ខេត្តរតនគិរី ៖ រថយន្តក្រុងដឹកអ្នកដំណើររបស់វៀតណាមមួយគ្រឿងលួចដឹកឈើប្រណីតប្រភេទធ្នង់បង្កប់ក្រោមកៅអី ខណៈកំពុងបើកបរលើកំណាត់ផ្លូវជាតិលេខ៧៨ ត្រូវបានកម្លាំងរដ្ឋបាលព្រៃឈើថ្នាក់កណ្តាលសហការជាមួយកម្លាំងរដ្ឋបាលព្រៃឈើផ្នែកបរកែវ និងកម្លាំងអាវុធហត្ថមូលដ្ឋានស្រុកបរកែវស្ទាក់ចាប់បានប្រគល់ឱ្យជំនាញ។
ការស្ទាក់បង្ក្រាបរថយន្តក្រុងដឹកឈើបង្កប់នោះ សមត្ថកិច្ចបានធ្វើឡើងកាលពីវេលាម៉ោង៨និង១០នាទីព្រឹកថ្ងៃទី១១ ខែធ្នូ ឆ្នាំ២០១៩ ត្រង់ចំណុចភូមិគ្លិៈ ឃុំស៊ើង ស្រុកបរកែវ ខេត្តរតនគិរី ។
រថយន្តក្រុងវៀតណាមលួចដឹកឈើប្រណិតនោះ ពាក់ស្លាកលេខវៀតណាម ៨១B-០០១-១៣ មានទិសដៅចេញពីក្រុងបានលុងឆ្ពោះទៅប្រទេសវៀតណាម ។ ក្រោយពីសមត្ថកិច្ចធ្វើការឆែកឆេរទៅរកឃើញឈើប្រណិតប្រភេទធ្នង់មានទម្ងន់៧៨០គីឡូក្រាម ។ ក្នុងពេលសមត្ថកិច្ចស្ទាក់បង្ក្រាបនោះអ្នកបើកបររថយន្តក្រុងដឹកបទល្មើសក៏បានរត់គេចខ្លួនបាត់ភ្លាមៗដែរ។
តាមការពិនិត្យជាក់ស្តែងទៅឃើញថារថយន្តក្រុងនេះមានជាប់ពាក់ព័ន្ធការប្រមូលនិងដឹកជញ្ជូនព្រៃឈើដោយប្រាស់ចាកពីច្បាប់ស្តីពីព្រៃឈើ ហើយរថយន្តក្រុងរបស់វៀតណាមមួយគ្រឿងនិងឈើប្រណិតប្រភេទធ្នង់ខាងលើត្រូវបាននាំមករក្សាទុកនៅខណ្ឌរដ្ឋបាលព្រៃឈើរតនគិរីចាត់ការបន្តតាម ។
បើតាមការកត់សម្គាល់ បើទោះបីសមត្ថកិច្ចជំនាញនិងស្ថាប័នពាក់ព័ន្ធខិតខំធ្វើការបង្ក្រាបការដឹកជញ្ជូនឈើយ៉ាងណាក្តីក៏ដោយ ក៏នៅតែមានក្រុមឈ្មួញខិលខូចនៅតែលួចធ្វើសកម្មភាពដឹកជញ្ជូនដោយមិនខ្លាចច្បាប់ដដែល។ដូចជារថយន្តក្រុងវៀតណាមមួយគ្រឿងនេះដែលមានថៅកែជាជនជាតិវៀតណាមហើយបានលួចដឹកឈើចេញពីស្រុកខ្មែរក្រោមរូបភាពដឹកភ្ញៀវទេសចរណ៍បជាការន្លំភ្នែកមហាជននិងសមត្ថកិច្ច ហើយការដឹកជញ្ជូននេះទំនងមានជាយូមកហើយទើបតែពេលនេះត្រូវបែកការក៏ឈានដល់ការបង្ក្រាបតែម្តង៕ (កែសម្រួលដោយ ៖ ធីតា)
ចែករំលែកព័តមាននេះ