ខេត្តកោះកុង ៖ កាលពីវេលាម៉ោង៧ និង៣០នាទីព្រឹកនាថ្ងៃទី១១ ធ្នូ នេះ រដ្ឋបាលខេត្តកោះកុង បានសហការជាមួយមន្ទីរវប្បធម៌ និងវិចិត្រសិល្បៈ ដើម្បីរៀបចំពិធីមហោស្រពបង្ហើរខ្លែងខ្មែរលើកទី២៣…
ខេត្តកោះកុង ៖ កាលពីវេលាម៉ោង៧ និង៣០នាទីព្រឹកនាថ្ងៃទី១១ ធ្នូ នេះ រដ្ឋបាលខេត្តកោះកុង បានសហការជាមួយមន្ទីរវប្បធម៌ និងវិចិត្រសិល្បៈ ដើម្បីរៀបចំពិធីមហោស្រពបង្ហើរខ្លែងខ្មែរលើកទី២៣ នៅក្នុងទីលានបាល់ទាត់ ទល់មុខសាលាខេត្តចាស់ ស្ថិតក្រោមអធិបតីភាពលោកអ៊ុក សុជាតិ រដ្ឋលេខាធិការក្រសួងវប្បធម៌ និងវិចិត្រសិល្បៈ តំណាងដ៏ខ្ពង់ខ្ពស់លោកជំទាវ តឿន សកុណា រដ្ឋមន្ត្រីក្រសួងវប្បធម៌ និងវិចិត្រ
សិល្បៈ និងលោកស្រី ឈុន រ៉ាវុធ អភិបាលរង នៃគណៈអភិបាលខេត្តកោះកុង រួមទាំងមានការអញ្ជើញចូលរួមពីសំណាក់ លោក លោកស្រី ប្រធាន អនុប្រធាន អង្គភាពនានា លោកគ្រូ អ្នកគ្រូ និងសិស្សានុសិស្ស ជាច្រើននាក់ផងដែរ ។
លោក អ៊ុក សុជាតិ បានថ្លែងថា ខ្លែងខ្មែរនាពេលបច្ចុប្បន្នបាននិងកំពុងជះឥទ្ធិពលយ៉ាងខ្លាំងក្លា ដល់គ្រប់មជ្ឈដ្ឋានជាតិ អន្តរជាតិ ។ ជារៀងរាល់ឆ្នាំក្រសួងវប្បធម៌ និងវិចិត្រសិល្បៈ តែងតែប្រារព្វពិធីបើកមហោស្របបង្ហើរខ្លែងខ្មែរ ក្នុងក្របខណ្ឌទូទាំងប្រទេស ដើម្បីជ្រើសរើសយកអ្នកដែលមានទេពកោសល្យក្នុងការធ្វើខ្លែង និងបង្ហើរខ្លែងបានចំនួន២២លើកមកហើយ ។
ក្នុងនោះលក្ខណៈជាអន្តរជាតិយើងបានរៀបចំមហោស្របបានចំនួន៣លើក គឺឆ្នាំ២០០៤ មានខ្លែងអន្តរជាតិ៥ប្រទេសបានចូលរួមឆ្នាំ២០០៦ មានខ្លែងអន្តរជាតិ១៧ប្រទេស បានចូលរួម និងឆ្នាំ២០១០ មានខ្លែងអន្តរជាតិ៩ប្រទេសបានចូលរួមនៅលើឆាកអន្តរជាតិវិញ ខ្លែងខ្មែរបានចូលរួមមហោស្រពចំនួន៦៦លើក ។
ជាលទ្ធផលនៃការប្រកួតបង្ហើរខ្លែងខ្មែរ ដែលបានរៀបចំឡើងនាពេលនេះឃើញថា មានខ្លែងខ្មែរដែលត្រូវបានចូលរួមប្រកួតមានចំនួន២៣ខេត្ត/ក្រុង និងខ្លែងស្វ័យរិនមានចំនួន៤៧ខ្លែង ចំពោះខេត្តដែលទទួលបានជ័យលាភីគឹ ខេត្តតាកែវទទួលបានចំណាត់ថ្នាក់លេខ១ ខេត្តកំពង់ឆ្នាំង ទទួលបានចំណាត់ថ្នាក់លេខ២ ចំពោះខេត្តកោះកុង និង មណ្ឌលគិរី ទទួលបានចំណាត់ថ្នាក់លេខ៣ ។
ការរៀបចំខាងលើ ត្រូវបានប្រារព្ធឡើងក្នុងគោលបំណងផ្សព្វផ្សាយជូនប្រជាពលរដ្ឋ ពិសេសដល់កុលបុត្តកុលធីតាខ្មែរជំនាន់ក្រោយបានស្គាល់ និងចូលរួមជួយថែរក្សានូវវប្បធម៌ប្រពៃណីទំនៀមទម្លាប់ ដែលជាកេរ្តិ៍តំណែលរបស់ដូនតាអោយបានស្ថិតស្ថេរគង់វង្ស ព្រមទាំងបង្ហាញដល់ភ្ញៀវទេសចរជាតិ និងអន្តរជាតិ បានទស្សនានូវព្រិត្តិការណ៍វប្បធម៌ដ៏មានសារសំខាន់នេះ ៕
ចែករំលែកព័តមាននេះ