រាជធានីភ្នំពេញ ៖ សម្តេចតេជោនាយករដ្ឋមន្ត្រី ហ៊ុន សែន មានប្រសាសន៍ថា មន្ទីរពេទ្យកាល់ម៉ែត ដែលជាមន្ទីរពេទ្យសាធារណៈទទួលការព្យាបាលជំងឺ៤ប្រភេទ ក្នុងនោះ ៣ប្រភេទមិនអស់ថវិកា…
រាជធានីភ្នំពេញ ៖ សម្តេចតេជោនាយករដ្ឋមន្ត្រី ហ៊ុន សែន មានប្រសាសន៍ថា មន្ទីរពេទ្យកាល់ម៉ែត ដែលជាមន្ទីរពេទ្យសាធារណៈទទួលការព្យាបាលជំងឺ៤ប្រភេទ ក្នុងនោះ ៣ប្រភេទមិនអស់ថវិកា គឺ ៖ ទី១-អ្នកក្រីក្រដែលមានប័ណ្ណក្រីក្រ ទី២-អ្នកមានប័ណ្ណសមធម៌ និងទី៣-អ្នកមានប័ណ្ណបេឡាជាតិសន្តិសុខសង្គម
(បសស) ។ ចំណែកទី៤-សម្រាប់អ្នកមានលទ្ធភាពគឺបង់ថវិកា ។
សម្តេចតេជោ បានថ្លែងបញ្ជាក់បែបនេះ នៅមជ្ឈមណ្ឌលសន្និបាតនិងពិព័រណ៍កោះពេជ្រ ក្នុងពិធីប្រគល់សញ្ញាបត្រដល់និស្សិតបញ្ចប់ការសិក្សា នៅសាកលវិទ្យាល័យCUS នាព្រឹកថ្ងៃទី១១ ខែធ្នូ ។ សម្តេចតេជោ ថ្លែងថា ៖ «អុីចឹងមានន័យថា មន្ទីរពេទ្យនេះត្រូវប្រើប្រាស់សេវាក្នុងហ្នឹង គឺយកមន្ទីរពេទ្យចិញ្ចឹមមន្ទីរពេទ្យ យកថវិកាពីអ្នកមានលទ្ធភាពទៅជួយអ្នកគ្មានលទ្ធភាព» ។
សម្តេចតេជោបន្តថា អ្នកដែលមានប័ណ្ណទាំង៣ខាងលើ គឺមិនចាំបាច់បង់ប្រាក់ទេ តែបង់ចំពោះអ្នកមានលទ្ធភាពដែលទៅព្យាបាលនៅវៀតណាម នៅថៃ សិង្ហបុរី…ត្រូវបង់ថ្លៃ ។ជាមួយគ្នានេះ សម្តេចតេជោក៏បានលើកឡើងថា សម្តេចនឹងរៀបចំមន្ទីរពេទ្យកាល់ម៉ែតឲ្យបានល្អ ហើយគ្រោងបញ្ចប់ការពិនិត្យសុខភាពនៅមន្ទីរពេទ្យខាងក្រៅ ។
សម្តេចតេជោគូសញ្ជាក់ថា ៖ «ខ្ញុំនឹងប្រើប្រាស់មន្ទីរពេទ្យជំនាញឯកទេសនៅក្នុងប្រទេសតែម្តង ព្រោះនៅមន្ទីពេទ្យកាលម៉ែតមានកន្លែងរៀបចំសម្រាប់តាំងពីព្រះមហាក្សត្រ ឥស្សរជននានា និងថ្នាក់ដឹកនាំនានាផងដែរ» ។
សម្តេចតេជោបានលើកឡើងថា មូលហេតុដែលសម្តេចទៅពិនិត្យព្យាបាលជំងឺនៅមន្ទីរពេទ្យឯសិង្ហបុរី ដោយសារនៅមន្ទីរពេទ្យស្រុកខ្មែរ មិនទាន់មានសម្ភារបច្ចេកទេសទំនើប ។ ដូច្នេះនៅពេលណាយើងមានសម្ភារទំនើប គឺអ្នកឯកទេសរបស់យើងនឹងមាន ហើយរៀបចំព្យាបាល ។
សម្តេចតេជោបានលើកឡើងទៀតថា រហូតមកដល់ពេលនេះ ថវិកាដែលសប្បុរសជនចូលរួមដើម្បីធ្វើទំនើបកម្មមន្ទីរពេទ្យកាលម៉ែតបានជាង៧២លានដុល្លារ បូកទាំងថវិការដ្ឋ៣០លានទៀតដើម្បីធ្វើអគារមួយ ដែលចំណាយអស់៣៩,៧លានដុល្លារ ហើយមន្ទីពេទ្យបានរកថវិកា៧លានដុល្លារហើយ ។
អគារនេះធ្វើ១២ជាន់ និង២ជាន់ចុះក្រោម ដើម្បីធ្វើចំណតរថយន្ត និយាយទៅ អគារមិនអស់៤០លានដុល្លារទេ ។សម្តេចតេជោមានប្រសាសន៍ទៀតថា ថវិកាដែលបានមកពីសប្បុរសជនចូលរួម នឹងយកទៅទិញសម្ភារទំនើបៗ និងជួយសាងសង់អគារខ្លះ ។
សម្តេចតេជោ ហ៊ុន សែន បានលើកឡើងថា មន្ទីរពេទ្យកាល់ម៉ែតដែលជាសហគ្រាសសាធារណៈ បានដំណើរការក្នុងអំឡុងឆ្នាំ១៩៩៩ និងបានដើរតួជាមជ្ឈមណ្ឌលក្នុងការព្យាបាលជំងឺ ពហុឯកទេស ក្នុងនោះវះខួរក្បាល វះបេះដូង ម៉ាស៊ីនឡាស៊ែរ…។
សូមជម្រាបថា ទោះបីប្រមុខរាជរដ្ឋាភិបាលធ្លាប់ប្រកាសថា មន្ទីរពេទ្យរដ្ឋទាំងអស់មិនយកថវិកាចំពោះអ្នកមានប័ណ្ណក្រីក្រ ប័ណ្ណសមធម៌ និងប័ណ្ណ ប.ស.ស យ៉ាងណាក្តី ក៏មានការលើកឡើងថា មានមន្ទីពេទ្យមួយចំនួនមិនបានយកចិត្តទុកដាក់ចំពោះអ្នកជំងឺដែលប្រើប្រាស់ប័ណ្ណទាំងនេះទេ ។
ឆ្លងតាមប្រសាសន៍របស់សម្តេចតេជោនេះ ប្រសិនបើសម្តេចពិចារណាថានឹងត្រួតពិនិត្យសុខភាពនៅក្នុងស្រុកនោះ ប្រហែលជាក្រុមមន្ត្រីខ្លះដែលគ្រាន់តែផ្តាសាយក៏ទៅដល់សិង្ហបុរី ឬថៃនោះ ប្រហែលជាមិនហ៊ានហោះទៅក្រៅប្រទេសទៀតទេ បើមិនចាំបាច់ ៕
ចែករំលែកព័តមាននេះ