រាជធានីភ្នំពេញ ៖ តាមសេចក្តីរាយការណ៍បឋមបានឱ្យដឹងថា គិតមកត្រឹមព្រឹកថ្ងៃទី១១ ធ្នូ ឆ្នាំ២០១៩ សមត្ថកិច្ចបានចុះមកត្រួតពិនិត្យកន្លែងកើតហេតុ និងជនរងគ្រោះចំនួន២នាក់ដែលបាត់បង់ជីវិតក្នុងហេតុការណ៍អគ្គិភ័យឆាបឆេះកន្លែងស្នាក់នៅរបស់បុគ្គលិកនៅអគារជាន់ទី៧របស់សណ្ឋាគារផ្កាឈូកទិព្វ ។ តាមសេចក្តីរាយការណ៍បានឱ្យដឹងបន្តថា…
រាជធានីភ្នំពេញ ៖ តាមសេចក្តីរាយការណ៍បឋមបានឱ្យដឹងថា គិតមកត្រឹមព្រឹកថ្ងៃទី១១ ធ្នូ ឆ្នាំ២០១៩ សមត្ថកិច្ចបានចុះមកត្រួតពិនិត្យកន្លែងកើតហេតុ និងជនរងគ្រោះចំនួន២នាក់ដែលបាត់បង់ជីវិតក្នុងហេតុការណ៍អគ្គិភ័យឆាបឆេះកន្លែងស្នាក់នៅរបស់បុគ្គលិកនៅអគារជាន់ទី៧របស់សណ្ឋាគារផ្កាឈូកទិព្វ ។
តាមសេចក្តីរាយការណ៍បានឱ្យដឹងបន្តថា គិតមកដល់វេលាម៉ោង១០និង៦នាទីព្រឹកថ្ងៃទី១១ ធ្នូ ឆ្នាំ២០១៩ សមត្ថកិច្ចបានរកឃើញអត្តសញ្ញាណរបស់ជនរងគ្រោះដែលបាត់បង់ជីវិតទាំង២នាក់ខាងលើហើយ គឺត្រូវជាម្តាយកូននឹងគ្នា ដោយស្ត្រីជាម្តាយឈ្មោះព្រុំ ថា អាយុ៥៦ឆ្នាំ ជាអ្នកលាងចាន ចំណែកកូនស្រីឈ្មោះព្រុំសុខលី ហៅលីយ៉ា អាយុប្រមាណជា១៨ឆ្នាំ ជាអ្នករៀបចំបន្ទប់។ ជនរងគ្រោះទាំង២នាក់មានស្រុកកំណើតក្នុងភូមិក្រាំងដូង ឃុំសំរោងក្រោម ស្រុកបន្ទាយមាស ខេត្តកំពត ។
សូមរំលឹកថា បុគ្គលិកចំនួន២នាក់ត្រូវភ្លើងឆេះខ្លោច បណ្តាលឱ្យបាត់បង់ជីវិតក្នុងបន្ទប់គួរឲ្យអាណោចអាធ័ម ក្នុងហេតុការណ៍អគ្គិភ័យឆាបឆេះកន្លែងស្នាក់នៅរបស់បុគ្គលិកដែលបម្រើការក្នុងសណ្ឋាគារនិងភោជនីយដ្ឋានឈូកទិព្វជាន់ទី៧ បង្កឲ្យមានការភ្ញាក់ផ្អើលកាលពីវេលាម៉ោង៣និង២០នាទីឈានចូលព្រឹកថ្ងៃទី១១ ខែធ្នូ ឆ្នាំ២០១៩ ត្រង់ចំណុចអគារចំណតរថយន្តរបស់សណ្ឋាគារ និងភោជនីយដ្ឋានឈូកទិព្វ ជាន់ទី៧ តាមបណ្ដោយផ្លូវ២៣៤ ស្ថិតក្នុងសង្កាត់ផ្សារដើមគ ខណ្ឌទួលគោក។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុខពេលកើតហេតុ គេឃើញមានផ្សែងហុយខ្មួលខ្មាញ់ចេញមកពីក្នុងអគារខាងលើជាន់ទី៥ ដែលមានរោងប្រក់ស័ង្កសីសម្រាប់បុគ្គលិកដែលបម្រើការនៅក្នុងសណ្ឋាគារនិងភោជនីយដ្ឋានឈូកទិព្វ១ស្នាក់នៅ។ លុះមួយស្ទុះក្រោយមកក៏ស្រាប់តែលេចចេញជាអណ្ដាតភ្លើងយ៉ាងសន្ធោសន្ធៅបានឆាបឆេះរោងប្រក់ស័ង្កសីខាងលើនោះ បង្កឲ្យមានការភ្ញាក់ផ្អើលយ៉ាងខ្លាំងដល់ប្រជាពលរដ្ឋនិងសមត្ថកិច្ចមូលដ្ឋានបានចុះមកជួយអន្តរាគមន៍ដល់កន្លែងកើតហេតុ និងបានទាក់ទងហៅរថយន្តពន្លត់អគ្គីភ័យឲ្យចុះមកធ្វើការបាញ់ទឹកពន្លត់។ បន្ទាប់មកក៏ឃើញមានរថយន្តពន្លត់អគ្គិភ័យជាច្រើនគ្រឿងបានចុះមកបាញ់ទឹកពន្លត់អស់រយៈពេលជិត១ម៉ោង ទើបអណ្តាតភ្លើងក៏បានរលត់ទៅវិញជាស្ថាពរ គឺរលត់នៅវេលាម៉ោង៤ទៀបភ្លឺថ្ងៃដដែល។
ពាក់ព័ន្ធនឹងករណីខាងលើនេះ អគ្គីភ័យបានឆាបឆេះរោងប្រក់ស័ង្កសីទំហំប្រមាណ៣ម៉ែត្រគុណនឹង៤ម៉ែត្រចំនួន១០បន្ទប់នៅអគារជាន់ទី៧ គឺភ្លើងបានឆាបឆេះរងការខូតខាតទាំងស្រុង ព្រមទាំងបណ្តាលឲ្យបុគ្គលិកចំនួន២នាក់ដែលដេកឱបគ្នានៅក្នុងបន្ទប់បានបាត់បង់ជីវិតដោយសារត្រូវភ្លើងឆេះខ្លោច ហើយគេមិនទាន់ដឹងថាជាប្រុសឬស្រីនៅឡើយទេ រង់ចាំព្រឹកទើបសមត្ថកិច្ចចុះមកពិនិត្យ។ ចំពោះមូលហេតុត្រូវបានសមត្ថកិច្ចជំនាញកំពុងតែស្រាវជ្រាវជាបន្តទៀត ។
សមត្ថកិច្ចបានអោយដឹងថា ក្នុងហេតុការណ៍ខាងលើនេះបានប្រើប្រាស់រថយន្តពន្លត់អគ្គីភ័យសរុបទាំងអស់ចំនួន១៥គ្រឿង ក្នុងនោះមានរថយន្តពន្លត់អគ្គិភ័យរបស់ការិយាល័យបង្ការនិងពន្លត់អគ្គីភ័យនៃសង្នការរាជធានីភ្នំពេញមកចំនួន១៤គ្រឿងបាញ់ទឹកអស់ចំនួន៩គ្រឿង និងរថយន្តពន្លត់អគ្គិភ័យរបស់ក្រុមហ៊ុនសាបៀរចំនួនមួយគ្រឿងផងដែរ សរុបបាញ់ទឹកពន្លត់អស់ចំនួន១០គ្រឿង ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕ (កែសម្រួលដោយ ៖ ធីតា)
ចែករំលែកព័តមាននេះ