រាជធានីភ្នំពេញ៖ ស្ថិតក្នុងរយៈពេលខ្លីចុងក្រោយនេះផលិតផលកសិកម្មកម្ពុជាបាននាំចេញទៅទីផ្សារប្រទេសកូរ៉េនៅមានចំនួន និងបរិមាណតិចតួច ។ ប៉ុន្តែបរិមាណនេះអាចនឹងកើនឡើងនាពេលអនាគតខណៈពេលប្រទេសទាំងពីរបានបោះជំហ៊ានថ្មីមួយទៀតធ្វើការសិក្សាលទ្ធភាពចរចាលើកិច្ចព្រមព្រៀងពាណិជ្ជកម្មសេរីទ្វេភាគីរួមគ្នា ។
យោងតាមរបាយការណ៍ដែលទទួលបានពីមន្ត្រីនៃក្រសួងកសិកម្ម រុក្ខាប្រមាញ់ និងនេសាទ បង្ហាញថាផលិតផលកសិកម្មកម្ពុជានាំចេញទៅប្រទេសកូរ៉េគិតត្រឹមរយៈពេល ១០ខែ ឆ្នាំ ២០១៩សរុប ៣៦ប្រភេទហើយមានបរិមាណសរុបជាង ៤,៨ពាន់តោន ។ ផលិតផលកសិផលកម្ពុជាដែលបាននាំចេញទៅប្រទេសកូរ៉េ បើតាមរបាយការណ៍មានដូចជា ៖ ប្រេងដូងឆៅជាង ៤.៦០០តោន, ជ័រកៅស៊ូ ១២០តោន, ម្ស៉ៅម្រុំ ០,០៧តោន, កន្លេលកក់ ១៣តោន, ម្ស៉ៅដំឡូងមី ៣៧តោន, ដំណាប់ស្វាយជាង ៤តោន, គ្រាប់ពោត ១១តោន,ម្រេច ០,២៦តោន, ផ្សិតលីងជឺ ១,៧៨តោន, ទឹក ញ ១១តោន, ផ្លែ ញ ក្រៀម ២តោន, សណ្តែកផ្កាយ ០,១២តោន, គ្រាប់ស្វាយចន្ទី ២១តោន, ស្លឹកទៀបបារាំង ០,១៣តោន, សំណាករុក្ខជាតិ ០,១០តោន និងដំណាប់ម្នាស់ ០,១០តោន ។
ដោយឡែកប្រភេទកសិផលដែលមិនបាននាំចេញកាលឆ្នាំ ២០១៩តែបាននាំចេញកាលពីឆ្នាំ ២០១៨មានដូចជា៖ ថ្នាំជក់, ម្ស៉ៅ និងចំណិតម្រះ, កំទេចបន្លែក្រៀម, ម្ស៉ៅដំឡូងមី, ល្ហុងត្រាំ, ក្រូចណាំងូវ, ត្រពាំងជ្រក់, គ្រាប់កាហ្វេ, ឈើកែច្នៃ ៦០តោន, ការ៉េមស្វាយ, ការ៉េមផាសិន, អាហារកែច្នៃ, សណ្តែកបាយ, ចានស្លា, ចំណីសត្វ ៨៦៨តោន, គ្រឿងទេស ២៣តោន, គ្រាប់ស្គួយ ០,១០តោន, ស្លឹកចេក ១តោន និងចេកឆាប ០,១៩តោន ។
ទន្ទឹមការនាំចេញប្រភេទផលិតផលកសិផលកម្ពុជាទៅប្រទេសទីផ្សារប្រទេសកូរ៉េមិនទាន់ឆ្លើយតបទៅដូចអ្វីដែលកម្ពុជាចង់បាន តែកម្ពុជា និងកូរ៉េបានបោះជើងជំហ៊ានថ្មីមួយទៀតនាពេលថ្មីៗនេះ គឺប្រទេសទាំងពីរបានធ្វើការសិក្សាលទ្ធភាពចរចាលើកិច្ចព្រមព្រៀងពាណិជ្ជកម្មសេរីរួមគ្នារួចហើយកាលពីថ្មីៗនេះដោយរំពឹងថា ការធ្វើពាណិជ្ជកម្មទៅវិញទៅមកនឹងប្រសើរឡើងមួយកម្រិតទៀត ។
ពាក់ព័ន្ធនឹងចំណុចនេះបើតាមក្រសួងពាណិជ្ជកម្មធ្លាប់បានឱ្យដឹងថា កិច្ចប្រជុំទ្វេភាគីរវាង សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និង លោក Moon Jae-In ប្រធានាធិបតីនៃសាធារណរដ្ឋកូរ៉េ កាលពីថ្ងៃទី ១៥ ខែមីនា ឆ្នាំ២០១៩ នៅវិមានសន្តិភាព ក្នុងដំណើរទស្សនកិច្ចផ្លូវការមកកាន់កម្ពុជា ប្រមុខដឹកនាំកំពូលនៃប្រទេសទាំងពីរបានឯកភាពលើការជំរុញ និងពង្រីកទំហំពាណិជ្ជកម្ម និងវិនិយោគរវាងប្រទេសទាំងពីរ ព្រមទាំងបានណែនាំឱ្យមានការសិក្សាលទ្ធភាពបង្កើតកិច្ចព្រមព្រៀងពាណិជ្ជកម្មសេរីទ្វេភាគីកម្ពុជា-កូរ៉េ ។
