រាជធានីភ្នំពេញ ៖ គិតត្រឹមថ្ងៃទី១០ ខែធ្នូ ឆ្នាំ២០១៩ កម្ពុជាទទួលបានមេដាយមាស៤ ហើយ ដោយបានរំកិលពីលេខរៀងទី៩ក្នុងចំណោម១១ប្រទេសមកលេខរៀងទី៧ ខណៈដែល សមាសភាពកីឡាករកម្ពុជានៅមានលទ្ធភាពដណ្ដើមយកមេដាយមាសលើវិញ្ញាសាជាច្រើនទៀត…
រាជធានីភ្នំពេញ ៖ គិតត្រឹមថ្ងៃទី១០ ខែធ្នូ ឆ្នាំ២០១៩ កម្ពុជាទទួលបានមេដាយមាស៤ ហើយ ដោយបានរំកិលពីលេខរៀងទី៩ក្នុងចំណោម១១ប្រទេសមកលេខរៀងទី៧ ខណៈដែល សមាសភាពកីឡាករកម្ពុជានៅមានលទ្ធភាពដណ្ដើមយកមេដាយមាសលើវិញ្ញាសាជាច្រើនទៀត ។ មកទល់ពេលនេះ ម្ចាស់មេដាយមាសទាំង៤ ធ្វើឲ្យមហាជនកោតសរសើរយ៉ាងខ្លាំង ។
សមាសភាពម្ចាស់មេដាយមាសរួមមាន កីឡាការិនី Jiu-jitsu ខាន់ ចេសា អ្នករកបានមេដាយមាសទី៤ឲ្យកម្ពុជា ក្នុងព្រឹត្តិការណ៍កីឡាស៊ីហ្គេមលើកទី៣០នៅប្រទេសហ្វ៊ីលីពីន ដែលធ្វើឲ្យគ្រប់ប្រភេទមេដាយមានចំនួនលើសពីមេដាយកាលពីព្រឹត្តិការណ៍នៅម៉ាឡេស៊ីនាឆ្នាំ ២០១៧
កន្លងទៅ ។ ដោយសារមេដាយរបស់នាង បានជួយឲ្យកម្ពុជារកបានមេដាយសរុប៤១ គ្រឿង
គិតត្រឹមថ្ងៃទីទី១០ ខែធ្នូគឺ មាស៤ ប្រាក់៦ និងសំរឹទ្ធិ៣១ ខណៈកាលពី២ឆ្នាំមុន កម្ពុជាបាន
មេដាយមាស៣ ប្រាក់២ និងសំរឹទ្ធិ១២ ។
ចំណែកមេដាយមាស១ទៀត រកបានដោយក្រុមកីឡាការិនីប៉េតង់ លើវិញ្ញាសាវាយ៣ស្មើ និងមេដាយមាស២ទៀតរកបានដោយកីឡាករល្បុក្កតោ(Arnis) យ៉ុង ម៉េងលី ដែលដណ្តើមបានមេដាយមាសដំបូងបំផុតលើវិញ្ញាសា Padded Stick ទម្ងន់៦០-៦៥គីឡូក្រាមពី ព្រឹត្តិការណ៍កីឡាតំបន់អាស៊ានឆ្នាំ២០១នេះ និងដោយកីឡាការិនីតេក្វាន់ដូ ស៊ន សៀវម៉ី ។
សៀវម៉ី អាចការពារមេដាយមាសស៊ីហ្គេមរបស់ខ្លួនក្នុងទម្ងន់លើស៧៣គីឡូក្រាម តាមរយៈការយកឈ្នះកីឡាការិនីម្ចាស់ផ្ទះហ្វ៊ីលីពីន Alora Kirstie Elaine ១២-៩ នៅវគ្គផ្តាច់ព្រ័ត្រ ។ មេដាយមាសរបស់ ខាន់ ចេសា តាមរយៈការដណ្តើមបានពីកីឡាការិនីហ្វ៊ីលីពីន Napolis Jenna Kaila ដោយពិន្ទុល្អជាងក្នុងប្រភេទទម្ងន់៤៩គីឡូក្រាម ជាមេដាយមាសទី៤ ដែលនាំ ឲ្យកម្ពុជាអាចបំបែកចំនួនមេដាយមាសកាលពីឆ្នាំ២០១៧ ដែលរកបានចំនួន៣ ។
ដោយឡែក មេដាយប្រាក់និងសំរឹទិ្ធក៏កម្ពុជា អាចបំបែកកំណត់ត្រាបានដែរ បើទោះមិនទាន់ បញ្ចប់ការប្រកួតផ្លូវការក្តី ។ ឆ្លងកាត់ការប្រកួតរយៈពេល៩ថ្ងៃ ចាប់ពីថ្ងៃបើកព្រឹត្តិការណ៍នៅយប់ថ្ងៃទី៣០ ខែវិច្ឆិកាមក អត្តពលិកកម្ពុជា រកបានមេដាយប្រាក់ចំនួន៦ និងសំរឹទ្ធិ៣១ ខណៈដែលកាលពីនៅម៉ាឡេស៊ីរកបានប្រាក់២ និងសំរឹទិ្ធ១២ប៉ុណ្ណោះ ។
