រាជធានីភ្នំពេញ ៖ សេចក្តីរាយការណ៍បឋមបានឲ្យដឹងថា ស្ត្រីជាកម្មការិនីរោងចក្រកាត់ដេរម្នាក់បានធ្វើដំណើរទៅកាន់ប៉ុស្តិ៍នគរបាលចោមចៅទី៣ ដើម្បីដាក់ពាក្យបណ្ដឹងសុំឲ្យនគរបាលជួយអន្តរាគមន៍ដោយគាត់ប្រាប់ថា ត្រូវមនុស្ស១ក្រុមដាក់ថ្នាំតាមរយៈការទះស្មាគាត់ រួចនាំយកគ្រឿងអលង្ការមាស និងលុយអស់ ព្រមទាំងទូរស័ព្ទដៃ១គ្រឿង ។ ហេតុការណ៍បានកើតឡើងនៅវេលាម៉ោង៤ល្ងាច ថ្ងៃទី១០ ខែធ្នូនេះមកម្ល៉េះ នៅតាមផ្លូវលំក្នុងភូមិត្រពាំងទា សង្កាត់ត្រពាំងក្រសាំង ខណ្ឌពោធិសែនជ័យ រាជធានីភ្នំពេញ។
តាមពិតទៅ គឺស្ត្រីខាងលើនោះបានចាញ់ល្បិចបោករបស់ក្រុមចោរទម្លាក់យោងតាមរូបភាពណាមួយប៉ុណ្ណោះ ហើយល្បិចចោរទម្លាក់យោងនេះពុំមែនទើបកើតឡើងលើកទី១នោះទេ គឺរាប់ដងមិនអស់មកហើយដែលអ្នកល្ងង់ទើបចាញ់បោកក្រុមនោះបាន ។ លុះរហូតដល់ព្រឹកថ្ងៃទី១១ ខែធ្នូ ទើបធ្វើដំណើរទៅដាក់ពាក្យបណ្តឹងនៅប៉ុស្តិ៍ចោមចៅ៣ ឲ្យជួយអន្តរាគមន៍ ប៉ុន្តែត្រូវបាននគរបាលប៉ុស្តិ៍ខាងលើណែនាំឲ្យគាត់ទៅដាក់ពាក្យប្ដឹងនៅសង្កាត់ត្រពាំងក្រសាំងវិញ ព្រោះជនសង្ស័យបាននាំគាត់ទៅដោះយកគ្រឿងអលង្ការលុយនិងទូរស័ព្ទនៅក្នុងភូមិសាស្ត្រសង្កាត់នោះ ។
ស្ត្រីរងគ្រោះរូបនោះឈ្មោះ ឆិល ចាន់ដារ៉ា អាយុ៤០ឆ្នាំ មុខរបរកម្មការនីរោងចក្រកាត់ដេរយីហោ «គ្លេតភី» ហៅរោងចក្រ៣ជាន់ ស្ថិតនៅក្នុងភូមិព្រៃព្រីងជើង សង្កាត់ចោមចៅ៣ គាត់ គឺជាស្រីម៉េម៉ាយកូន២នាក់ ដោយកូនប្រុសបួសជាសង្ឃ និងកូនស្រីម្នាក់នៅតូចនៅឡើយ ។ សព្វថ្ងៃគាត់ស្នាក់នៅផ្ទះជួលក្នុងភូមិជម្ពូវ័ន សង្កាត់ចោមចៅ៣ ខណ្ឌពោធិ៍សែនជ័យ ហើយមានស្រុកកំណើតនៅក្នុងភូមិត្រពាំងថ្នល់ ឃុំស្រែននោង ស្រុកត្រាំកក់ ខេត្តតាកែវ ។
