រាជធានីភ្នំពេញ ៖ ទីក្រុងប៉ោយប៉ែតអតីតកាលគេដឹងថាជាទីលានសមភូមិក្តៅមួយតែមកដល់ពេលនេះបានក្លាយជាតំបន់សេដ្ឋកិច្ចពិសេសជាយដែនសំខាន់មួយសម្រាប់ទាក់ទាញបណ្តាវិនិយោគិនមកពីខាងក្រៅប្រទេសចូលមកបណ្តាក់ទុននៅកម្ពុជា ។ ជាក់ស្តែងក្នុងចំណោមរោងចក្រ១៧ក្នុងនោះមាន៨រោងចក្របានបណ្តាក់ទុនដោយវិនិយោគិនជនជាតិជប៉ុន។
តាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជា ហៅថា CDC បានបង្ហាញថាបច្ចុប្បន្ននៅទូទាំងប្រទេសកម្ពុជាមានតំបន់សេដ្ឋកិច្ចពិសេសដែលមានដំណើរការចំនួន២៣ ដែលមានរោងចក្រចំនួន៤៩០ និងបង្កើតការបានចំនួនប្រមាណជាង១៣ម៉ឺនកន្លែង។ ប្រភពដដែលបានបញ្ជាក់ថា «ដោយឡែកក្រុងប៉ោយប៉ែតមានតំបន់សេដ្ឋកិច្ចពិសេសចំនួន៣កន្លែងដែលមានរោងចក្រចំនួន១៧និងបង្កើតការងារចំនួនប្រមាណ៧.៥០០កន្លែង ក្នុងនោះរោងចក្រដែលជាការវិនិយោគមកពីប្រទេសជប៉ុនមាន៨និងបង្កើតការងារបានប្រមាណជាង២.០០០កន្លែង»។
លោក សុខ ចិន្តាសោភា អគ្គលេខាធិការក្រុមប្រឹក្សាភិបាលអភិវឌ្ឍន៍កម្ពុជាមានប្រសាសន៍ក្នុងពិធីបើកឱ្យដំណើរការតំបន់សេដ្ឋកិច្ចពិសេសប៉ោយប៉ែត ភីភី និងរោងចក្រថ្មីរបស់ក្រុមហ៊ុន ស៊ូមីត្រូនិចកាលពីថ្ងៃទី៩ ខែធ្នូ ឆ្នាំ២០១៩ នេះថាតាមរយៈការបណ្តាក់ទុនបង្កើតតំបន់សេដ្ឋកិច្ចពិសេស និងរោងចក្រផលិតសម្ភារៈបរិក្ខាអេឡិចត្រូនិកដែលជាការវិនិយោគនេះនឹងចូលរួមចំណែកដល់ការអភិវឌ្ឍន៍វិស័យឧស្សាហកម្មកម្ពុជា២០១-២០២៥ជាពិសេសចក្ខុវិស័យរបស់សម្តេចតេជោនាយករដ្ឋមន្ត្រី ក្នុងការពង្រាយរោងចក្រទៅកាន់តំបន់ជាយដែន។ លោកបានសង្កត់ធ្ងន់ថា «នេះជាសក្ខីភាពនៃគោលមាគាដឹកនាំដ៏ត្រឹមត្រូវរបស់រាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិតរបស់សម្តេច តេជោនាយករដ្ឋមន្ត្រីដែលបានប្រែក្លាយក្រុងប៉ោយប៉ែតពីទីលានសមរភូមិទៅជាតំបន់ឧស្សាហកម្មនិងជាទីក្រុងមួយដែលមានការអភិវឌ្ឍលើគ្រប់វិស័យ»។
ក្នុងឱកាសនោះដែរ លោក មិកាមិ ម៉ាសាហ៊ីរ៉ូ (Mikami Masahiro) ឯកអគ្គរាជទូត
ជប៉ុនបានលើកឡើងថា «កំណើនសេដ្ឋកិច្ចខ្ពស់ បរិយាកាសវិនិយោគល្អ និងទីតាំងជាយុទ្ធសាស្ត្ររបស់កម្ពុជា បានធ្វើឱ្យកម្ពុជា ក្លាយជាគោលដៅវិនិយោគដ៏ទាក់ទាញសម្រាប់វិនិយោគជប៉ុន។យើងជឿជាក់ថាតំបន់សេដ្ឋកិច្ចពិសេសនេះនឹងចូលរួមចំណែកដល់ការទាក់ទាញការវិនិយោគប្រភេទ ថៃបូក១ បន្ថែមទៀត»។
