ដើម្បីក្លាយជាមនុស្សដែលជោគជ័យនិងមានទ្រព្យសម្បត្តិស្តុកស្តម្ភ ពេលខ្លះគឺអ្នកមិនអាចពឹងផ្អែកតែលើខ្លួនឯងម្នាក់ទេ។ ផ្ទុយមកវិញ អ្នកត្រូវការក្រុមការងារមួយដែលអាចជួយធ្វើឲ្យក្តីស្រម៉ៃរបស់អ្នកក្លាយជាការពិតបាន។
យ៉ាងណាក្តី ការដឹកនាំក្រុមមិនមែនជារឿងងាយឡើយ ហើយភាពដឹកនាំដែលមានប្រសិទ្ធិភាពតែងតែពឹងផ្អែកលើកត្តាជាច្រើនជាពិសេសគឺលើយុទ្ធសាស្ត្រទំនាក់ទំនងជាមួយនឹងសមាជិកក្រុម។ ដូច្នេះដើម្បីជំរុញឲ្យក្រុមការងាររបស់អ្នកជួយសម្រេចគោលដៅក្នុងការបង្កើនប្រាក់ចំណូលរបស់អ្នកនោះ អ្នកគួរអនុវត្តតាមយុទ្ធសាស្ត្រខាងក្រោមនេះក្នុងការទំនាក់ទំនងដោយមានប្រសិទ្ធិភាពខ្ពស់៖
១. ភាពច្បាស់លាស់
អ្នកដឹកនាំមិនគួរអនុញ្ញាតឲ្យអ្នកដទៃយល់ខុសពីអ្វីដែលខ្លួនចង់និយាយទេដូច្នេះភាពច្បាស់លាស់គឺជាអ្វីដែលអ្នកដឹកនាំគួរតែធានាថាមានរាល់ពេលធ្វើទំនាក់ទំនងជាមួយសមាជិកក្រុម។ រាល់ការ ងារទាំងអស់ អ្វីដែលទាមទារភាពច្បាស់លាស់ជាងគេរួមមានគោលដៅ និងការរំពឹងទុកជាដើម។
២. ភាពជឿជាក់
ភាពជឿជាក់លើខ្លួនពេលដែលនិយាយជាមួយនឹងក្រុមការងារជាកត្តាសំខាន់មិនថាអ្នកកំពុងនិយាយជាមួយមនុស្សម្នាក់ ឬច្រើនទេព្រោះអ្នកដឹកនាំដែលបង្ហាញពីជំនឿចិត្តលើខ្លួនអាចទាក់ទាញ និងជំរុញទឹកចិត្តអ្នកស្តាប់។
៣. តម្លាភាព
ក្នុងនាមជាអ្នកដឹកនាំមួយរូប អ្នកក៏គួររក្សាតម្លាភាព និងទំនាក់ទំនងដោយបើកចំហរ និងស្មោះត្រង់ជាមួយក្រុមការងារ ដែលអនុញ្ញាតឲ្យអ្នកធ្វើការក្រោមអ្នកមើលឃើញការចូលរួមរបស់ពួកគេក្នុងការសម្រេចគោលដៅរបស់ក្រុមហ៊ុនឬអាជីវកម្ម។ ប្រសិនបើមិនមានតម្លាភាពនិងភាពស្មោះត្រង់នេះទេ បុគ្គលិកអាចនឹងចាប់ផ្តើមមិនជឿទុកចិត្តក្រុមហ៊ុនដែលប៉ះពាល់ដល់ការសហការគ្នាជាដើម។
៤. ការរើសពេលវេលាឲ្យបានត្រឹមត្រូវ
ការទំនាក់ទំនងដែលមានប្រសិទិ្ធភាពមិនត្រឹមតែពឹងផ្អែកលើគុណភាពនៃការផ្ញើសារទេ តែក៏ពាក់ព័ន្ធទៅនឹងពេលវេលាដែលអ្នកចាប់ផ្តើមវាដែរ ជាពិសេសសម្រាប់ការសន្ទនាដែលពិបាកៗ។ ប្រសិនបើមានការសន្ទនាខ្លះអាចធ្វើឲ្យអ្នកចូលរួមមានអារម្មណ៍មិនស្រួលក្នុងខ្លួន ឬអាចបង្កភាពតានតឹងពិតមែនក្តី អ្នកដឹកនាំដែលល្អមិនគួររងចាំយូរទេព្រោះបញ្ហាអាចនឹងធ្ងន់ធ្ងរជាងមុន៕ កែសម្រួលដោយ ៖ សុឃាក់
ចែករំលែកព័តមាននេះ