រាជធានីភ្នំពេញ ៖ លោក កឹម សុខា អតីតប្រធានគណបក្សសង្គ្រោះជាតិបានចាត់ទុកការពារសិទ្ធិមនុស្ស គឺជាការថែរក្សាសន្តិភាពនៅកម្ពុជា ហើយក៏មានការចែងក្នុងច្បាប់រដ្ឋធម្មនុញ្ញបញ្ជាក់ផងដែរ ។ ដោយនៅថ្ងៃទី១០ ខែធ្នូនេះ លោកកឹម សុខា បានអបអរសាទរទិវាសិទ្ធិមនុស្សអន្តរជាតិ១០ធ្នូលើក ទី៧១ (១០ ធ្នូ ១៩៤៨- ១០ ធ្នូ ២០១៩ ) ដោយបានសរសេរលើប ណ្តាញសង្គមហ្វេសប៊ុកយ៉ាងដូចច្នេះថា «ការពារសិទ្ធិមនុស្ស គឺថែរក្សាសន្តិភាព» ។
លោកបន្តថា បើមានការរំលោភសិទ្ធិមនុស្សនាំមកនូវភាពអយុត្តិធម៌ បង្កការឈឺចាប់ បណ្តាលឲ្យមានការរើបម្រះ ហើយអាចនាំមកនូវអស្ថេរភាពសង្គមដែលជាកត្តានាំឲ្យប៉ះពាល់ដល់សន្តិភាព ។ លោកក៏បានលើកឡើងយ៉ាងទៀតថា ដូចមានខ្លឹមសារនៅក្នុងបុព្វកថានៃសេចក្តីប្រកាសជាសកលរបស់អង្គការសហប្រជាជាតិស្តីពីសិទ្ធិមនុស្សដែលរដ្ឋធម្មនុញ្ញខ្មែរយើងទទួលស្គាល់បានបញ្ជាក់ថា ការការពារសិទ្ធិមនុស្ស គឺជាការចាំបាច់ ដើម្បីចៀសវាងកុំឲ្យមនុស្សត្រូវបង្ខំចិត្តជ្រើសរើសយកការប្រឆាំងនឹងការគៀបសង្កត់រំលោភបំពានណាមួយដោយពឹងផ្អែកលើការរើបម្រះបះបោរ ។
ត្រង់ចំណុចនេះមានមនុស្សមួយចំនួនយល់ច្រឡំថា ដើម្បីរក្សាសន្តិភាពសង្គមមួយត្រូវបិទ ឬកាត់បន្ថយសិទ្ធិរបស់ប្រជាពលរដ្ឋ ។ លោកបានគូសបញ្ជាក់ថា ៖ «ដោយយល់ និងឲ្យតម្លៃខ្ពស់បំផុតលើសិទ្ធិមនុស្សដែលជាមូលដ្ឋានគ្រឹះនៃសន្តិភាព និងការអភិវឌ្ឍនោះហើយទើបជាងពីរទសវត្សន៍មកនេះខ្ញុំបានបូជាពេលវេលាសេចក្តីសុខផ្ទាល់ខ្លួន កម្លាំងកាយ និងចិត្តក្នុងការលើកកម្ពស់សិទ្ធិមនុស្ស និងលទ្ធិប្រជាធិបតេយ្យ» ។ លោកបានបន្ថែមថា នៅក្នុងសង្គមមួយមានស្ថេរភាពទៅបានលុះត្រាតែមនុស្សគ្រប់រូបក្នុងសង្គមនោះទទួលបាននូវយុត្តិធម៌ ពោល គឺមានសិទ្ធិសេរីភាព និងមិនត្រូវបានគេរំលោភបំពាន ។
សិទ្ធិមនុស្ស គឺជាមរតករបស់មនុស្សជាតិវាមិនមែនជារបស់ជាតិសាសន៍ណាមួយផ្តាច់មុខឡើយ ។ លោកសង្កត់ធ្ងន់ថា ៖ «ការចូលរួមលើកកម្ពស់ និងការពារសិទ្ធិមនុស្សមិនមែនជាការ ជ្រៀតជ្រែកកិច្ចការផ្ទៃក្នុងនេះទេ ។ ហើយយើងក៏មិនត្រូវប្រមាថភាពជាមនុស្សរបស់ខ្មែរ ដោយលើកឡើងថា សិទ្ធិមនុស្ស គឺជាគំនិតបរទេសនោះដែរ ។ ក្នុងនាមជាមនុស្សខ្មែរត្រូវការសិទ្ធិសេរីភាព ។ នេះជាច្បាប់ធម្មជាតិ» ៕
ចែករំលែកព័តមាននេះ