រាជធានីភ្នំពេញ ៖ ជនសង្ស័យម្នាក់ដែលជាអ្នកទទួលផលចោរកម្មទិញម៉ូតូពីក្រុមចោរប្លន់កាំបិតបុ័ងតោត្រូវបានកម្លាំងនគរបាលផ្នែកព្រហ្មទណ្ឌខណ្ឌពោធិ៍សែនជ័យសហការជាមួយកម្លាំងនគរបាលនាយកដ្ឋាននគរបាលព្រហ្មទណ្ឌក្រសួងមហាផ្ទៃធ្វើការស្រាវជ្រាវរហូតកំណត់បានមុខសញ្ញាបាន ។ បន្ទាប់មកបានតាមរយៈពេល៣យប់ និង៤ថ្ងៃ ព្រមទាំងឆ្លងកាត់ខេត្តចំនួន៤ទើបចាប់ខ្លួនបាន ។
ដោយឡែកក្រុមចោរប្លន់៣នាក់ដែលយកម៉ូតូទៅលក់ឲ្យជននោះក្រោយពីធ្វើសកម្មភាពប្លន់បានសម្រេចនោះ ត្រូវបាននគរបាលខាងលើចាប់ខ្លួនបានកាលពីជាង១០ថ្ងៃមុន ក្រោយពេលពួកនេះដេញកាប់ប្លន់យកម៉ូតូពីបុគ្គលិកហាងខារ៉ាអូខេ២នាក់ប្ដីប្រពន្ធបានត្រឹមតែរយៈពេលប៉ុន្មានម៉ោងប៉ុណ្ណោះ ។ ការចាប់ខ្លួនជនសង្ស័យដែលជាអ្នកទទួលទិញម៉ូតូចោរនោះបានធ្វើឡើងកាលពីថ្ងៃទី០៧ ខែធ្នូ ឆ្នាំ២០១៩ ខណៈដែលជននេះព្យាយាមរត់គេចខ្លួនពីខេត្តមួយទៅខេត្តមួយហើយចុងក្រោយទៅលាក់ខ្លួននៅក្នុងព្រៃឯភូមិសាស្ត្រខេត្តស្ទឹងត្រែង ។
ជនសង្ស័យរូបនេះឈ្មោះ វ៉ាន់ សាវឿន អាយុ៣៧ឆ្នាំ ជនជាតិខ្មែរ មុខរបរជាងជួសជុលម៉ូតូមានស្រុកកំណើតក្នុងភូមិត្រពាំងឬស្សី ឃុំសម្បត្តិមានជ័យ ស្រុករមាសហែក ខេត្តស្វាយរៀង និងស្នាក់នៅផ្ទះជួល ក្នុងភូមិកន្ទោកជើង សង្កាត់កន្ទោក ខណ្ឌកំបូល រាជធានីភ្នំពេញ ។
តាមប្រភពពីនគរបាលបានឱ្យដឹងថា ជនសង្ស័យដែលត្រូវចាប់ខ្លួនក្រោយគេនេះគឺជាអ្នកទទួលផលចោរកម្ម និងសមគំនិតនៅក្នុងអំពើទុច្ចរិត ហើយដោយសារតែជននេះគឺជាអ្នករ៉ាប់រងខាងទទួលទិញម៉ូតូ ទើបធ្វើឲ្យក្រុមចោរមានទីកន្លែងសម្រាប់លក់ហើយបានធ្វើសកម្មភាពដេញកាប់ប្លន់យកម៉ូតូពីអ្នកដំណើរពេលយប់ជាបន្តបន្ទាប់ ។
ប៉ុន្តែសកម្មភាពលើកចុងក្រោយ និងជាពេលអស់លក្ខណ៍សម្រាប់ក្រុមនេះគឺនៅវេលាម៉ោង៣និង១៥នាទីយប់ទៀបភ្លឺថ្ងៃទី២៨ ខែវិច្ឆិកា ឆ្នាំ២០១៩ បានធ្វើសកម្មភាពដេញតាមធាក់ផ្ដួលរួចប្រើកាំបិតបុ័ងតោដេញកាប់បុរស និងស្ត្រី ២នាក់ប្ដីប្រពន្ធប្លន់យកម៉ូតូ១គ្រឿងបានសម្រេច នៅតាមផ្លូវបេតុងឃ្យូអឹមអាយ ត្រង់ចំណុចមុខរោងចក្រក្លេតភី ស្ថិតនៅក្នុងភូមិព្រៃព្រីងជើង២ សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ ខណៈដែលជនរងគ្រោះទាំង២នាក់កំពុងជិះម៉ូតូ១គ្រឿងម៉ាកហុងដាឌ្រីមសេ១២៥ ស៊េរីឆ្នាំ២០១៩ ពណ៍ខ្មៅ ពាក់ផ្លាកលេខ ភ្នំពេញ 1HI-0319 ឌុបគ្នាចេញពីធ្វើការហាងខារ៉ាអូខេត្រឡប់ទៅកាន់ផ្ទះជួលវិញ ។
បន្ទាប់មកក្រុមចោរបានយកម៉ូតូជិះគេចខ្លួនបាត់ ប៉ុន្តែក្រោយពេលទទួលបានពាក្យបណ្ដឹងពីជនរងគ្រោះកម្លាំងនគរបាលផ្នែកព្រហ្មទណ្ឌខណ្ឌពោធិ៍សែនជ័យសហការណ៍ជាមួយកម្លាំងនគរបាលនាយកដ្ឋាននគរបាលព្រហ្មទណ្ឌក្រសួងមហាផ្ទៃ និងនគរបាលប៉ុស្តិ៍ចោមចៅទី៣ ធ្វើការស្រាវជ្រាវចាប់ខ្លួនបាន៣នាក់ជាបន្តបន្ទាប់នៅវេលាល្ងាចថ្ងៃដដែលនោះដែរ ។