សម្តេចតេជោ ហ៊ុនសែន នាយករដ្ឋមន្ត្រីកម្ពុជាធ្លាប់មានប្រសាសន៍កាលពីដើមខែសីហា ថា« ជាលទ្ធផលនៃការវិនិយោគនិងពាណិជ្ជកម្មរវាងប្រទេសទាំងពីរកម្ពុជា ជប៉ុនកាលពីឆ្នាំ ២០១៨ ជប៉ុននាំចូលមកកម្ពុជា មានទំហំទឹកប្រាក់ប៉ុន្មាន ៤៤០លានដុល្លារតែប៉ុណ្ណោះប៉ុន្តែនៅឆ្នាំ២០១៩នេះ ក្នុងរយៈពេលត្រឹមតែ៥ខែប៉ុណ្ណោះ ជប៉ុនបាននាំចូលមកកម្ពុជាយើងចំនួន ៤៤០លានដុល្លារស្រេចទៅហើយ។ដោយឡែកនៅឆ្នាំ ២០១៨កម្ពុជាបាននាំចេញទៅប្រទេសជប៉ុនមានទំហំទឹកប្រាក់ប្រមាណ ១.៦០០លានដុល្លាអាមេរិក។ ក្នុងឆ្នាំ ២០១៩នេះវិញ រយៈពេលត្រឹមតែ ៥ខែប៉ុណ្ណោះ ទំហំពាណិជ្ជកម្មកម្ពុជានាំចេញទៅជប៉ុនបានកើនឡើងដល់ ១.៧០០លានដុល្លារសហរដ្ឋអាមេរិក នេះគឺជាជោគជ័យដ៏ធំនៅក្នុងបេសកកម្មការទូតរបស់ ឯកអគ្គរាជទូតក្នុងការពង្រឹងទំនាក់ទំនង ហើយជំរុញពាណិជ្ជកម្ម វិនិយោគ និងទេសចរណ៍ ដែលជាមូលដ្ឋានគ្រឹះ នៃទំនាក់ទំនងរវាងប្រទេសទាំងពីរកម្ពុជា និងជប៉ុន»។
លោកស៊ាង ថៃ មន្ត្រីអ្នកនាំពាក្យក្រសួងពាណិជ្ជកម្ម មានប្រសាសន៍ថានៅប៉ុន្មានឆ្នាំចុងក្រោយនេះថ្នាក់ដឹកនាំកម្ពុជាបានទៅចូលរួមកម្មវិធីនៅប្រទេសជប៉ុនជាបន្តបន្ទាប់ដើម្បីពង្រឹងទំនាក់ទំនងពាណិជ្ជកម្មនិងទាក់ទាញវិនិយោគិនជប៉ុនឱ្យមកបណ្តាក់ទុននៅកម្ពុជា។
ជាក់ស្តែងមកដល់ឆ្នាំ២០១៩វិនិយោគិនជប៉ុនតាមការសង្កេតបានចូលមកបណ្តាក់ទុននៅកម្ពុជាមានចំនួនច្រើនគួរឱ្យកត់សម្គាល់បើប្រៀបធៀបទៅនិងឆ្នាំមុនៗ។ផ្នែកលើកំណើនវិនិយោគិនចូលមកបណ្តាក់ទុននៅកម្ពុជាជាបន្តបន្ទាប់នេះ រំពឹងថាការធ្វើពាណិជ្ជកម្មទ្វេភាគីរវាងប្រទេសទាំងពីរកម្ពុជានិងជប៉ុននឹងបន្តកើនឡើងបន្ថែមទៀត។
លោក ជាសុផារ៉ា រដ្ឋមន្ត្រីក្រសួងរៀបចំដែនដីនគរូបនីយកម្មនិងសំណង់ធ្លាប់មានប្រសាសន៍ថា គិតមកដល់ត្រឹមឆ្នាំ២០១៩ វិនិយោគិនជប៉ុនបានបណ្តាក់ទុនវិនិយោគលើវិស័យសំណង់មានទឹកប្រាក់ប្រមាណ៣៨២លានដុល្លារអាមេរិកក្លាជាប្រទេសសឈរនៅលំដាប់លេខ៣ បន្ទាប់ពីចិននិងកូរ៉េ៕ កែសម្រួលដោយ ៖ សុឃាក់
ចែករំលែកព័តមាននេះ