រាជធានីភ្នំពេញ ៖ ទីបំផុតសេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២០ ដែលគ្រោងចំណាយប្រមាណ៨,២ ប៊ីលានដុល្លារអាមេរិក ត្រូវបានសមាជិកព្រឹទ្ធសភាលើកដៃអនុម័តជាឯកច្ឆ័ន្ទ។ ការអនុម័តសេចក្តីព្រាងច្បាប់នេះ ធ្វើឡើងក្នុងសម័យប្រជុំពេញអង្គព្រឹទ្ធសភា ក្រោមអធិបតីភាពសម្តេចសេនាវិបុលភក្តី សាយ…
រាជធានីភ្នំពេញ ៖ ទីបំផុតសេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២០ ដែលគ្រោងចំណាយប្រមាណ៨,២ ប៊ីលានដុល្លារអាមេរិក ត្រូវបានសមាជិកព្រឹទ្ធសភាលើកដៃអនុម័តជាឯកច្ឆ័ន្ទ។ ការអនុម័តសេចក្តីព្រាងច្បាប់នេះ ធ្វើឡើងក្នុងសម័យប្រជុំពេញអង្គព្រឹទ្ធសភា ក្រោមអធិបតីភាពសម្តេចសេនាវិបុលភក្តី សាយ ឈុំ ប្រធានព្រឹទ្ធសភា នាព្រឹកថ្ងៃទី៩ ខែធ្នូ ឆ្នាំ២០១៩ ដោយមានការចូលរួមពីសមាជិក សរុបចំនួន៥៨រូបនៃចំនួនសមាជិកព្រឹទ្ធសភាសរុប។
បើតាមរបាយការណ៍របស់លោក ជា ជេដ្ឋ ប្រធានគណៈកម្មការទី២ព្រឹទ្ធសភា បានឲ្យដឹងថា តាមការព្យាករណ៍កំណើនសេដ្ឋកិច្ចកម្ពុជា នៅឆ្នាំ២០១៩ អាចសម្រេចបានកំណើន ៧,១% ធៀបនឹង ៧,៥% ក្នុងឆ្នាំ២០១៨ ។ ដោយឡែកកំណើននេះ ត្រូវបានព្យាករណ៍ថា នឹងថមថយមកក្នុងអត្រា ៦,៥% ឆ្នាំ២០២០ ដែលធ្វើឱ្យ ផសស តាមថ្លៃបច្ចុប្បន្ន ស្ថិតក្នុងរង្វង់ ១១៩,០៣៤ ប៊ីលានរៀល សមមូលនឹងប្រមាណ ២៩,៣៦២ លានដុល្លារអាមេរិក ហើយ ផសស សម្រាប់មនុស្សម្នាក់ត្រូវបានរំពឹងថា នឹងកើនឡើងដល់ ១,៨១៦ ដុល្លារអាមេរិក ធៀបនឹង១,៦៧៩ ដុល្លារអាមេរិក ក្នុងឆ្នាំ២០១៩ ។
ជារួមការព្យាករណ៍សេដ្ឋកិច្ចមកទល់ពេលថ្មីៗនេះ បង្ហាញថា កម្ពុជានៅតែអាចបន្ត ស ម្រេចបានកំណើនសេដ្ឋកិច្ចកម្រិតខ្ពស់ ក្នុងរយៈពេលខ្លី និងមធ្យមខាងមុខ។ ប៉ុន្តែសេដ្ឋកិច្ច អាចជួបប្រទះនឹងបញ្ហាប្រឈម និងហានិភ័យកាន់តែខ្ពស់ ទិដ្ឋភាពទាំងក្នុង និងខាងក្រៅ ដែលអាចប៉ះពាល់ដល់ចីរភាពនៃកំណើន និងនិរន្តរភាព នៃការអភិវឌ្ឍប្រទេស ។ ដើម្បីត្រៀមខ្លួនដោះស្រាយបញ្ហាចម្បងៗជាយថាហេតុ រាជរដ្ឋាភិបាលបានគិតគូរជាយុទ្ធសាស្ត្រ ដោយឈរលើស្មារតីប្រុងប្រយ័ត្នខ្ពស់ និងត្រៀមដាក់ចេញនូវវិធានការគោលនយោបាយផ្សំចម្រុះមួយចំនួន ដោយបានផ្តោតលើវិធានការធំៗចំនួន៤ ដែលក្នុងនោះរួមមាន ៖
១)- ស្រូបយកការប៉ះទង្គិច ដែលអាចកើតមានឡើងនៅក្នុងយថាហេតុអាក្រក់ណាមួយ ។
២)- ដោះស្រាយបញ្ហាជារចនា សម្ព័ន្ធដែលដាក់កម្រិតលើភាពប្រកួតប្រជែងសេដ្ឋកិច្ច។
៣)- ពង្រឹងភាពធន់នឹងវិបត្តិលើផ្នែកម៉ាក្រូសេដ្ឋកិច្ច និងហិរញ្ញវត្ថុ
៤)- បង្កើនប្រសិទ្ធភាព និងស័ក្តិសិទ្ធិភាព នៃស្ថាប័នសាធារណៈ ។