តាមសេចក្ដីប្រកាសព័ត៌មានរបស់ក្រសួងពាណិជ្ជកម្មកាលពីថ្ងៃទី ២៥ខែវិច្ឆិកា បង្ហាញថា «បន្ទាប់ពីបានពិគ្រោះយោបល់ជាបន្តបន្ទាប់រវាងមន្ត្រីបច្ចេកទេសនៃប្រទេសទាំងពីរ លើនីតិវិធីក្នុងការចរចាបង្កើតកិច្ចព្រមព្រៀងពាណិជ្ជកម្មសេរីរវាងប្រទេសទាំងពីរ លោក ប៉ាន សូរស័ក្តិ រដ្ឋមន្ត្រីពាណិជ្ជកម្មកម្ពុជា និងលោកជំទាវ Yoo Myung-Hee រដ្ឋមន្ត្រីពាណិជ្ជកម្មកូរ៉េ បានចុះហត្ថលេខាលើសេចក្តីថ្លែងការណ៍រួមស្តីពីការចាប់ផ្តើមការសិក្សាលទ្ធភាពក្នុងការបង្កើតកិច្ចព្រមព្រៀងពាណិជ្ជកម្មសេរីទ្វេភាគីកម្ពុជា-កូរ៉េ នៅក្នុងឱកាសនៃកិច្ចប្រជុំកំពូលរំឭកខួបអនុស្សាវរីយ៍ ៣០ ឆ្នាំនៃទំនាក់ទំនងអាស៊ាន-កូរ៉េ និងកិច្ចប្រជុំកំពូលមេគង្គ-កូរ៉េ ពីថ្ងៃទី ២៥-២៧ ខែវិច្ឆិកា ឆ្នាំ ២០១៩ នៅទីក្រុងប៊ូសាន សាធារណរដ្ឋកូរ៉េ» ។
តាមការរំពឹងទុក កិច្ចព្រមព្រៀងពាណិជ្ជកម្មសេរីទ្វេភាគីកម្ពុជា-កូរ៉េ នឹងជួយពង្រឹងទំនាក់ទំនង និងពង្រីកទំហំពាណិជ្ជកម្មនៃប្រទេសទាំងពីរបន្ថែមទៀត ព្រមទាំងបង្កើតឱកាសការងារក្នុងស្រុក ការនាំចេញសេវា និងពង្រីកវិនិយោគបន្ថែម ដែលនឹងចូលរួមសំខាន់ក្នុងការអភិវឌ្ឍសេដ្ឋកិច្ចជាតិ និងផ្តល់ផលប្រយោជន៍ដល់ប្រជាជននៃប្រទេសទាំងពីរផងដែរ ។
បើតាមក្រសួងពាណិជ្ជកម្មដដែលបង្ហាញថា ក្នុងឆ្នាំ ២០១៨កន្លងទៅនេះ ទំហំពាណិជ្ជកម្មនៃប្រទេសទាំងពីរបានកើនឡើងជាលំដាប់ គឺមានទំហំប្រមាណ ៧៥៦លានដុល្លាសហរដ្ឋអាមេរិក ដោយកើនឡើងប្រមាណ ១៤,៦៩% បើធៀបនឹងឆ្នាំ២ ០១៧ ។ ទំនិញនាំចេញសំខាន់ៗរបស់កម្ពុជាទៅកូរ៉េរួមមាន៖ អាវយឺត, សម្លៀកបំពាក់បុរស, គ្រឿងអេឡិចត្រូនិក ,ស្បែកជើង, វ៉ាលី, កម្ទេចអាលុមមីញ៉ូម, ភេសជ្ជៈ, សម្ភារពេទ្យ (ចេសវះកាត់) តង់ និងកៅស៊ូធម្មជាតិ ។ ទំនិញនាំចូលសំខាន់ពីកូរ៉េរួមមាន៖ រថយន្តដឹកទំនិញ, ក្រណាត់ចាក់, ទឹករ៉ែធម្មជាតិ, ភួយ, គ្រឿងអេឡិចត្រូនិក, គ្រឿងចក្រ, បន្ទះ ឬសន្លឹកនីកែល, ស្បែកពីសត្វចៀមកែច្នៃរួច, ក្រណាត់ជ្រលក់ពណ៌ និងផលិតផលថែរក្សាសម្រស់ ។
ក្រសួងពាណិជ្ជកម្មសង្កត់ធ្ងន់ថា «តាមការរំពឹងទុក កិច្ចព្រមព្រៀងពាណិជ្ជកម្មសេរីទ្វេភាគីកម្ពុជា-កូរ៉េ នឹងជួយពង្រឹងទំនាក់ទំនង និងពង្រីកទំហំពាណិជ្ជកម្មនៃប្រទេសទាំងពីរបន្ថែមទៀត ព្រមទាំងបង្កើតឱកាសការងារក្នុងស្រុក ការនាំចេញសេវា និងពង្រីកវិនិយោគបន្ថែម ដែលនឹងចូលរួមសំខាន់ក្នុងការអភិវឌ្ឍសេដ្ឋកិច្ចជាតិ និងផ្តល់ផលប្រយោជន៍ដល់ប្រជាជននៃប្រទេសទាំងពីរ» ៕ កែសម្រួលដោយ ៖ សុឃាក់
ចែករំលែកព័តមាននេះ