ក្រុងហាណូយ-វៀតណាម ៖ ខណៈជម្លោះ ដែនទឹកជាមួយចិននៅសមុទ្រចិនខាងត្បូងបន្តអូសបន្លាយ វៀតណាមត្រូវបានគេមើលឃើញថា បានបង្កើនសមត្ថភាពយោធារបស់ខ្លួនកាន់តែខ្លាំង តាមរយៈការទិញសព្វាវុធ ក៏ដូចជាចាប់ផ្ដើម សាកល្បងផលិតនាវាមុជទឹកដោយខ្លួនឯង ដូចជា នាវាមុជទឹក Truong Sa ០១ ជាដើម ។ នេះបើតាមការដកស្រង់ការផ្សាយពីគេហទំព័រ Military Armed Force ផ្សាយនៅថ្ងៃទី១០ ខែធ្នូ កន្លងមកនេះ ។
នាវាមុជទឹកខ្នាតតូច Truong Sa ០១ ត្រូវបាន ផលិតឡើងដោយអតីតសាស្ត្រាចារ្យខាងវិស្វកម្មនាវានៃសាកលវិទ្យាល័យទីក្រុងហាណូយ លោក ង្វៀន កួកហ្វា ហើយបច្ចុប្បន្នលោកបានក្លាយ ជាអ្នកជំនួញនាវាម្នាក់នៅក្នុងខេត្តថាយប៊ិញ ។
គម្រោងផលិតនាវាមុជទឹក Truong Sa ០១ ទទួលបានការគាំទ្រពីរដ្ឋាភិបាលវៀតណាម ដែល បាននិងកំពុងស្វះស្វែងអភិវឌ្ឍសមត្ថភាពនាវាល្បាត និងនាវាមុជទឹក ស្របពេលកំពុងមានជម្លោះដែនទឹកនៅឯតំបន់សមុទ្រចិនខាងត្បូងជាមួយមហាអំណាចចិន ។
នាវាមុជទឹកនេះ អាចបំលាស់ទីជាមួយទម្ងន់៨០តោន និងអាចមុជទៅក្នុងទឹកជម្រៅ៦០ម៉ែត្រក្នុងរយៈពេល១៨ម៉ោង ព្រមទាំងអាចប្រតិ បត្តិការបានចម្ងាយ៨០០គីឡូម៉ែត្រ ។
ក្រៅពីនាវាមុជទឹក វៀតណាមក៏ត្រូវបានគេ រាយការណ៍ថា បានទិញប្រព័ន្ធការពារដែនអាកាសពីប្រទេសអ៊ីស្រាអែល និងមីស៊ីល BrahMos ពីប្រទេសឥណ្ឌាផងដែរ ៕ (កែសម្រួលដោយ ៖ បុប្ផា)
ចែករំលែកព័តមាននេះ