ខេត្តបាត់ដំបង ៖ កម្ពុជា-ថៃ បានជួបប្រជុំគ្នានៅក្នុងសាលប្រជុំមន្ទីរពេទ្យយោធា(ព២)ខេត្តបាត់ដំបង នៅ រសៀលថ្ងៃទី១២ ធ្នូ ក្រោមអធិបតីភាពលោកឧត្តមសេនីយ៍ត្រី វេជ្ជ សុខវណ្ណារ៉ា នាយកមន្ទីរពេទ្យយោធភូមិភាគទី៥(ព២) និងសហការីខាងភាគីថៃនៃមន្ទីពេទ្យបាងកកចន្ទបូរី (មានខ្សែបន្ទាត់ព្រំដែនជាប់គ្នា) ដើម្បីរៀបចំកម្មវិធីរត់ម៉ារ៉ាតុង សម្រាប់មនុស្សធម៌រួមគ្នាមួយ ។
លោកឧត្តមសេនីយ៍ត្រី វេជ្ជ សុខ វណ្ណារ៉ា បានឯកភាពក្នុងការរួមគ្នាបង្កើតកម្មវិធីរត់ម៉ារ៉ាតុងនៅខេត្តបាត់ដំបងនេះ ដោយបានកំណត់យកថ្ងៃទី១៦ កុម្ភៈ ឆ្នាំ២០២០ ខាងមុខ ។ ការរត់ម៉ារ៉ាតុង គឺចែកជា៣ក្រុម គឺក្រុមរត់ចម្ងាយ១០គីឡូម៉ែត្រ, ក្រុមរត់៥គីឡូម៉ែត្រ និងក្រុមរត់៣គីឡូម៉ែត្រ ។ ហើយចាប់ផ្តើមរត់ចេញពីរង្វង់មូលព្រាប.ស ឆ្ពោះចូលទៅក្នុងក្រុងបាត់ដំបង កាត់តាមព្រលានយន្តហោះ និងឆ្លងស្ពានស្ទឹងសង្កែកាត់ទីក្រុង វិលត្រឡប់មករករូបលោកតាដំបងគ្រញូងវិញ ។
ការជួបប្រជុំ គឺមានតំណាងមន្ត្រីមន្ទីរពេទ្យភាគីថៃចំនួន៥នាក់ បានលើកឡើងអំពីកិច្ចពង្រឹងសហប្រតិបត្តការរួមគ្នាកន្លងមក ព្រោះជាខេត្តមួយនៃប្រទេសកម្ពុជា ដែលមានជាយដែនជាប់និងខេត្តចន្ទបូរីប្រទេសថៃ មានរយៈចម្ងាយពីទីរួមខេត្តចន្ទបូរី មកទីរួមខេត្តបាត់ដំបង ប្រវែង១៧០គីឡូម៉ែត្រ ។ ជាទូទៅ ប្រជាពលរដ្ឋទាំងសងខាង(ខេត្តបាត់ដំបង និងខេត្តចន្ទបូរី)តែងតែមានទំនាក់ទំនងល្អជាមួយគ្នាជាច្រើនទសវត្សមកហើយ តាមច្រកចេញ-ចូលរវាងខេត្តទាំងពីរ សម្រាប់ផ្លាស់ប្តូរវិស័យសេដ្ឋកិច្ចពីគ្នាទៅវិញទៅមក ។
មូលហេតុដែលមន្ទីរពេទ្យយោធភូមិភាគទី៥ និងពេទ្យបាងកកចន្ទបូរី រៀបចំកម្មវិធីដែលមានឈ្មោះថា «Run for Battambang»នេះឡើង គឺដើម្បីបានថវិការួមទិញឧបករណ៍បរិក្ខារពេទ្យជូនមន្ទីរពេទ្យយោធភូមិភាគទី៥ ខេត្តបាត់ដំបងផងដែរ ។
ហើយក៏ជាគោលបំណងរួមគ្នាដែរ គឺទី១-ដើម្បីលើកទឹកចិត្តប្រជាជនកម្ពុជាឱ្យហាត់ប្រាណ ដើម្បីឱ្យមានរាងកាយមាំមួន និងមានសុខភាពល្អ និងទី២-ដើម្បីរកប្រាក់ចំណូល ក្នុងការចូលរួមចំណែក ទិញឧបករណ៍ និងបរិក្ខាពេទ្យសម្រាប់មន្ទីរពេទ្យយោធាភូមិភាគ៥ ។
ក្នុងមួយថ្ងៃៗ គឺមានប្រជាពលរដ្ឋទាំង២ភាគី បានចេញចូលឆ្លងកាត់ច្រកទាំងនោះ ទៅវិញទៅមកមិនតិចជាង១ម៉ឺននាក់ឡើយ ។ ហើយក្នុងចំនួនទាំងអស់នេះ រួមមានទាំងអ្នកជំងឺនិងសាច់ញាតិធ្វើដំណើរចេញចូលប្រទេសថៃ ដើម្បីមកទទួលសេវាកម្មសុខភាពបើយោងតាមស្ថិតិបីឆ្នាំកន្លងមកនេះមានអ្នកជំងឺកម្ពុជាមកទទួលសេវាកម្មសុខភាពមិនតិចជាង៤ម៉ឺននាក់ឡើយ ហើយមានឱកាសកើនឡើងជាលំដាប់ទាំងចំនួនអ្នកជំងឺនិងអាការៈរោគដែលកាចសាហាវដែលពិបាកព្យាបាល។ ដោយសារការឈឺថ្កាត់និងរោគពារជារឿងដែលមនុស្សយើងកើតមកត្រូវតែប្រឈមជារឿងធម្មតាមិនរើសជាតិសាសន៍ ភាសា ឬពេលវេលាឡើយ ។
ក្នុងនោះ តំណាងមន្ទីរពេទ្យថៃ និងកម្ពុជាបានឯកភាពគ្នា ក្នុងការរៀបចំផ្គត់ផ្គងដំណើរការធានាសុវត្ថិភាពដល់អតិថិជនដែលបានចូលរួម និងបន្តអំពាវនាវបន្ថែមរកសប្បុរសជនជួយជាបន្ថែមទៀត ព្រោះថវិកាដែលទទួលបានមកនេះ សម្រាប់ជួយផ្គត់ផ្គង់ទិញឧបករណ៍សម្ភារជួយដល់មន្ទីរពេទ្យយោធភូមិភាគទី៥ ដែលតែងតែជួយព្យាបាលមិនត្រឹមតែកងទ័ពគ្រួសារកងទ័ព និងប្រជាពលរដ្ឋទូទៅកន្លងមក ដោយសប្បុរសធម៌ ដោយមិនគិតកម្រៃហួសហេតុ ។
ចែករំលែកព័តមាននេះ