រាជធានីភ្នំពេញ៖ បន្ទាប់ពីបើការដ្ឋានសាងសង់ជាផ្លូវការសម្រាប់គម្រោងសាងសង់ផ្លូវល្បឿនលឿនភ្នំពេញ-ក្រុងព្រះសីហនុ តាំងពីថ្ងៃទី ២២ ខែមីនាដើមឆ្នាំ២០១៩ រហូតមកដល់ពេលនេះ តើគម្រោងសាងសង់ផ្លូវល្បឿនលឿនដំបូងគេនៅកម្ពុជាហាក់មានការស្ងប់ស្ងាត់ មិនទាន់មានការបញ្ជាក់អំពីបច្ចុប្បន្នភាពពីគម្រោងមួយនេះទេ ថាតើគិតចាប់ពីបើកការដ្ឋានរហូតមកដល់សព្វថ្ងៃនេះ គម្រោងធំដំបូងគេដែលមហាមិត្តចិនជួយដល់កម្ពុជាបានអភិវឌ្ឍន៍ ឬបានធ្វើដំណើរការសាងសង់របស់ខ្លួនសម្រេចបានប៉ុន្មានភាគរយៈនៃគម្រោងសរុបហើយ ?
តាមក្រសួងសាធារណការ និងដឹកជញ្ជូន បានគូសបញ្ជាក់ថានៅថ្ងៃទី៨ ខែធ្នូកន្លងទៅនេះថា គម្រោងសាងសង់ផ្លូវល្បឿនលឿនរាជធានីភ្នំពេញទៅក្រុងព្រះសីហនុ ដែលបានបើកការដ្ឋានសាងសង់ កាលពីថ្ងៃទី២២ ខែមីនា ឆ្នាំ២០១៩ សម្រាប់ប្រវែងប្រមាណ១៩០,០៣៥ គីឡូម៉ែត្រ និងគ្រោងប្រើប្រាស់ថវិកាវិនិយោគប្រមាណ២ពាន់លានដុល្លារសហរដ្ឋអាម៉េរិកនោះ សាងសង់សម្រេចបាន៧,៣០ភាគរយ គិតត្រឹមដំណាច់ខែវិច្ឆិកាឆ្នាំ២០១៩ នេះ ហើយនឹងរួចរាល់ជាស្ថាពរនៅឆ្នាំ២០២២។
បើតាមក្រសួងសាធារណការនិងដឹកជញ្ជូនបានគូសបញ្ជាក់ថា «គម្រោងផ្លូវល្បឿនលឿនរាជធានីភ្នំពេញ-ក្រុងព្រះសីហនុ ប្រវែងប្រមាណ ១៩០,០៣៥ គីឡូម៉ែត្រ និងគ្រោងប្រើប្រាស់ថវិកាវិនិយោគ ប្រមាណ ២ ពាន់លានដុល្លារសហរដ្ឋអាមេរិក ដែលបានបើកការដ្ឋានសាងសង់កាលពីថ្ងៃទី២២ ខែមីនា ឆ្នាំ២០១៩ រហូតមកដល់ពេលនេះដំណើរការសាងសង់សម្រេចបាន ៧,៣០% ហើយគិតត្រឹមខែវិច្ឆិកា ឆ្នាំ២០១៩។ ផ្លូវនេះតភ្ជាប់ពី ភូមិ ១ សង្កាត់សំរោងក្រោម ខណ្ឌពោធិ៍ សែន ជ័យ រាជធានីភ្នំពេញ ដល់ក្រុងព្រះសីហនុ»។
ប្រភពដដែលបន្តថា ផ្លូវនេះអនុវត្តការងារសាងសង់ដោយក្រុមហ៊ុន Cambodian PPSHV Expressway និងត្រួតពិនិត្យបច្ចេកទេសដោយក្រុមហ៊ុន MINCONSULT SDN. BHD. គ្រោងចំណាយថវិកាសាងសង់ប្រមាណ ២ ពាន់លានដុល្លារសហរដ្ឋអាមេរិក ប្រើរយៈពេលសាងសង់៤៨ខែ មានគន្លងផ្លូវចំនួន៤គន្លង ទទឹង ២៤,៥ម៉ែត្រ មានផ្លូវបំបែកទិស៧កន្លែង កន្លែងឈប់សម្រាកចំនួន៣កន្លែង ចំណតរថយន្ត១កន្លង មណ្ឌលប្រតិបត្តិការនិងថែទាំចំនួន៤កន្លង ស្ពានធំ និងស្ពានមធ្យមចំនួន៤០កន្លែង ស្ពានតូចចំនួន៥ កន្លែង ឆ្លងកាត់រាជធានីភ្នំពេញប្រមាណ ៨,៣ គីឡូម៉ែត្រ និងខេត្តចំនួន ០៤ ទៀត ក្នុងនោះរួមមាន ខេត្តកណ្តាលប្រវែងប្រមាណ ៩,១ គីឡូម៉ែត្រ ខេត្តកំពង់ស្ពឺប្រវែងប្រមាណ ៨០,៨គីឡូម៉ែត្រ ខេត្តកោះកុងប្រវែងប្រមាណ ១,៩២ គីឡូម៉ែត្រ និងខេត្តព្រះសីហនុប្រវែងប្រមាណ ៨៩,៨៩គីឡូម៉ែត្រ។
លោក Liu Qi Tao ប្រធានក្រុមប្រឹក្សាភិបាល ក្រុមហ៊ុន China Communication Construction Company ដែលជាក្រុមហ៊ុនមេ នៃក្រុមហ៊ុនសាជីវកម្មស្ពានថ្នល់ចិនធ្លាប់មានប្រសាសន៍ថា«គម្រោងនេះគឺជាគម្រោងផ្លូវល្បឿនលឿនទី១ ដែលនឹងត្រូវកសាងនៅកម្ពុជា ក្នុងនាមជាភាគីប្រតិបត្តិក្រុមហ៊ុនលោកនឹងខិតខំប្រឹងប្រែងធ្វើយ៉ាងណាស្ថាបនាផ្លូវល្បឿនលឿន ភ្នំពេញទៅខេត្តព្រះសីហនុឱ្យបានល្អនិង មានគុណភាព និងឱ្យក្លាយជាផ្លូវគំរូសម្រាប់ជាឧត្តមប្រយោជន៍របស់ប្រទេសនិងប្រជាជនកម្ពុជា»។
សម្តេចអគ្គមហាសេនាបតី តេជោ ហ៊ុន សែន នាយករដ្ឋមន្ត្រីព្រះរាជាណាចក្រកម្ពុជា មានប្រសាសន៍បញ្ជាក់កន្លងមកថា « ផ្លូវល្បឿនលឿននេះ គឺមានសារៈសំខាន់ខ្លាំងណាស់សម្រាប់កម្ពុជា ក្នុងជំរុញកំណើនសេដ្ឋកិច្ច ពិសេសគឺភ្ជាប់រវាងប៉ូលសេដ្ឋកិច្ចភ្នំពេញ នឹងព្រះសីហនុ។ សម្តេចតេជោ បានជំរុញនឹងស្នើសុំអោយក្រុមហ៊ុនរៀបចំបើកការដ្ឋាស្ថាបនាផ្លូវល្បឿនលឿន (Express Way)ឱ្យបានចេញជារូបរាងពិតប្រាកដឆាប់ៗខាងមុខនេះ»៕ កែសម្រួលដោយ ៖ សុឃាក់
ចែករំលែកព័តមាននេះ