រាជធានីភ្នំពេញ ៖ គណៈប្រឹក្សាភិបាលនៃកម្មវិធីរួមគ្នារបស់អង្គការសហប្រជាជាតិ «រួមគ្នា ដើម្បីមុខរបរ និងការងាររបស់យុវជននៅកម្ពុជា» គ្រោងនឹងចាប់អនុវត្តជំហានទី២នៃ «គម្រោងការងារសមរម្យសម្រាប់យុវជនក្នុងប្រទេសកម្ពុជា» រយៈពេល៤ឆ្នាំទៀត (២០២០-២០២៣)…
រាជធានីភ្នំពេញ ៖ គណៈប្រឹក្សាភិបាលនៃកម្មវិធីរួមគ្នារបស់អង្គការសហប្រជាជាតិ «រួមគ្នា ដើម្បីមុខរបរ និងការងាររបស់យុវជននៅកម្ពុជា» គ្រោងនឹងចាប់អនុវត្តជំហានទី២នៃ «គម្រោងការងារសមរម្យសម្រាប់យុវជនក្នុងប្រទេសកម្ពុជា» រយៈពេល៤ឆ្នាំទៀត (២០២០-២០២៣) ដោយគ្រោងចំណាយទឹកប្រាក់ប្រមាណជាង៨លានដុល្លារ ។
ថវិកាទាំងនេះបានមកពីការរួមវិភាគទានរបស់រាជរដ្ឋាភិបាល ភ្នាក់ងារស្វីស ដើម្បីការអភិវឌ្ឍ និងកិច្ចសហប្រតិបត្តិការ (SDC) ទីភ្នាក់ងារចូលរួមរបស់អង្គការសហប្រជាជាតិ និងដៃគូឯកជននានាផងដែរ ។ គម្រោងថវិកានេះបានធ្វើឡើងក្នុងកិច្ចប្រជុំលើកទី៥ ចូលរួមជាសហប្រធានដឹកនាំ និង សម្របសម្រួលដោយលោក ហេង សួរ រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ និងលោកស្រី Pauline Tamesis អ្នកសម្របសម្រួលរបស់អង្គការសហប្រជាជាតិប្រចាំនៅកម្ពុជា ចាប់ពីថ្ងៃទី៩-១០ ខែធ្នូ ឆ្នាំ២០១៩ នៅខេត្តសៀមរាប ។
លោក ហេងសួរ បានលើកឡើងថា កិច្ចប្រជុំនេះរៀបចំឡើងក្នុងគោលបំណងពិនិត្យមើលទៅលើលទ្ធផលដែលសម្រេចបានរបស់កម្មវិធីនៅក្នុងជំហានទី១ ពិភាក្សា និងអនុម័តអំពីជំហានទី២ និងផែនការសកម្មភាពសម្រាប់ឆ្នាំ២០២០ និងដាក់ឲ្យដំណើរការនៃជំហានទី២ ដែលមានរយៈពេល៤ឆ្នាំ ចាប់ពីឆ្នាំ២០២០-២០២៣ ។
គួររំលឹកថា ជំហានទី១ នៃគម្រោងរួមគ្នានេះត្រូវបានអនុវត្តក្នុងខែកញ្ញា ឆ្នាំ២០១៧ នឹងត្រូវបានបញ្ចប់ដោយជោគជ័យនៅក្នុងខែវិច្ឆិកា ឆ្នាំ២០១៩ ដែលមានរយៈពេល២ឆ្នាំ ដោយចំណាយថវិកាសរុបចំនួន ៤,៤៧៨,០០០ដុល្លាអាមេរិក ក្រោមជំនួយគាំទ្រសប្បុរសធម៌ និងការចូលរួមជាយុទ្ធសាស្ត្រពីទីភ្នាក់ងារស្វីស សម្រាប់ការអភិវឌ្ឍ និងកិច្ចសហប្រតិបត្តិការ (SDC) និងទីភ្នាក់ងាររបស់អង្គការសហប្រជាជាតិ ដោយមានសហការជាដៃគូជាមួយនឹងរាជរដ្ឋាភិបាលកម្ពុជា ។
បើតាមលោកហេង សួរ បានឲ្យដឹងថា ជំហាទី២ ដែលគ្រោងនឹងចាប់អនុវត្តនៅក្នុង ឆ្នាំ២០២០ គឺមានរយៈពេល៤ឆ្នាំ (២០២០-២០២៣) មានឈ្មោះថា «ការងារសមរម្យសម្រាប់យុវជនក្នុងប្រទេសកម្ពុជា» និងគ្រោងចំណាយទឹកប្រាក់ប្រមាណជាង៨លានដុល្លារ ដែលបានមកពីការរួមវិភាគទានរបស់រាជរដ្ឋាភិបាលភ្នាក់ងារស្វីស ដើម្បីការអភិវឌ្ឍនិងកិច្ច សហប្រតិបត្តិការ (SDC) ទីភ្នាក់ងារចូលរួមរបស់អង្គការសហប្រជាជាតិ និងដៃគូឯកជននានាផងដែរ ៕ កែសម្រួលដោយ ៖ សុឃាក់
ចែករំលែកព័តមាននេះ