ប្រភពដដែលបានបន្តទៀតថា ជនរងគ្រោះនៅក្នុងអំពើប្លន់លើកចុងក្រោយឈ្មោះ គា សុភារ៉ា ភេទប្រុស អាយុ២៧ឆ្នាំ មុខរបរបុគ្គលិកហាងខារ៉ាអូខេផង និងជាកម្មករោងចក្រផង ស្នាក់នៅបន្ទប់ជួលស្ថិតនៅក្នុងភូមិជម្ពូវ័ន សង្កាត់ចោមចៅទី៣ ខណ្ឌពោធិ៍សែនជ័យ ហើយស្ត្រីជាប្រពន្ធរបស់គាត់មិនត្រូវបានស្គាល់ឈ្មោះនោះទេ ។
ដោយឡែកជនសង្ស័យដែលត្រូវចាប់ខ្លួនក្រោយពេលប្លន់នាពេលនោះរួមមានទី១-ឈ្មោះ មួន ភិរ័ក្ស ភេទប្រុស អាយុ១៨ឆ្នាំ ជាសិស្សរៀនជួសជុលម៉ូតូ ស្នាក់នៅក្នុងភូមិកន្ទោកខាងជើង សង្កាត់កន្ទោក ខណ្ឌកំបូល ទី២-ឈ្មោះ កែវ សុភាព ភេទប្រុស អាយុ១៧ឆ្នាំ ជាសិស្ស មានទីលំនៅក្នុងភូមិសាមគ្គីទី៦ សង្កាត់ត្រពាំងក្រសាំង ខណ្ឌពោធិ៍សែនជ័យ និងទី៣-ឈ្មោះ គង់ ប៊ុនសី ភេទប្រុស អាយុ១៧ឆ្នាំ មុខរបរមិនពិតប្រាកដ ស្នាក់នៅបន្ទប់ជួលភូមិត្រពាំងគល់ សង្កាត់កន្ទោក ខណ្ឌកំបូល ជននេះជាអ្នកយកម៉ូតូដែលប្លន់បានទៅលាក់ទុកក្នុងបន្ទប់ជួលដែលខ្លួនស្នាក់នៅ ដោយរង់ចាំពេលស្ងប់ស្ងាត់នគរបាលលែងរុករកទើបបញ្ចេញយកទៅលក់ឲ្យឈ្មោះ វ៉ាន់ សាវឿន ដែលចាំទទួលទិញស្រាប់ ប៉ុន្តែមិនទាន់បានលក់ផងត្រូវកម្លាំងចាប់ខ្លួនទាំង៣នាក់ចំណែកឈ្មោះ វ៉ាន់ សាវឿន បានរត់គេចខ្លួនបាត់ ។
នគរបាលបានបញ្ជាក់បន្លែមទៀតថា ក្រោយពេលចាប់ខ្លួនកម្លាំងដកហូតបានម៉ូតូជនរងគ្រោះមកវិញហើយក្រុមនេះធ្លាប់ធ្វើសកម្មភាពប្លន់២លើកដោយលើកទី១ប្លន់បានម៉ូតូម៉ាកហុងដាឌ្រីម១គ្រឿងរួចយកទៅលក់ឲ្យឈ្មោះ វ៉ាន់ សាវឿន លុះលើកទី២ក៏ត្រូវជាប់អន្ទាក់ ។ បន្ទាប់កម្លាំនគរបាលបានកសាងសំណុំរឿងចាត់ការតាមច្បាប់ ហើយសាលាដំបូងរាជធានីភ្នំពេញបានសម្រេចឃុំខ្លួននៅពន្ធនាគារព្រៃស ក្រោយមកកម្លាំងបានបន្តស្រាវជ្រាវតាមចាប់ជនសង្ស័យឈ្មោះ វ៉ាន់ សាវឿន ដែលជាអ្នកសមគំនិតទទួលទិញម៉ូតូទៀត ។
ដោយបានទទួលដំណឹងថា ជននេះទៅលាក់ខ្លួននៅឯខេត្តព្រៃវែង ក៏បានតាមទៅដល់ទីនោះតែជននេះដឹងខ្លួនទាន់ក៏បានបន្តគេចទៅលាក់ខ្លួននៅឯស្រុកកំណើតក្នុងភូមិត្រពាំងឬស្សី ឃុំសម្បត្តិមានជ័យ ស្រុករមាសហែក ខេត្តស្វាយរៀង ។ ពេលនោះកម្លាំងបានតាមទៅទីនោះទៀតប៉ុន្តែជនសង្ស័យបានគេចចេញដោយឆ្លងកាត់ខេត្តក្រចេះ និងចូលទៅដល់ខេត្តស្ទឹងត្រែងរួចចូលទៅសម្ងំនៅក្នុងព្រៃនៅទីនោះទើបត្រូវកម្លាំងចាប់បានរួចនាំត្រឡប់មកកាន់ខណ្ឌពោធិ៍សែនជ័យ រាជធានីភ្នំពេញ វិញដើម្បីសាកសួរ និងចាត់ការតាមច្បាប់ ៕
កែសម្រួលដោយ ៖ សំណាង
ចែករំលែកព័តមាននេះ