ខាងក្រោមនេះជាសមាសភាពទទួលបានមេដាយរួមមាន ៖
វិញ្ញាសាកីឡា Arnis ៖ មាស១ ប្រាក់២ និងសំរឹទ្ធ១៧
១-កីឡាករ យ៉ុង ម៉េងលី មាស១ ប្រាក់១
២-កីឡាការិនី ស៊ីវ័ន្ត សូនីតា ប្រាក់១ សំរឹទ្ធិ១
៣-កីឡាការិនី បូ ចន្ធី សំរឹទិ្ធ២
៤-កីឡាការិនី យស់ សញ្ចនា សំរឹទ្ធិ២
៥-កីឡាការិនី ខៀវ ចិន្តារ័ត្ន សំរឹទ្ធិ២
៦-កីឡាករ ឌឹប ង៉ែត សំរឹទ្ធិ២
៧-កីឡាករ មឿន ប៊ុនលី សំរឹទ្ធិ២
៨-កីឡាករ សុខ ឈុន សំរឹទ្ធិ២
៩-កីឡាករ ឆេម សីឡា សំរឹទ្ធិ២
១០-កីឡាការិនី អេង ស៊ូម៉ាឡា សំរឹទ្ធិ២
កីឡាតេក្វាន់ដូ ៖ មាស១ ប្រាក់២ សំរឹទិ្ធ១
១-កីឡាការិនី ស៊ន សៀវម៉ី មេដាយមាស១
២-កីឡាការិនី Cassandra Nicole Tubbs មេដាយប្រាក់១
៣-កីឡាការិនី ឈឿង អាលីហ្សា មេដាយប្រាក់១
៤-កីឡាការិនី អ៊ុន ពេជ្រចរណៃ មេដាយ សំរឹទ្ធិ១
កីឡាប៉េតង់ ៖ មាស១ ប្រាក់១
១-ក្រុមនារីបីទល់បី (ស្រ៊ាង សុរ៉ាឃីម, ឃួន យ៉ារី, ដួង ឌីណា និង វង ចន្ថា) មេដាយមាស ១
២-វាយគូបុរស (សុខ ចាន់មាន និង យ៉ែម បូរ៉ា) មេដាយប្រាក់១
កីឡាជឺជិតស៊ូ ៖ មាស១
១-កីឡាការិនី ខាន់ ចេសា (Khan Jessa) មេដាយមាស១
កីឡាសីប៉ាក់តាក្រ (សីដក់) ៖ ប្រាក់១
១-ក្រុមបុរស(នុត វិសាល, ហេង រ៉ាវុធ, ហួត សុវុត្ថា, ឈន សុខុម, ឈុំ ហាប់ឈុន, ជាតិ ខេមរិន្ទ) ប្រាក់១
គុនខ្មែរ ៖ សំរឹទ្ធិ៣
១-កីឡាករ ឡៅ ចិត្រា សំរឹទ្ធិ១
២-កីឡាករ វ៉ាន់ វឿន សំរឹទ្ធិ១
៣-កីឡាករ ហ៊ឹម គឹមរៀង សំរឹទ្ធិ១
សូហ្វតិន្នីស ៖ សំរឹទ្ធិ២
១-កីឡាការិនី ម៉េត ម៉ារីយ៉ាន សំរឹទ្ធិ១
២-ក្រុមបុរស (កាន់ សុភ័ណ្ឌ, អន សម្បត្តិ, ឌឹម សម្បត្តិ, ចន ម៉ាដា, យី គាវីរៈ ប៉ិល វណ្ណ នី) សំរឹទ្ធិ១
ប្រដាល់សកល ៖ សំរឹទ្ធិ៥
១-កីឡាករ សៅ រង្សី សំរឹទិ្ធ១
២-កីឡាករ ស៊ីវ សុងម៉េង សំរឹទ្ធិ១
៣-កីឡាករ យ៉ុន ដារ័ត្ន សំរឹទ្ធិ១
៤-កីឡាការិនី នៅ ស្រីពៅ សំរឹទ្ធិ១
៥-កីឡាការិនី វី ស្រីខួច សំរឹទ្ធិ១ ។
គុនខ្មែរ ៖ សំរឹទិ្ធ២
១-កីឡាករ ឡៅ ចន្ត្រា សំរឹទ្ធិ១
២-កីឡាករ ខេម ចាន់ សំរឹទ្ធិ១
ចំបាប់ ៖ សំរឹទ្ធិ១
១-កីឡាករ អេង ផានិត សំរឹទ្ធិ១ ៕ (កែសម្រួលដោយ ៖ បុប្ផា)
ចែករំលែកព័តមាននេះ