ខេត្តកំពង់ឆ្នាំង ៖ មន្ត្រីនៃមន្ទីរវប្បធម៌និងវិចិត្រសិល្បៈខេត្តកំពង់ឆ្នាំងបានអោយដឹងកាលពីរសៀលថ្ងៃទី១១ ខែធ្នូ ឆ្នាំ២០១៩ នេះថា ក្នុងឱកាសនាំយកខ្លែងឯកនៃមន្ទីរវប្បធម៌និងវិចិត្រសិល្បៈខេត្តទៅចូលរួមប្រកួត ក្នុងមហោស្រពបង្ហើរខ្លែងខ្មែរលើកទី២៣ នៅខេត្តកោះកុង ដែលរៀបចំឡើងដោយក្រសួងវប្បធម៌និងវិចិត្រសិល្បៈ…
ខេត្តកំពង់ឆ្នាំង ៖ មន្ត្រីនៃមន្ទីរវប្បធម៌និងវិចិត្រសិល្បៈខេត្តកំពង់ឆ្នាំងបានអោយដឹងកាលពីរសៀលថ្ងៃទី១១ ខែធ្នូ ឆ្នាំ២០១៩ នេះថា ក្នុងឱកាសនាំយកខ្លែងឯកនៃមន្ទីរវប្បធម៌និងវិចិត្រសិល្បៈខេត្តទៅចូលរួមប្រកួត ក្នុងមហោស្រពបង្ហើរខ្លែងខ្មែរលើកទី២៣ នៅខេត្តកោះកុង ដែលរៀបចំឡើងដោយក្រសួងវប្បធម៌និងវិចិត្រសិល្បៈ ខ្លែងខេត្តកំពង់ឆ្នាំងទទួលបានចំណាត់ថ្នាក់លេខ២ ក្នុងចំណោមខ្លែងដែលបានចូលរួមទាំង២៥រាជធានីខេត្តក្រុង ។
លោក សុខ ធួក ប្រធានមន្ទីរវប្បធម៌និងវិចិត្រសិល្បៈខេត្តកំពង់ឆ្នាំង បានបញ្ជាក់កាលពីរសៀលថ្ងៃទី ១១ខែធ្នូ នេះថា មន្ត្រីរបស់មន្ទីរវប្បធម៌និងវិចិត្រសិល្បៈខេត្តចំនួន៤រូប ដឹកនាំដោយអនុប្រធានមន្ទីរ បាននាំយកខ្លែងខ្មែររបស់ខេត្តកំពង់ឆ្នាំងទៅចូលរួមការប្រកួតថ្នាក់ជាតិដែលរៀបចំឡើងដោយក្រសួង ក្នុងរយៈពេលមួយព្រឹកថ្ងៃទី១១ ខែធ្នូ នៅខេត្តកោះកុង ជាលទ្ធផលខ្លែងខ្មែររបស់ខេត្តកំពង់ឆ្នាំងទទួលចំណាត់ថ្នាក់លេខ២ បន្ទាប់ពីខេត្តតាកែវលេខ១ ខេត្តកោះកុងនិងខេត្តមណ្ឌលគិរីទទួលចំណាត់ថ្នាក់លេខ៣ស្ទួន។ កន្លងទៅ ខេត្តកំពង់ឆ្នាំង ធ្លាប់ទទួលបានចំណាត់ថ្នាក់លេខ១នៅរាជធានីភ្នំពេញ និងលេខ៣ នៅខេត្តស្វាយរៀង ចំណែកលើកនេះទទួលបានចំណាត់ថ្នាក់លេខ២ ក្នុងចំណោម២៥រាជធានីខេត្ត ។
