់ស័ង្កសីមួយកន្លែង ត្រូវបានភ្លើងឆាបឆេះយ៉ាងសន្ធោសន្ធៅ បង្កឱ្យមានការភ្ញាក់ផ្អើលដល់បងប្អូនប្រជាពលរដ្ឋ និងរថយន្តពន្លត់អគ្គិភ័យចុះមកធ្វើការអន្តរាគមន៍ កាលពីវេលាម៉ោង៩និង៣០នាទីយប់ ថ្ងៃទី១២ ខែធ្នូនេះ ត្រង់ចំណុចផ្ទះលក់ឱសថបុរាណខ្មែរមួយកន្លែង នៅតាមបណ្ដោយផ្លូវបេតុង ក្នុងភូមិដីថ្មី សង្កាត់គោកឃ្លាង ខណ្ឌសែនសុខ ។
តាមប្រភពពីសមត្ថកិច្ចមូលដ្ឋានដែលបានសាកសួរជុំវិញកន្លែងកើតហេតុបានឲ្យដឹងថា មុនពេលកើតហេតុប្រជាពលរដ្ឋបានប្រទះឃើញមានផ្សែងហុយចេញពីជាន់ទី១ នៃរោងប្រក់ស័ង្កសីដែលជារោងស្តុកថ្នាំបុរាណខ្មែរខាងលើ ។ មួយសន្ទុះក្រោយមក ក៏ស្រាប់តែលេចចេញជាអណ្ដាតភ្លើងឆាបឆេះសំបកឈើ និងស្លឹកឈើស្ងួតៗ ដែលគេស្តុកទុកក្នុងរោងប្រក់ស័ង្កសីខាងលើ ដើម្បីធ្វើជាឱសថព្យាបាលជំងឺបង្កឲ្យមានការភ្ញាក់ផ្អើលយ៉ាងខ្លាំងដល់បងប្អូនប្រជាពលរដ្ឋដែលរស់នៅជុំវិញកន្លែងកើតហេតុ ធ្វើការនាំគ្នាជួយទាញទុយោទឹក និងបំពង់ពន្លត់អគ្គិភ័យមកបាញ់ពន្លត់ និងទាក់ទងប្រាប់សមត្ថកិច្ចមូលដ្ឋាន រួមជាមួយនឹងរថយន្តពន្លត់អគ្គិភ័យឱ្យចុះមកជួយធ្វើការអន្តរាគមន៍។
បន្ទាប់មកក៏ឃើញមានសមត្ថកិច្ចមូលដ្ឋាន និងរថយន្តពន្លត់អគ្គិភ័យបានចុះមកធ្វើការអន្តរាគមន៍ និងធ្វើការបាញ់ពន្លត់ ។ ប៉ុន្តែដោយសារតែនៅខាងក្នុងរោងប្រក់ស័ង្កសីកើតហេតុខាងលើ សុទ្ធសឹងតែជាសំបកឈើ និងស្លឹកឈើជាច្រើន ធ្វើឲ្យភ្លើងឆេះ និងមានរងើកងំខ្លាំងទើបកម្លាំងជំនាញពិបាកក្នុងការបាញ់ទឹកពន្លត់ឲ្យបានទាន់ពេលវេលា ។ រហូតអស់រយៈពេលប្រមាណ១ម៉ោងកន្លះ បន្ទាប់ពីធ្វើការបាញ់ទឹកពន្លត់ភ្លើងក៏បានរលត់ទៅវិញជាស្ថាពរ គឺរលត់នៅម៉ោង១១យប់ ថ្ងៃដដែល ។
សមត្ថកិច្ចបានបន្តឲ្យដឹងថា ហេតុការណ៍ខាងលើ គឺបានប្រើប្រាស់រថយន្តពន្លត់អគ្គិភ័យអស់ទឹកចំនួន៩គ្រឿង ដោយក្នុងនោះប្រើប្រាស់រថយន្តរបស់ការិយាល័យបង្ការ និងពន្លត់អគ្គិភ័យរបស់ស្នងការដ្ឋាននគរបាលជាតិភ្នំពេញចំនួន២គ្រឿងបាញ់ទឹកអស់ចំនួន៥គ្រឿង និងរថយន្តពន្លត់អគ្គិភ័យរបស់កងរាជអាវុធហត្ថរាជធានីភ្នំពេញ ចំនួន៤គ្រឿង បាញ់អស់ទាំង៤គ្រឿង ។ មិនបណ្ដាលឲ្យឆាបឆេះរាលដាលដល់ផ្ទះប្រជាពលរដ្ឋជិតខាងនោះទេ គឺខូចខាតតែរោងប្រក់ស័ង្កសីដែលមានទំហំ៤,៥ម៉ែត្រគុណនឹង១២ម៉ែត្រ និងថ្នាំបុរាណខ្មែរដែលស្តុកនៅខាងក្នុង គឺឆេះខូតខាតស្ទើរទាំងស្រុង ។
ចំពោះមូលហេតុសមត្ថកិច្ចបានសន្និដ្ឋានជំហានដំបូងថា បណ្ដាលមកពីឆ្លងចរន្តអគ្គិសនីចេញពីជាន់ទី១ នៃរោងខាងលើ ៕ កែសម្រួលដោយ ៖ សុឃាក់
ចែករំលែកព័តមាននេះ