ADផ្ទាំងផ្សព្វផ្សាយពាណិជ្ជកម្ម

អង្គការសង្គមស៊ីវីលអបអរសាទរទិវាសិទ្ធិមនុស្សអន្តរជាតិលើកទី៧១

4 ឆ្នាំ មុន

ភ្នំពេញ
១០ ខែ ធ្នូ ឆ្នាំ ២០១៩ ម៉ោង ១៤:១១

រាជធានីភ្នំពេញ ៖ អង្គការសង្គមស៊ីវិលចំនួន២១ បានរៀបចំពិធី អបអរសាទរទិវាសិទ្ធិមនុស្សអន្តរជាតិលើកទី៧១ (១០ធ្នូ១៩៤៨-១០ធ្នូ២០១៩) ក្រោមប្រធានបទ«លើកកម្ពស់សិទ្ធិមនុស្សក្នុងការអភិវឌ្ឍ» គោលបំណងដើម្បីលើកកម្ពស់សិទ្ធិសរីភាពនិងប្រជាធិបតេយ្យ នៅកម្ពុជាអោយកាន់តែប្រសើរឡើង។
ការប្រារព្វទិវាសិទ្ធិមនុស្សអន្តរជាតិនេះបានរៀបចំឡើងនៅម៉ោងប្រមាណ៨ព្រឹកថ្ងៃទី១០ខែធ្នូឆ្នាំ២០១៩នេះ នៅទីលានប្រជាធិបតេយ្យ ដែលស្ថិតនៅសួនច្បារសូគីម៉ិច ក្នុងសង្កាត់ឫស្សីកែវ ខណ្ឌឫស្សីកែវ ដោយមានការរួមពីតំណាងសហព័ន្ធសជីព សម្ព័ន្ធសហជីព អង្គការ សមាគមសង្គមស៊ីវិលនិងសកម្មជនដីធ្លីមួយចំនួន ប្រមាណជាង១ពាន់នាក់ក្រោមការរៀបចំពីក្រុមសម្ព័ន្ធអង្គការសង្គមស៊ីវិល ចំនួន២១ព្រមទាំងមានការចូលរួមពីតំណាងអគ្គរាជទូត-រដ្ឋទូត និងអ្នកសង្គេតការផងដែរ។

លោកមាស សាវ៉ាត តំណាងអង្គការសង្គមស៊ីវិល និងជាប្រធានក្រុមប្រឹក្សាភិបាលនៃអង្គការសម្ព័ន្ធការពារសិទ្ធិមនុស្សកម្ពុជា(CHRAC) និងជាអគ្គលេខាធិការនៃសមាគមអាដហុក(ADHOC) បានអោយអានរបាយការណ៍ស្វាគមន៍ អោយដឹងថា ថ្ងៃនេះអង្គការសម្ព័ន្ធភាពការងារសិទ្ធិមនុស្សកម្ពុជា សហព័ន្ធសហភាពការងារកម្ពុជា សមាគម និងអង្គការមិនមែនរដ្ឋាភិបាលជាតិ និងអន្តរជាតិចំនួន២១អង្គការ ដែលបានកំពុងចូលរួមនៅទីនេះមានកិត្តិយស និងមានសេចក្តីសោមនស្សរីករាយយ៉ាងក្រៃលែងបានផ្តួចផ្តើមគំនិតជាមួយគ្នាធ្វើការប្រារព្ធ និងអបអរសាទរទិវាសិទ្ធិមនុស្សអន្តរជាតិ ខួបលើកទី៧១នៅថ្ងៃនេះ។

លោកមាស សាវ៉ាត បានបន្តថា ទិវាសិទ្ធិមនុស្សអន្តរជាតិខួបលើកទី៧១ គឺជាទិវារំលឹកនូវការអនុម័តសេចក្តីប្រកាសជាសាកលស្តីពីសិទ្ធិមនុស្សថ្ងៃទី១០ ធ្នូ១៩៤៨-១០ ធ្នូ ២០១៩)ដោយមហាសន្និបាតអង្គការសហប្រជាជាតិ។ ការប្រារព្ធទិវាសិទ្ធិមនុស្សអន្តរជាតិជារៀងរាល់ឆ្នាំមានអត្ថន័យជាប្រវត្តិសាស្ត្រនិងដើម្បីឧទ្ទិសដល់វីរភាព និងការតស៊ូរបស់បុព្វបុរស បុព្វនារី និងសកម្មជនសិទ្ធិមនុស្សជាច្រើនទៀតនៅទូទាំងសកលលោក រហូតដល់សម្រេចបាននូវសេចក្តីប្រកាសជាសាកលស្តីពីសិទ្ធិមនុស្ស នៅថ្ងៃទី១០ ខែធ្នូឆ្នាំ១៩៤៨។

លោកមាស សាវ៉ាត បានបន្តទៀតថា ដោយឡែកនៅព្រះរាជាណាចក្រកម្ពុជាយើងក៏បានរួមគ្នាប្រារព្ធទិវានេះ ក្នុងគោលបំណងរំលឹកនូវការតស៊ូ និងការខិតខំប្រឹងប្រែងរបស់សកម្មជន/សកម្មនារីការពារសិទ្ធិមនុស្ស(W/HRDs) ទាំងអស់ ដែលបានចូលរួមការពារគោរព និងលើកស្ទួយសិទ្ធិមនុស្សនិងសេរីភាពមូលដ្ឋាននានា នាពេលកន្លងមកនេះផងដែរ។ សេចក្តីប្រកាសជាសកល ស្តីពីសិទ្ធិមនុស្ស គឺជាកម្រងអត្ថបទសិទ្ធិមនុស្ស ដ៏សំខាន់សម្រាប់ប្រជា ជាតិនៅទូទាំងពិភពលោក ដោយទទួលស្គាល់នូវតម្លៃនៃសិទ្ធិមនុស្ស និងសេរីភាពជាមូលដ្ឋានរបស់មនុស្ស ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព៕ (កែសម្រួលដោយ ៖ ធីតា)