រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា ក្មេងស្រីម្នាក់ដោយសារតែមានជីវភាពក្រលំបាកពេកក៏បានរត់ចោលផ្ទះ ដោយមិនឱ្យឪពុកម្ដាយដឹងនោះទេដើម្បីរកការងារធ្វើ ប៉ុន្តែបែរជាវង្វេងផ្លូវ ក៏ត្រូវអ្នករត់ម៉ូតូឌុបបំរុងដឹកយកទៅផ្ទះសំណាក់ ធ្វើឲ្យក្មេងស្រីភ័យពេកក៏លោតចុះពីលើម៉ូតូ បង្កឲ្យមានការភ្ញាក់ផ្អើលកាលពីម៉ោង១០យប់ ថ្ងៃទី១១ ខែធ្នូ ឆ្នាំ២០១៩ នៅមុខផ្សារត្រពាំងថ្លឹង សង្កាត់ចោមចៅទី១ ខណ្ឌពោធិ៍សែនជ័យ ។
សេចក្តីរាយការណ៍បន្តថា ក្មេងស្រីដែលវង្វេងផ្លូវមានឈ្មោះ សឿក សុភ័ក្រ អាយុ១៦ឆ្នាំ សម្បុរខ្មៅ មានស្រុកកំណើតនៅខេត្តបន្ទាយមានជ័យ មានម្តាយឈ្មោះ គឿម ឃួម និងឪពុកឈ្មោះ រើន សព្វថ្ងៃរស់នៅស្រុកកំណើត។
តាមសម្តីក្មេងស្រីខាងលើនាងបានរៀបរាប់ប្រាប់ថា ដោយសារតែជីវភាពក្រលំបាកពេក ឪពុកម្ដាយរបស់នាងមានកូនច្រើន ដោយមានបងប្អូនចំនួន៧នាក់ ក្នុងនោះប្រុស៥ និងស្រី២នាក់ ។ នាងក៏បានចុះចោលផ្ទះជាច្រើនដងមកហើយទៅរស់នៅជាមួយគេនៅឯខេត្តកំពង់សោមបានជាង២ខែ ហើយមានអ្នកផ្សេងចង់បបួលនាងមកធ្វើការងារនៅទីក្រុងភ្នំពេញវិញ ដោយនាងបានបញ្ជាក់ថា កាងារអីក៏គាត់ធ្វើដែរ ។
ប្រភពដដែលបន្តទៀតថា មុនដំបូង រូបនាងបានរត់ចេញមកពីផ្ទះ ដោយមិនឱ្យឪពុកម្ដាយដឹងទេ ហើយបានជិះរថយន្តឈ្នួលមកផ្សារដើមគរ មកដល់នៅម៉ោង៧និង៣០នាទីយប់ បន្ទាប់មកនាងបានចូលសំរាកនៅម្តុំផ្សារដើមគរជាងមួយម៉ោង ទើបឱ្យអ្នករត់ម៉ូតូឌុបដឹកទៅវិទ្យុ ABC តែម៉ូតូឌុបនោះឯង មិននាំនាងទៅប៉ុស្តិ៍វិទ្យុទេ បែរជានាំនាងបំរុងទៅដេកផ្ទះសំណាក់ទៅវិញ ធ្វើឲ្យនាងមានការភិតភ័យក៏លោតចុះពីលើម៉ូតូ រួចរត់តែម្តង ចំណែកម៉ូតូឌុបក៏បានបើកគេចខ្លួនបាត់ ។
ប្រភពដដែលបន្តទៀតថា បន្ទាប់មក ក្មេងស្រីម្នាក់ខាងលើនេះក៏ត្រូវបានប្រជាពលរដ្ឋនាំមកទៅសាលាសង្កាត់ តែមកដល់សង្កាត់មិនមានមនុស្ស ព្រោះបាន បិទទ្វារអស់ហើយ ប្រជាពលរដ្ឋក៏បានប្រគល់នាងឱ្យនគរបាលប៉ុស្តិ៍ចោមចៅទី១តែម្តង ។
បន្ទាប់ពីសមត្ថកិច្ចសួរនាំដឹងថា ក្មេងស្រីខាងលើស្គាល់បងប្អូននៅម្តុំផ្សារអូរឫស្សី ឈ្មោះ តាំង លីលី លក់បាយលក់គុយទាវ តែគាត់វង្វេងរកមិនឃើញ ទើបគាត់ចង់ទៅសំរាកនៅប៉ុស្តិ៍វិទ្យុសិន ។ បន្ទាប់មកសមត្ថកិច្ចនគរបាលប៉ុស្តិ៍បានហៅម៉ូតូកង់បីដឹកនាងយកទៅសំរាកនៅវិទ្យុ ABC សិន រង់ចាំទាក់ទងរកបងប្អូនតាមក្រោយ ។ (កែសម្រួលដោយ ៖ បុប្ផា)
ចែករំលែកព័តមាននេះ