ប្រភពបន្តថា ចំណូលក្នុងប្រទេសថវិការដ្ឋ ឬចំណូលក្នុងប្រទេសថវិកាជាតិ ត្រូវបានគ្រោងប្រមាណ ២៦,៣ ទ្រីលានរៀល សមមូលនឹងប្រមាណ ៦,៥ ប៊ីលានដុល្លារអាមេរិក ត្រូវជា ២២,១៣% នៃ ផសស និងមានកំណើន ២៤,៣% ធៀបនឹងច្បាប់ឆ្នាំ២០១៩ ។ ក្របខ័ណ្ឌថ វិកាឆ្នាំ២០២០ មានគោលដៅបង្កើនចំណូលចរន្តថវិការដ្ឋឱ្យបានស្មើនឹង ២១,៩៦% នៃ ផសស ដែលមានកំណើនចំនួន ២,៦៣ ពិន្ទុភាគរយ នៃផលិតផលក្នុងស្រុកសរុប (ផ.ស.ស) ធៀបនឹងច្បាប់ឆ្នាំ២០១៩ ពោលគឺនឹងសម្រេចឱ្យបានលើ គោលដៅនៃការប្រមូលចំណូលចរន្តថវិការដ្ឋ ដែលត្រូវបានកំណត់ឱ្យកើនជាមធ្យម ០,៣ពិន្ទុភាគរយនៃ (ផសស) ក្នុងមួយឆ្នាំ នៅក្នុងយុទ្ធសាស្ត្រកៀរគរចំណូលឆ្នាំ២០១៩-២០២៣ ។
លោកបន្តថា ចំណាយសរុបថវិការដ្ឋ ឬចំណាយសរុបថវិកាជាតិ ត្រូវបានគ្រោងប្រមាណ ៣៣,៣ ទ្រីលានរៀល សមមូលនឹងប្រមាណ ៨,២ ប៊ីលានដុល្លារអាមេរិក ស្មើនឹង ២៨ ,០១% នៃ ផសស និងមានកំណើន ២២,៧% ធៀបនឹងច្បាប់ឆ្នាំ២០១៩ ក្នុងនោះចំណាយ ចរន្តថវិការដ្ឋត្រូវបានគ្រោងប្រមាណ ១៩,៨ ទ្រីលានរៀល សមមូលនឹងប្រមាណ ៤,៩ ប៊ីលាន ដុល្លារអាមេរិក ត្រូវជា ១៦,៦៥% នៃ ផសស និងមានកំណើន ១០,៧% ធៀបនឹងច្បា ប់ ឆ្នាំ២០១៩។
លោក ម៉ម ប៊ុននាង អ្នកនាំពាក្យព្រឹទ្ធសភាបានឲ្យដឹងថា សេចក្តីព្រាងត្រូវបានព្រឹទ្ធសភាអនុម័យដោយសម្លេង៥៨នៃចំនួនសមាជិកព្រឹទ្ធសភាទាំងមូល។ លោកថា អង្គព្រឹទ្ធសភាបានមើលឃើញថា សេចក្តីព្រាងច្បាប់នេះមានលក្ខខណ្ឌត្រឹមត្រូវតាមទម្រង់ និងគតិច្បាប់។
លោកបញ្ជាក់ថា៖ «សេចក្តីព្រាងច្បាប់នេះ គឺពិតជាមានសារសំខាន់ និងចាប់បាច់បំផុត ក្នុងការជួយដល់រាជរដ្ឋាភិបាលឲ្យសម្រេចបាននូវគោលដៅជាយុទ្ធសាស្ត្ររបស់ជាតិ សំដៅ សម្រេចឲ្យបានពេញលេញនូវគោលដៅប្រកបដោយចីរភាពរបស់កម្ពុជា។ ក៏ដូចជាអាចឆ្លើយតបប្រកបដោយប្រសិទ្ធភាពចំពោះរាល់បញ្ហាប្រឈម និងហានិភ័យនានា»។ លោកគូសបញ្ជាក់ទៀតថា៖ «ច្បាប់នេះ នឹងជួយដល់រាជរដ្ឋាភិបាលទប់ស្កាត់រាល់ហានិភ័យនានា ទោះបីជានៅក្នុងប្រទេស ឬក្រៅប្រទេស យើងអាចទប់ស្កាត់បាន »។
ចំណែកលោក អ៊ូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុបានលើកឡើងថា សេចក្តីព្រាងច្បាប់នេះ រៀបចំឡើងតាមគោលនយោបាយពង្រឹងការគ្រប់គ្រងថវិការដោយឈរលើគោលការណ៍ វិត្ថារកម្មថវិការ ដែលផ្តោតលើការយកចិត្តទុកដាក់ ជាពិសេសមនុស្ស និងការទម្រង់រចនសម្ព័ន្ធដែលមានអភិបាលកិច្ចជាស្នូល ដើម្បីឆ្ពោះទៅសម្រេចគោលដៅសំខាន់ៗដែលជាយុទ្ធសាស្ត្រ និងជាកម្មវិធីនយោបាយរបស់រាជរដ្ឋាភិបាល ដែលជាការកែទម្រង់នូវដំណើរការអភិវឌ្ឍឈានឡើងរបស់កម្ពុជា លើវិថីនៃការអភិវឌ្ឍប្រកបដោយគុណភាព និងចីរភាពទៅមុខឥតឈប់ឈរ។
សូមរឮកថា សេចក្តីព្រាងច្បាប់ហិរញ្ញវត្ថុសម្រាប់ការគ្រប់គ្រងឆ្នាំ២០២០ មាន៧ជំពូក និង១៥មាត្រា ត្រូវបានរដ្ឋសភាអនុម័តដោយសម្លេង១០៨ នៃសមាជិករដ្ឋសភាទាំងមូល កាលពីថ្ងៃទី២៦ វិច្ឆិកា ឆ្នាំ២០១៩ កន្លងមក៕ (កែសម្រួលដោយ ៖ បុប្ផា)
ចែករំលែកព័តមាននេះ