រាជធានីភ្នំពេញ ៖ បុគ្គលិកក្រុមហ៊ុន Opennet ម្នាក់ត្រូវបានចរន្តអគ្គីសនីតង់ស្យុងមធ្យម ឆក់ឆេះសក់ និងឆេះខ្នង ដូចគេដុតទាំងរស់ តែសំណាងល្អត្រូវអ្នកធ្វើការជាមួយគ្នា រួមទាំងអ្នកភូមិនាំគ្នាជួយទាញយកចេញរួចបញ្ជូនទៅសង្គ្រោះផុតពីគ្រោះថ្នាក់ដល់អាយុជីវិត។
គ្រោះថ្នាក់ខាងលើនេះបានកើតឡើងកាលពីវេលាម៉ោងប្រមាណ៩និង៣០នាទីព្រឹកថ្ងៃទី១២ ខែធ្នូ ឆ្នាំ ២០១៩ស្ថិតនៅផ្លូវជាតិលេខ៦ ក្នុងភូមិគៀនឃ្លាំង សង្កាត់ ព្រែកលៀប ខណ្ឌ ជ្រោយចង្វារ ។
ជនរងគ្រោះដែលត្រូវចរន្តអគ្គីសនីឆក់ខាងលើត្រូវនគរបាលអោយដឹងថា ឈ្មោះ ទឹម ឈុន ភេទប្រុស អាយុ៣០ឆ្នាំ ជាបុគ្គលិកក្រុមហ៊ុនOpennet ស្នាក់នៅម្តុំសួនឧស្សាហ៍កម្មកាណាឌីយ៉ា ក្នុងសង្កាត់ចោមចៅ២ ខណ្ឌ ពោធិ៍សែនជ័យ ត្រូវចរន្តអគ្គីសនីឆក់ឆេះសក់ និងឆេះខ្លោចខ្នងរងរបួសធ្ងន់ធ្ងរ ត្រូវបានអ្នកធ្វើការជាមួយគ្នាដឹកតាមម៉ូតូកង់៣បញ្ជូននទៅកាន់គ្លីនិកឯកជន ។
តាមប្រភពព័ត៌មានបានអោយដឹងថា មុនពេលកើតហេតុ គេឃើញបុគ្គលិកក្រុមហ៊ុនខ្សែកាបខាងលើមានគ្នា២នាក់បានដាក់ជណ្តើរឡើងតខ្សែអ៊ីនធើណេត ។ លុះនៅពេលតបណ្តាញនោះ ជនរងគ្រោះក៏បានដាក់ខ្សែក្រវាត់ត្រឹមត្រូវ ស្រាប់តែពេលនោះក៏បាននឹងប៉ះបណ្តាញអគ្គីសនីឆក់បែកផ្កាភ្លើង ឆេះសក់ និងអាវ បណ្តាលអោយឆេះខ្លោចខ្នងតែម្តង។
តាមប្រភពព័ត៌មានបានអោយដឹងទៀតថា ភ្លាមៗនោះត្រូវបានអ្នកធ្វើការការជាមួយគ្នា ទៅដោះខ្សែក្រវាត់រួចចាប់ទាញជនរងគ្រោះចេញយកដាក់លើដំបូលផ្ទះ ក្រោយមកអ្នកភូមិក៏បាននាំគ្នាជួយយកទៅសង្គ្រោះ។
តាមឈ្មោះឃួន ចាន់ធី ភេទប្រុស អាយុ៣៥ឆ្នាំ ដែលជាអ្នកធ្វើការជាមួយជនរងគ្រោះបានអោយដឹងថា គាត់ត្រូវបានបុគ្គលិកក្រុមហ៊ុនជួលក្នុង១ថ្ងៃ តម្លៃ១៥ដុល្លារ ក្នុងម្នាក់ ដើម្បីអោយតខ្សែអ៊ីនធើណេត លុះនៅពេលកៀបខ្សែក៏ប៉ះខ្សែបណ្តាញអគ្គិសនី បណ្តាលអោយឆក់រងរបួសធ្ងន់តែម្តង៕
ចែករំលែកព័តមាននេះ