សប្បាយគឺលោកសំដៅដល់ការពេញចិត្តក្នុងការធ្វើ ឬការពេញចិត្តចំពោះការដែលនឹងឲ្យសម្រេចតាមគោលបំណងដូចជាការរស់នៅ ការបំពេញការងារ ឬការបំពេញតាមផ្លូវចិត្តបានដល់សមាធិ ក៏ឲ្យមានសប្បាយផងទើបសម្រេចផលល្អ ។ សប្បាយក្នុងទីនេះមាន៧យ៉ាងគឺៈ ១- ឧតុសប្បាយ គឺបរិយាកាសជុំវិញ…
សប្បាយគឺលោកសំដៅដល់ការពេញចិត្តក្នុងការធ្វើ ឬការពេញចិត្តចំពោះការដែលនឹងឲ្យសម្រេចតាមគោលបំណងដូចជាការរស់នៅ ការបំពេញការងារ ឬការបំពេញតាមផ្លូវចិត្តបានដល់សមាធិ ក៏ឲ្យមានសប្បាយផងទើបសម្រេចផលល្អ ។ សប្បាយក្នុងទីនេះមាន៧យ៉ាងគឺៈ
១- ឧតុសប្បាយ គឺបរិយាកាសជុំវិញ ដី ទឹក អាកាស គឺធម្មជាតិជុំវិញដែលជាទីមនោរម្យល្អ និង ជាទីពេញចិត្ត ។
២- អាហារសប្បាយ មានអាហារគ្រប់គ្រាន់ ជាអាហារមានគុណភាពដល់រាងកាយ ទ្រទ្រង់នូវសុខភាព មានរស់ជាតិសមគួរ ។
៣- សេនាសនសប្បាយៈ គឺទីអាស្រ័យ ទីដេក ទីអង្គុយ មិនមានភ័យ អាចធ្វើកិច្ចការតាមបំណងបានល្អ ។
៤- បុគ្គលសប្បាយ មានបុគ្គលដែលត្រូវតាមអធ្យាស្រ័យ មិននាំមកនូវសេចក្ដីក្ដៅក្រហាយក្រវល់ក្រវាយ។ រឹតតែល្អនោះ គឺមានគុណធម៌ មានបញ្ញា មានការចេះដឹង មានមេត្រី ដែលជួយដល់ការអភិវឌ្ឍដល់បញ្ញា និងជីវិតឲ្យក្រៃលែងឡើង ។
៥- ឥរិយាបថសប្បាយ ឥរិយាបថគឺការកម្រើកនៃរាងកាយ គឺការដេក ដើរ ឈរ អង្គុយ ឲ្យមានតុល្យភាព ឬឲ្យស្មើគ្នាទើបឈាមរត់ល្អ មិនស្ទះខ្យល់ ។
៦- គោចរសប្បាយ គឺមានកន្លែងអាហារ ឬកន្លែងនៃបច្ច័យ៤ ដែលជារបស់ចាំបាច់ប្រើប្រាស់ក្នុងការរស់នៅ រកបានដោយមិនលំបាក ដូចជា មានភូមិស្រុក ផ្សារ ឬទីប្រជុំជន មិនជិត មិនឆ្ងាយពេក ។
៧- សវនសប្បាយ ឬធម្មសវនៈ គឺមានឱកាសបានស្ដាប់បានឮពាក្យពេចន៍សេចក្ដី និងរឿងរ៉ាវដែលនាំឲ្យកើតបញ្ញាយល់ដឹងក្នុងសេចក្ដីពិត សេចក្ដីជាធម៌ ជាចំណេះដឹង ផ្ចុងផ្ដើមដល់ការអភិវឌ្ឍគុណភាពមនុស្ស ។
អ្នកចម្រើនសមាធិលុះណាតែអាស្រ័យសប្បាយទាំង៧នេះទើបសម្រេចផលល្អប្រពៃ ។ ដោយសាន សារិន
ចែករំលែកព័តមាននេះ