លោកប្រធានមន្ទីរវប្បធម៌និងវិចិត្រសិល្បៈខេត្តកំពង់ឆ្នាំងបានបន្តថា នេះបានបង្ហាញថា ខេត្តកំពង់ឆ្នាំងមិនអន់ប៉ុន្មាននោះទេ ក្នុងការធ្វើក្លែងទៅចូលរួមប្រកួត ដោយទទួលបានចំណាត់ថ្នាក់ជារៀងរាល់ឆ្នាំ។ ខ្លែងដែលជាប់ចំណាត់ថ្នាក់ ក្រសួងបានដកហូតទុកតាំងពិពណ៌ខ្លែងថ្នាក់ជាតិ ចំណែកសម្រាប់ការប្រកួតឆ្នាំក្រោយៗទៀត តាមរាជធានីខេត្តនឹងត្រូវធ្វើក្លែងថ្មី ។ ចំពោះការឲ្យពិន្ទុនៃការបង្ហោះខ្លែងដែលលោកធ្លាប់បានដឹងតាមរយៈគណៈកម្មការឲ្យពិន្ទុខ្លែងគឺ ទី១-សោភ័ណភាព ទី២-ការហោះឡើង ទី៣-ការហោះសំកាំង និងទី៤-សម្លេងឯករបស់ខ្លែង ពិរោះឬមិនពិរោះ ។ ខ្លែងខ្មែរ ឬខ្លែងឯក ឬខ្លែងនគរភ្នំ (ជាខ្លែងតែមួយ ព្រោះនៅពេលខ្លែងខ្មែរ បំពាក់ដោយអណ្តាតសម្រាប់បញ្ចេញសម្លេង «ឯក» គេហៅខ្លែងឯក និងក្រោយមកជនជាតិបារាំង ដាក់ឈ្មោះខ្លែងខ្មែរមិនច្បាស់ទៅជាខ្លែងភ្នង ទើបក្លាយជាខ្លែងនគរភ្នំទៅ ។
លោកប្រធានមន្ទីរវប្បធម៌និងវិចិត្រសិល្បៈខេត្តកំពង់ឆ្នាំងបានរំលឹកឱ្យដឹងពីប្រវត្តិខ្លែងខ្មែរ ឬខ្លែងឯកនេះថា កាលដើមឡើយមានស្ដេចពីរអង្គជាបងប្អូននឹងគ្នា ។ ក្រោយមកស្ដេចមួយអង្គបានសុគតទៅ ។ ដោយសារក្តីស្រលាញ់ និងអាឡោះអាល័យចំពោះបងប្អូន ស្ដេចដែលនៅមានព្រះជន្មបានធ្វើខ្លែងឯកនេះបង្ហោះឡើងដើម្បីរំលឹកដល់បងប្អូនដែលបានសុគត ។ ទើបតំណរក្រោយមក ខ្មែរយើងបានចាត់ទុកខ្លែងខ្មែរនោះជាទង់ព្រលឹងអ្នកដែលបានបាត់បង់ជីវិតទៅ។
លោកប្រធានមន្ទីរវប្បធម៌និងវិចិត្រសិល្បៈខេត្តកំពង់ឆ្នាំងបានបន្តថា ហេតុនេះហើយនៅពេលមានមនុស្សបាត់បង់ជីវិត ខ្មែរយើងជំនាន់នោះ ដល់បច្ចុប្បន្នតែងតែដោតទង់នៅមុខផ្ទះដែលមានមនុស្សបាត់បង់ជីវិត ។ កាលជំនាន់ដើម ខ្មែរយើងតែងនិយមបង្ហោះខ្លែងឯកនេះណាស់ ប៉ុន្តែកាលណោះខ្មែរយើងប្រកាន់ណាស់ នៅពេលដែលមានខ្លែងឯក ធ្លាក់ចំផ្ទះណា ផ្ទះនោះនឹងត្រូវនិងមន្តព្រះសង្ឃ៧ វត្តដើម្បីរំដោះគ្រោះចង្រៃ ។ ប៉ុន្តែបច្ចុប្បន្នជំនឿបែបនេះត្រូវបានសាបរលាបអស់ទៅហើយ ។ ជាចុងក្រោយលោកបានបញ្ជាក់ថាខ្លែងឯក ឬខ្លែងខ្មែរ ត្រូវបានគេទទួលស្គាល់ពេញពិភពលោកថាជារបស់ខ្មែរ ប៉ុន្តែនៅមិនទាន់បានចុះក្នុងបញ្ជីបេតិកភណ្ឌពិភពលោក ដូចខ្លែងព្រះខែរបស់ប្រទេសម៉ាឡេស៊ីនៅឡើយទេ ៕ (កែសម្រួលដោយ ៖ ធីតា)
ចែករំលែកព័តមាននេះ