របស់ដែលបាត់បង់ចិញ្ចៀនត្រាមាសទម្ងន់៣ជី១វង់ ក្រវិលមាស៥ហ៊ុន១គូ លុយចំនួន២០០ដុល្លារ ដែលទើបបើកប្រាក់ខែបានថ្មីៗ ព្រមទាំងប្រាក់រកមួយចំនួន និងទូរស័ព្ទដៃម៉ាក oppo ១គ្រឿងផងដែរ ។ ស្ត្រីរងគ្រោះខាងលើបាននិយាយថា កាលពីល្ងាចថ្ងៃទី១០ ខែធ្នូ ខណៈដែលគាត់កំពុងដើរចេញពីធ្វើការរោងចក្រចូលទៅកន្លែងដកលុយវីង រួចត្រឡប់ទៅកាន់ផ្ទះជួលដែលគាត់ស្នាក់នៅ ស្រាប់តែបានជួបស្ត្រី២នាក់ទៅទះស្មាគាត់ដែលជាហេតុធ្វើឲ្យគាត់រឹងជើងរឹងដៃដើរស្ទើរពុំចង់រួច គ្មានកម្លាំងកំហែងសោះ ។
ខណៈនោះឃើញមនុស្សម្នារដើរកាត់ពីមុខដែរ តែហាក់មានការភាន់ភាំងស្មារតីរកតែនិយាយមិនរួចឡើយ បន្ទាប់មកមានបុរស២នាក់ទៀតជិះម៉ូតូ២គ្រឿងទៅដល់ដែរ រួចបាននាំនាងឡើងម៉ូតូជិះចេញពីជិតរោងចក្រនៅភូមិជម្ពូវ័ន ហើយពេលទៅដល់ត្រង់ចំណុចក្នុងភូមិត្រពាំងទា សង្កាត់ត្រពាំងក្រសាំង ដោះដូរយកគ្រឿងអលង្ការ លុយ និងទូរស័ព្ទ រួចគេចខ្លួនបាត់ ។
ប្រភពដដែលបានបន្តថា ក្រោយមកមានអ្នករត់ម៉ូតូឌុបអាណិតនាងក៏បានឌុបនាងទៅកាន់ផ្ទះជួលវិញ ប៉ុន្តែនាងអត់បានទៅប្ដឹងនគរបាលភ្លាមៗនោះទេ គឺរហូតព្រឹកឡើងទើបទៅប្ដឹងនគរបាល ហើយនាងចង់សុំឲ្យនគរបាលជួយអន្តរាគមន៍ធ្វើយ៉ាងណាជួយយកទ្រព្យសម្បត្តិគាត់ដែលបាត់បង់នោះត្រឹមតែពាក់កណ្ដាលវិញក៏បានដែរ ។ ព្រោះគាត់គ្មានលុយសម្រាប់ឲ្យកូនរៀនទេ កូនប្រុសគាត់អាយុ១៥ឆ្នាំបួសជាសង្ឃត្រូវការលុយរៀន ចំណែកកូនស្រី អាយុ១០ឆ្នាំ ក៏ត្រូវការលុយរៀនដែរ ហើយគាត់ជាស្រីមេម៉ាយគ្មានលទ្ធភាពរកប្រាក់បានច្រើនឡើយ ។
ដោយឡែកនគរបាលមិនជឿថា មានថ្នាំឯណាមកដាក់គ្រាន់តែទះស្មា១ដៃធ្វើឲ្យរឹងជើងរឹងដៃនិយាយមិនចេញរហូតភាន់ភាំងស្មារតីនោះទេ បើថ្នាំសណ្ដំដាក់ក្នុងទឹកសុទ្ធៗ ភេសជ្ជៈជាដើមនោះ គឺអាច និងមានមែន ហើយបើត្រូវថ្នាំនេះហើយ និងមានអាការៈធ្ងន់ធ្ងរ និងមិនអាចធូរស្រាលឡើងវិញក្នុងរយៈពេលខ្លីឡើយ ។ ប៉ុន្តែករណីដូចស្ត្រីខាងលើនេះ គឺជាការចាញ់បោកក្រុមចោរទម្លាក់យោងដែលយកគ្រឿងអលង្ការកាឡៃទៅដូរយកគ្រឿងអលង្ការមាសពិតៗ ឬក៏លុយ និងទូរស័ព្ទពីគាត់ ហើយដោយសារតែគាត់ចង់បានរបស់ខែលជនសង្ស័យបង្ហាញឲ្យមើលឃើញច្រើនជាងរបស់ខ្លួនឯង ទើបងាយ និងចាញ់បោកបែបនេះ ៕
ចែករំលែកព័តមាននេះ